ՀԱԿ խմբակցության ղեկավար Լեւոն Զուրաբյանը, այսօր լրագրողների հետ հանդիպման ընթացքում անդրադառնալով ԵԽԽՎ ձմեռային նստաշրջանին, մտահոգություն հայտնեց, որ շատ վտանգավոր զեկույցներ են, որոնք միակողմանի մեղքը դնում են ՀՀ վրա: «Խոսք է գնում ՀՀ-ի կողմից միակողմանի զիջումների մասին, ընդհուպ մինչեւ հայկական ուժերի դուրսհանումը Ղարաբաղից: Սա նշանակում է, որ արդեն բանակցելն անիմաստ է»,-ասաց նա:
Զուրաբյանի խոսքով՝ ստեղծվել է չափազանց բարդ իրավիճակ. «Սա ձախողում է, սա արդեն խայտառակություն է, միակողմանի պարտադրանք ՀՀ-ին, որն անընդունելի է: Խոսել հավասարակշռության, որեւէ բալանսի մասին անհնար է: Պարզագույն մի սուտ է ասվում, թե հղում եմ կատարում այն միակ բանաձեւին, որը նվիրված է եղել բացառապես ԼՂՀ հարցին: Պարզ սուտ է, որովհետեւ եթե ԵԽԽՎ արխիվներում փնտրեն 1994-ի եւս մի բանաձեւ կգտնեն: Ես ունեմ այդ բանաձեւը»,-փոխանցեց ՀԱԿ ղեկավարը:
Զուրաբյանի պնդմամբ` այս վիճակը ստեղծվել է ոչ միայն Ադրբեջանի խավիարային դիվանագիտության պատճառով, այլև` ՀՀ իշխանությունների. «ՀՀ դիվանագիտությունը չունի ճշգրիտ հարցեր ձեւակերպելու ինտելեկտուալ վերլուծական ուժ: Ես չեմ ուզում Ադրբեջանին այս նստաշրջանում զինամթերք տալ: Հիմա եթե կոնկրետ բաներ բացահայտեմ, զինամթերք կտամ: Պատմությունը ավարտվի, ես կխոսեմ այդ մասին»-հավելեց նա:
Զուրաբյանը, խոսելով հանրաքվեի մասին, նշեց, որ իշխանությունն այժմ թուլացած է:
Ըստ նրա` Սերժ Սարգսյանը ճգնաժամի մեջ է. «Ոչ մեկը, ըստ էության, լեգիտիմ չի ճանաչել մեր հանրաքվեն, եւ հիմա ինքն ընկել է դժվար կացության մեջ: Հիմա միջազգային հանրությունը շատ ավելի խիստ է վերահսկելու ընտրությունները, որ ինչքան հնարավոր է, բացառեն ընտրակեղծարարությունը»,-փոխանցեց նա:
ՀԱԿ ղեկավարն անդրադառձավ նաեւ «Նոր Հայաստան» հանրային փրկության ճակատի անդամ Գեւորգ Սաֆարյանի ձերբակալությանը. «Մի կողմից` անհասկանալի է, ինչու են հարձակվում իրենք երիտասարդների վրա, որոնք շատ մեծ ազդեցություն չունեն: Շատ պարզ է: Իշխանությունն իրեն այնքան թույլ է զգում, այնքան զուրկ ժողովրդական աջակցությունից, որ ուզում է ցանկացած բողոք խեղդել սաղմնային վիճակում»,-եզրափակեց իր խոսը Զուրաբյանը:
Զուրաբյանն իր խոսքի ընթացքում անդրադառձավ նաեւ ՄԻՊ Կարեն Անդրեասյանի հրաժարականին` կարծիք հայտնելով, որ հրաժարականը պայմանավորված է իշխանությունների ճնշմամբ: «Հիշում ենք, որ անցյալ նստաշրջանում ՀՀԿ մի պատգամավոր հարձակվեց Կարեն Անդրեասյանի վրա, դրանից հետո եղավ Արմեն Աշոտյանի` նույնպես կատաղի հարձակումը ՄԻՊ-ի վրա: Սրան եթե գումարենք իշխանությունների դժգոհությունները պաշտպանի՝ դատական համակարգի հետ կապված գալիս ենք այս եզրահանգմանը, որ Կարեն Անդրեասյանը հրաժարական է տվել այս իշխանությունների ճնշման ներքո»,- հավելեց Զուրաբյանը:
.gif)
