Այսօր համացանցում լուրեր շրջանառվեցին այն մասին, որ Գյումրու նախկին քաղաքապետ Վարդան Ղուկասյանը, նրա որդի Սպարտակն իրենց թիկնապահների հետ ծեծի են ենթարկել մի խումբ գյումրեցիների, որոնց թվում է նաև բռնցքամարտի ճանաչված մարզիչ Գարիկ Բաղդասարյանը:
Մասնավորապես, «Փաստինֆո»-ի փոխանցմամբ՝ փետրվարի 11-ին Սպարտակ Ղուկասյանն իր ընկերոջ` Պատվական Մադոյանի հետ Գյումրիի Ռուսթավելու փողոցում գտնվող «Հրաշքների աշխարհ» մանկական սրճարանում վիճաբանել է բռնցքամարտի ճանաչված մարզիչ Գարիկ Բաղդասարյանի ու նրա ընկերոջ հետ և մահակներով ծեծի ենթարկել նրանց:
Դրանից հետո, նույն օրը՝ գիշերը, բռնցքամարտի մարզիչ Գարիկ Բաղդասարյանը գնացել է Վարդան Ղուկասյանի գրասենյակ, այնտեղ դարձյալ վիճաբանություն է տեղի ունեցել, որի ժամանակ Վարդան Ղուկասյանի թիկնապահները դարձյալ ծեծի են ենթարկել մարզչին:
Բայց միջադեպն այսքանով էլ չի ավարտվել: Նույն օրը նախկին քաղաքապետն ու նրա որդին ծեծի են ենթարկել ևս երեք գյումրեցիների:
ArmLur.am-ի հետ զրույցում նախկին քաղաքապետը տարածված լուրերը կապեց առաջիկա ընտրությունների հետ. «Պիտի լինեն նման լուրեր, անպայման պիտի լինեն: Մինչև ընտրություններն ամեն ամիս նմանատիպ բաներ պիտի լինեն: Ժողովուրդը ճանաչում է բոլոր բանսարկուներին, բոլորին արդեն մենք էլ ենք ճանաչում: Այս ամեն ինչը սարքողներին ասեք՝ մեթոդը փոխե՛ք, չի կպնի»,- ասաց Վարդան Ղուկասյանը՝ կտրականապես հերքելով, որ իր և որդու մասնակցությամբ ծեծկռտուք է տեղի ունեցել:
Մեր զրուցակցի խոսքով՝ մարդիկ, որոնց անունները շրջանառվում են միջադեպում, իրենց մտերիմներն են. «Նմանատիպ դեպք ընդհանրապես տեղի չի ունեցել. հնաոճ է, հնաոճ: Էդ մարդկանց անունները որ տալիս են, դրանք մեր տան տղեքն են, մերոնք են»:
Հարցին՝ վստա՞հ է, որ իրավապահներն ընթացք չեն տա, պատասխանեց. «Մեծական խոսք կա՝ եթե սոխ չես կերել, սիրտդ ինչո՞ւ պիտի մռմռա»:
.gif)
