«Մենք չենք մոռանա, իրենք կցանկանան, որ մոռացվի». Ժիրայր Սէֆիլյանին Քննչական կոմիտեում սպառնալու մասին լուրերի հետքերով

Մեկ ամիս առաջ լրատվամիջոցներում հրապարակում եղավ այն մասին, որ նախորդ տարվա ապրիլի 24-ին զանգվածային անկարգություններ նախապատրաստելու գործի շրջանակներում «Նոր Հայաստան» հանրային փրկության ճակատի «Ընդդիմության միասնական շտաբ»-ի պետ Ժիրայր Սէֆիլյանը հրավիրվել էր Քննչական կոմիտե՝ հարցաքննության: Հարցաքննության ընթացքում գործով քննիչ Ամրամ Մակինյանը նրան սպառնալիք է փոխանցել՝ «դադարեցրեք ձեր գործունեությունը՝ հակառակ պարագայում կկալանավորվեք»:

Հիմնադիր խորհրդարանի մամուլի խոսնակ Վարուժան Ավետիսյանը լրատվամիջոցներին պարզաբանել էր, որ խոսքը քաղաքական գործունեության մասին է:

ՔԿ-ն հայտարարությունն անարձագանք չթողեց: Պաշտոնական հաղորդագրության համաձայն՝ Ժ. Սէֆիլյանը  հունվարի 12-ին՝ ժամը 17-ին, հրավիրվել է որպես մեղադրյալ լրացուցիչ հարցաքննության: Նա ներկայացել է վարույթն իրականացնող մարմնին՝ փաստաբանի հետ միասին և օգտվելով իր իրավունքներից՝  հրաժարվել է ցուցմունք տալ, պատասխանել քննիչի հարցերին։

«Նրան պարզաբանվել են օրենսդրությամբ նախատեսված իր իրավունքներն ու պարտականությունները,  այդ թվում՝ իր նկատմամբ ընտրված «ստորագրություն չհեռանալու մասին» խափանման միջոցի պայմանների պահպանման պարտականությունը, կարգը։

«Ինչ վերաբերում է Ժ. Սէֆիլյանի կողմից  ԶԼՄ-ներում հրապարակված այն հայտարարությանը, թե ՀՀ քննչական կոմիտեում իրեն սպառնացել են կալանքի վերցնել՝ քաղաքական գործունեությունը չդադարեցնելու դեպքում, ապա դա իրականությանը բացարձակապես չի համապատասխանում. նախաքննական մարմինը ապաքաղաքական պետական հիմնարկ է և քաղաքական նպատակներով հնչեցվող հայտարարությունները չի մեկնաբանում»,- ասվում է հաղորդագրության մեջ։

ArmLur.am-ը փորձեց պարզել՝ ի վերջո, ինչպես ավարտվեց հիշյալ անհարթությունը: Մեր հարցին ի պատասխան՝ Վարուժան Ավետիսյանը վստահեցրեց, որ Սէֆիլյանի պաշտպանը զբաղվում է այդ գործով, այն իրավական հարթություն է ստացել, իրականացվում է համապատասխան գործընթաց. «Այդպիսի քննչական գործողություն կատարելու, հարցաքննելու անհրաժեշտություն չի եղել. նախորդ հարցաքննությունից երկու հարց են կրկնել: Քննչական կոմիտեն հայտարարություն տարածեց. իրենք իրենց պիտի պատժե՞ն, հա՞: Մենք կատարվածը չենք մոռանա, ժողովուրդն էլ չի մոռանա: Իրենք կցանկանան, որ մոռացվի»,- ներկայացրեց մեր զրուցակիցը:

Հիշեցնենք, որ Սէֆիլյանը և Հիմնադիր խորհրդարանի մի քանի այլ անդամներ մեղադրվում են ապրիլի 24-ին զանգվածային անկարգություններ նախապատրաստելու մեջ: Վարուժան Ավետիսյանին, Պավել Մանուկյանին, Գևորգ Սաֆարյանին, Ժիրայր Սէֆիլյանին, Գարեգին Չուգասզյանին մեղադրանք է առաջադրվել ՀՀ քրեական օրենսգրքի 35-225-րդ հոդվածի 1-ին մասով։