ՀԱՐՑ. Ավտոկանգառների հարցը մայրաքաղաքում զգալիորեն բարելավվել է: Նոր ու մեծ ավտոբուսներից էլ ժողովուրդը հաստատ սիրով է օգտվում: Այսուհանդերձ, հաճախ եմ նկատում, որ տաքսիները կանգառին շատ մոտ կամ հենց կանգառի տարածքում են կայանում՝ զգալի անհարմարություն ստեղծելով երթուղայինների եւ ավտոբուսների կայանման համար: Արդո՞ք քաղաքապետարանը չի նախատեսում տաքսիների կայանման վայրի ու կանգառների միջեւ որոշակի տարածություն սահմանել:
ՊԱՏԱՍԽԱՆ. Երեւանի քաղաքապետարանին ուղղված հարցմանն ի պատասխան՝ աշխատակազմի տրանսպորտի վարչությունից տեղեկացնում են, որ տաքսիների կամ այլ տրանսպորտային միջոցների կայանումը հասարակական տրանսպորտի կանգառում կամ կանգառագոտուց մինչեւ 15 մետր հեռավորությամբ, ըստ երթեւեկության կանոնների, արգելված է, որի հսկողությունն իրականացվում է ՀՀ ՃՈ-ի կողմից:
Քաղաքապետարանի կողմից Երեւանի առանձին հատվածներում սահմանված են տաքսիների կայանման համար նախատեսված վայրեր, եւ աշխատանքներ են տարվում մնացած տեղերում եւս ունենալ նման հնարավորություն:
Միաժամանակ տեղեկացնում ենք՝ Երեւանի քաղաքապետարանի աշխատակազմի տրանսպորտի վարչության, «Երեւանտրանս» ՓԲԸ-ի եւ ՀՀ ՃՈ աշխատակիցների հետ համատեղ կատարվում են ամենօրյա ստուգայցեր, որոնց արդյունքում արգելվում է կանգառներում եւ կանգառակից տարածքներում այլ տրանսպորտային միջոցների կայանումը, իսկ անօրինական կայանման դեպքում կազմվում են համապատասխան վարչական պատասխանատվության արձանագրություններ:
տեղեկատվության եւ հասարակայնության
հետ կապերի վարչություն
«ԺՈՂՈՎՈՒՐԴ». Որքան էլ քաղաքապետարանը պնդում է, թե կանգառներում ամենօրյա ստուգայցեր են կատարվում, բայց փաստ է, որ մայրաքաղաքի մի շարք կանգառներում մշտապես «քաոսային» վիճակ է տիրում:
.gif)
