ԱՄՆ Կոնգրեսի Հայաստանի աջակցության խմբի համանախագահներ Ֆրենկ Փալոնեն (դեմոկրատ) և Ռոբերտ Դոլդը (հանրապետական) ԱՄՆ Կոնգրեսի անդամներին ուղղված նամակում կոչ են արել աջակցել Հայաստանին և Լեռնային Ղարաբաղին 2017թ. ֆինանսական տարում օգնության ավելացմանն ուղղված իրենց ջանքերին։ Ինչպես հաղորդում է «Արմենպրես»-ը, կոնգրեսականներին ուղղված նամակում նրանք առաջարկում են աջակցել ՀՀ-ին և ԼՂՀ-ին տրամադրվող արտաքին օգնության 7 առաջնահերթ ուղղությունների:
Մասնավորապես, առաջարկվում է առնվազն 5 մլն դոլար հատկացնել Լեռնային Ղարաբաղում հումանիտար և կայուն զարգացման ծրագրերի համար, իսկ առնվազն 40 մլն դոլար՝ Հայաստանի տնտեսական օգնության համար (ներառյալ Տնտեսական աջակցության հիմնադրամի, թմրամիջոցների շրջանառության դեմ միջազգային պայքարի և առողջապահության միջազգային ծրագրերի շրջանակներում): Այնուհետև առաջարկվում է կասեցնել Ադրբեջանին ռազմական օգնության տրամադրումը, քանի դեռ վերջինս չի դադարեցրել սահմանային հարձակումները, պատերազմի սպառնալիքներ հնչեցնելը և չի համաձայնել հակամարտության խաղաղ կարգավորման սկզբունքների պահպանմանը:
Առաջարկվում է նաև աջակցություն տրամադրել Սիրայում բնակվող հայերին, ինչպես նաև Հայաստանին՝ ՀՀ տեղափոխված սիրիահայ փախստականների օգնության համար, Վրաստանին տրամադրվող օգնության 10 տոկոսը հատկացնել ՍամցխեՋավախքի տարածաշրջանում կայուն աշխատատեղերի ստեղծման նպատակին, ինչպես նաև սահմանափակել Ադրբեջանին ամերիկյան աջակցության սահմանափակման 907րդ բանաձևի կասեցման հարցում ԱՄՆ նախագահի իրավասությունը: Ընդգծվում է նաև Մինսկի խմբի շրջանակներում Լեռնային Ղարաբաղի Հանրապետության՝ որպես բանակցող կողմի վերականգնման կարևորությունը, հաղորդել է ԱՄՆ Հայ դատի հանձնախումբը:
.gif)
