Փետրվարի 1-ը «Ժողովուրդ» օրաթերթի ծննդյան օրն է: 2011 թվականին լույս տեսավ օրաթերթի առաջին համարը, որն անվճար բաժանվեց բոլոր կրպակներում:
Երիտասարդ անձնակազմի կողմից հրապարակված օրաթերթի առաջին համարի շապիկին գրված էր. «Առանց վերամբարձ խոսքերի եւ «սեթեւեթանքների», միանգամից կարող ենք վստահեցնել, որ մեր թիկունքում չկա կանգնած որեւէ քաղաքական ուժ, անգամ ամենասուր աչքերով եւ գործիքներով նայելու դեպքում մեր թիկունքում չեն երեւա որեւէ օլիգարխի կամ օսլայած մազերով երիտասարդների ականջներ, թեւեր, ոտքեր եւ այլ մարմնամասեր: Մենք չունենք «պապաներ», չունենք թելադրողներ եւ պահանջներ ներկայացնողներ: Եւ պատահական չէ մեր կողմից ընտրված անունը՝ «Ժողովուրդ»: Այն լինելու է իսկապես բոլորի թերթը»:
Տարիների ընթացքում «Ժողովուրդ»-ը բազմապիսի ճնշումների ենթարկվեց, անցավ պայքարի լուրջ ճանապարհով ու ապացուցեց, որ հավատարիմ է իր կարգախոսին՝ «Օրաթերթ բոլորի եւ ամեն ինչի մասին»:
Օրաթերթի խմբագրակազմը թեեւ տարիների ընթացքում փոփոխվել է, բայց սկզբունքներն ու ավանդույթները նույնն են մնացել… 
Լինելով իրապես անկախ օրաթերթ` «Ժողովուրդ»-ը օբյեկտիվ, բազմակողմանի լուսաբանել է դեպքերն ու իրադարձությունները՝ չխորշելով ամենասուր քննադատությունից: Նշենք, որ միեւնույն ժամամանակ այդ կեցվածքը չի խանգարել օրաթերթին պահպանել ընկերական հարաբերությունները ինչպես ընդդիմադիր, այնպես էլ իշխանական գործիչների հետ:
.gif)
