ՄՇԱԿՈՒԹԱՅԻՆ ԲԵՆԶԻՆԻ ՆՐԲՈՒԹՅՈՒՆՆԵՐԸ

ՀՀ վարչապետն ու ֆինանսական պատասխանատուները ՀՀ քաղաքացիների աշխատավարձերը եւ թոշակները չբարձրացնելը պատճառաբանում են պետբյուջեում առկա ֆինանսական դեֆիցիտով, սակայն որեւէ քայլ չեն անում՝ կրճատելու համար պետական ապարատի անհարկի ծախսերը, այդ թվում` ծառայողական մեքենաների եւ դրանց հատկացվող բենզինի հարցում: Օրինակ՝ ՀՀ մշակույթի նախարարության ծառայողական մեքենաներին մեր հաշվարկներով հատկացվում է օրական 12 լիտր բենզին, որը բավարար է մոտ 100 կմ վարելու համար:

«Ժողովուրդ»-ը պաշտոնական փաստաթղթերից տեղեկացավ, որ ՀՀ մշակույթի նախարարությունը այս տարվա հունվարի 19-ին երկու պայմանագիր է կնքել «Սի Փի Էս Օիլ» ընկերության հետ: Մի պայմանագրով ՄՆ-ն գնել է 2354.71 տոննա ռեգուլյար տեսակի բենզին՝ վճարելով 918336.9 դրամ: Իսկ մյուս պայմանագրով նախարարության կողմից գնվել է 16279 տոննա ռեգուլյար տեսակի բենզին՝ ընդհանուրը 6 մլն 348 հազար 810 դրամի: Այս առիթով «Ժողովուրդ»-ը գրավոր կերպով մի քանի հարց ուղղեց մշակույթի նախարարությանը: Ստորեւ ներկայացնում ենք մշակույթի նախարարությունից ստացված պատասխանները մեր հարցերին:
-ՀՀ մշակույթի նախարարությունը քանի՞ ծառայողական մեքենա ունի:
-ՀՀ մշակույթի նախարարության հաշվեկշռում առկա է յոթ ծառայողական ավտոմեքենա:
-Նախարարության կողմից գնված բենզինը քանի՞ մեքենայի վրա է բաշխվելու:
-Ձեռք բերված բենզինը բաշխվում է առկա ծառայողական ավտոմեքենաներին` ըստ անհրաժեշտության:
-Ի՞նչ չափորոշիչներով է ընտրվում, թե նախարարության որ պաշտոնյային պետք է տրամադրվի ծառայողական մեքենա:
-Ծառայողական ավտոմեքենաների բաշխումը իրականացվում է` ելնելով տվյալ պաշտոնատար անձի աշխատանքային ծանրաբեռնվածությունից եւ ղեկավարած ոլորտի առանձնահատկություններից (նախարարի, նախարարի երեք տեղակալների, աշխատակազմի ղեկավարի, գործակալության պետերի եւ ընթացիկ խնդիրների համար):
-Եթե տվյալ պաշտոնյային ծառայողական մեքենա չտրամադրվի, նրա աշխատանքի արդյունավետությունը կփոխվի՞:
-Ծառայողական ավտոմեքենա տրամադրվում է պաշտոնատար անձին իր ղեկավարած ոլորտի օպերատիվ կառավարումն իրականացնելու նպատակով, քանի որ մշակութային կազմակերպությունները` նախարարության ենթակայությամբ գործող ՊՈԱԿ-ները, ինչպես նաեւ հուշարձանները գտնվում են Երեւան քաղաքի տարբեր վարչական շրջաններում եւ ՀՀ մարզերում: Ելնելով վերոնշյալից՝ օպերատիվ տեղաշարժի անհրաժեշտություն է առաջանում:
Այսպիսով` «Ժողովուրդ»-ի գրավոր հարցմանն ուղղված պատասխանում այս կառույցը պատճառաբանում է, որ իրենք շրջում են նաեւ մարզերով, այցելում նախարարության ենթակայության տակ գտնվող ՊՈԱԿ-ները, հուշարձաններ եւ այլն: Սակայն եթե գնված բենզինի չափաքանակները գումարենք իրար, կստացվի 18633.71 տոննա: Եվ եթե ստացված թիվը բաժանենք 7-ի (ծառայողական ավտոմեքենաների թիվն է), ապա բաժանենք 220-ի (տարեկան աշխատանքային օրերի միջին թիվն է), կստացվի, որ նախարարության յուրաքանչյուր ծառայողական մեքենային օրական հատկացվում է ավելի քան 12 լիտր բենզին:
Եւ եթե անգամ մշակույթի նախարարության ծառայողական մեքենաներն ունեն հզոր եւ ծախսատար շարժիչներ, ապա հատկացվող 12 լիտր բենզինը պետք է բավականացնի ավելի քան 100 կմ վարելու համար, ինչը մշակույթի նախարարության դեպքում բացառվում է:
Մյուս կողմից էլ խիստ կասկածելի է, որ նախարարության ներկայացուցիչները ամեն օր այցելում են մարզեր: Իսկ թե ինչ խայտառակ վիճակում են գտնվում մարզերի հուշարձանները, պատմամշակութային արժեք ներկայացնող կոթողները, հայտնի է բոլորիս: Այնուամենայնիվ, եթե նախարարության աշխատակիցը ցանկանում է կատարել իր աշխատանքը՝ շրջելով նախարարության ենթակայության տակ գտնվող ՊՈԱԿ-ներ, տեսնել հուշարձանների վիճակը, ապա այս ամենի համար բավական կարող է լինել մեկ ծառայողական մեքենայի հատկացումը: Ինչ վերաբեում է փոխնախարարներին կամ գործակալության պետերին, ապա ամենեւին էլ պարտադիր չէ, որ նրանք ՀՀ շարքային քաղաքացիների մուծած հարկերից գոյացող պետբյուջեի հաշվին երթեւեկեն ծառայողական շքեղ մեքենաներով: Նրանք միանգամայն հանգիստ կարող են իրենց աշխատանքը կատարել նաեւ սեփական մեքենաներով կամ հանրային տրանսպորտով երթեւեկելով:
Հ.Գ. Համեմատության համար նշենք, որ Մեծ Բրիտանիայում, որտեղ ՀՆԱ-ն 2,7 տրիլիոն դոլար է, բնակչության թիվը 65 միլիոն, ծառայողական մեքենաների թիվը ընդամենը 190 է: Իսկ Հայաստանում, որի բնակչությունը 3 մլն էլ չկա, իսկ ՀՆԱ-ն հազիվ հասնում է 10 միլիարդ դոլարի, պետական համակարգում 1070 մեքենա կա:

ՍՅՈՒՆԷ ՀԱՄԲԱՐՁՈՒՄՅԱՆ

 
ԿՐԱԿՈՑՆԵՐԻ ԳՈՐԾՈՎ
Փետրվարի 11-ին՝ ժամը 22-ի սահմաններում, Դիլիջանում ինքնաձիգի կրակոցից վիրավորվել եւ աջ ստորին վերջույթի հրազենային վնասվածք ախտորոշմամբ Դիլիջանի բժշկական կենտրոն է տեղափոխվել Դիլիջան քաղաքի Շահումյան փողոցի 3-րդ նրբանցքի բնակիչ, 27-ամյա Սերգեյ Միքայելյանը: Վերջինս ոստիկաններին ասել է, թե չի տեսել` ով է իր վրա կրակել: Այդ դեպքի կապակցությամբ քրեական գործ է հարուցվել ՀՀ քրեական օրենսգրքի 34-104 հոդվածի 1-ին մասի հատկանիշներով (Սպանության փորձը): Սույն հոդվածով բնութագրվող արարքը պատժվում է 8-15 տարի ազատազրկմամբ: Քրեական գործի քննությունը կատարում է ՀՀ քննչական կոմիտեի Տավուշի մարզային վարչության Դիլիջանի բաժինը:
Դիլիջանցիները Ս. Միքայելյանին բնութագրում են որպես նորմալ ընտանիքից սերված սովորական երիտասարդի: Միքայելյանը ինքնաձիգի գնդակից վիրավորվել է, երբ գտնվել է ավտոմեքենայի մեջ: Ինքնաձիգի գնդակը ծակել-անցել է ավտոմեքենայի դուռը եւ խոցել Սերգեյի ոտքը: Նա ի պատասխան՝ իր մոտ գտնվող ինքնաձիգից օդ է կրակել, որպեսզի կրակողը զգուշանա ու դադարեցնի իր վրա կրակը: Իրավապահները հիմնավոր կասկածներ ունեն, որ Սերգեյ Միքայելյանը ոչ թե չգիտի, այլ չի ցանկանում հայտնել իր վրա կրակող անձնավորության անունը եւ այն պատճառները, որոնց հետեւանքով իր վրա մահափորձ է կատարվել: Տավուշի մարզի իրավապահների կողմից հայտնաբերվել է ինքնաձիգը, որով կրակել է Սերգեյ Միքայելյանը:
«Ժողովուրդ»-ի տեղեկություններով՝ Սերգեյ Միքայելյանի դեմ կատարած մահափորձի կապակցությամբ կասկածվում է Դիլիջանի զինվորական կոմիսար, փոխգնդապետ Հովհաննես Հակոբյանի որդին: Վերջինիս գտնվելու վայրը ներկայումս հայտնի չէ: Ըստ ամենայնի, նա գտնվում է փախուստի մեջ: Քննությունը դեռ պետք է պարզի Սերգեյ Միքայելյանի եւ զինկոմի որդու ինքնաձիգների ծագումը, նաեւ այն, թե դրանք ինչպես են հայտնվել նշված անձանց մոտ:
Հավելենք, որ փոխգնդապետ Հովհաննես Հակոբյանի մյուս որդին՝ ավագ լեյտենանտ, 1990թ. ծնված Մհեր Հակոբյանը 2014թ. սեպտեմբերի 14-ի առավոտյան Լեռնային Ղարաբաղի մարտական հենակետերից մեկում զոհվել էր ադրբեջանական զինուժի արձակած կրակոցից: Այդ ժամանակ Հովհաննես Հակոբյանը Դիլիջանում տեղակայված զորամասի հրամանատարի՝ անձնակազմի հետ տարվող աշխատանքների գծով տեղակալն էր եւ մոտ 10 օր առաջ էր ազատվել այդ գործից:

ՈՍԿԱՆ ՍԱՐԳՍՅԱՆ
Տավուշ