ՀՀ առողջապահության նախարար Արմեն Մուրադյանը «Իզմիրլյան» բժշկական կենտրոնում այսօր հանդիպեց Երևանի պետական բժշկական համալսարանի բուժական ֆակուլտետի չորրորդ կուրսի ուսանողների հետ:
Նա պատասխանեց ապագա բժիշկներին հետաքրքրող բազմաթիվ հարցերի:
Արմեն Մուրադյանն անդրադարձավ նաև մարզերի առողջապահական խնդիրների լուծմանը, մասնավորապես` բժշկական կազմակերպությունների երիտասարդ որակյալ կադրերով ապահովմանը:
Ներկայացնելով մարզային նորակառույց բժշկական հաստատությունները` նախարարը մատնանշեց օրեր առաջ Մեղրիում բացված տարածաշրջանային նշանակության բժշկական կենտրոնը, որը ևս նեղ մասնագետների պակաս ունի:
Նախարարի խոսքով` մասնագիտական գործունեության սկզբում հատկապես մարզում աշխատելը երիտասարդի կյանքում կարևոր հետք է թողնում` ապահովելով կայանալու, հմտությունները զարգացնելու հնարավորություն: Նա հորդորեց ուսանողներին հնարավորության դեպքում համադրել կրթությունը աշխատանքի հետ` վաղ տարիքից կլինիկական գործունեությանը, հիվանդանոցային կյանքին ծանոթանալու նպատակով:
«Բժիշկ լինելը հոգեվիճակ է և աշխատանքից պետք է ունենալ բավարարվածության զգացում»,- նկատեց առողջապահության նախարարը:
Արմեն Մուրադյանն ուսանողների մասնակցությամբ նաև ուսուցողական վիրահատություն կատարեց: Ներկայացրեց միզապարկի ուռուցքի էնդոսկոպիկ լազերային վիրահատության նրբությունները:
.gif)
