Օրեր առաջ Ազգային ժողովի սոցիալական հարցերի և առողջապահության, մանկության և մայրության հարցերի մշտական հանձնաժողովների կողմից անցկացված «Հայաստանի Հանրապետության ժողովրդագրական իրավիճակի բարելավման 2015-2017 թվականների ազգային ծրագրի» քննարկումը մեծ հետաքրքրություն էր առաջացրել հատկապես երիտասարդ, նորաստեղծ ընտանիքների շրջանում: Բանն այն է, որ նոր ծրագրի ներդրմամբ երիտասարդ ընտանիքները հնարավորություն կունենան առանց կանխավճարի հիփոթեքով բնակարան ձեռք բերել:
Armlur.am-ը հրապարակված նախագծից տեղեկանում է, որ նման ծրագրի ներդրման համար հիմք են հանդիսացել ամուսնությունների ոչ բավարար մակարդակը, ինչպես նաև այն հանգամանքը, որ նյութական և բնակարանային պայմանները դառնում են ամուսնության ժամկետի հետաձգման, դրանից հրաժարման և ամուսնալուծության պատճառ:
Համաձայն ՀՀ կառավարության 2010 թվականի հունվարի 29-ի N 98-Ն որոշմամբ հաստատված «Երիտասարդ ընտանիքին` մատչելի բնակարան» պետական նպատակային ծրագրի, հիփոթեքային վարկը տրամադրվում է առնվազն 10 տարի մարման ժամկետով, 10.5-11 տոկոսով, որից 2 տոկոսը սուբսիդավորում է պետությունը (այսինքն` վարկառուի համար վարկի տոկոսը կազմում է 8,5-9 տոկոս, իսկ Հայաստանի Հանրապետության մարզերում տրամադրված հիփոթեքային վարկերի համար պետությունը սուբսիդավորում է 4 տոկոսը (այսինքն` Հայաստանի Հանրապետության մարզերում վարկառուի համար վարկի տոկոսը կլինի 5-7 տոկոս): Ըստ էության, վերոնշյալ նպատակային ծրագիրը հասանելի չէ երիտասարդության լայն շերտերին, որի պատճառներից են նրա չափորոշիչները, հատկապես կանխավճարի չափը:
Պետական նպատակային ծրագրում ավելի մեծ թվով երիտասարդ ընտանիքների ներգրավումն իրականացվելու է երիտասարդ ընտանիքի կողմից վարկ ստանալու համար անհրաժեշտ և բնակարանի առավելագույն արժեքի` 10-30 տոկոսը կազմող կանխավճարը ոչ որպես պարտադիր պայման դիտարկելու ճանապարհով: Այսպես, բնակարանի առավելագույն արժեքը կազմում է 16 մլն. դրամ, որից երիտասարդ ընտանիքը պարտավոր է վճարել 10-30 տոկոսը, այսինքն 1,6 – 4,8 մլն. դրամ: Կանխավճարը պետական նպատակային ծրագրին մասնակցելու համար անհրաժեշտ պայման չդիտարկելը էապես կմեծացնի դրանց մասնակցել ցանկացող ընտանիքների թվաքանակը:
Բնակարանով ապահովման ծրագրով ձեռք բերվող բնակարանի առավելագույն արժեքը կազմում է 10 մլն. դրամ: Բնակարանի կարիք ունեցող անձանց, ձեռք բերվող բնակարանների և դրանց գտնվելու վայրերի որոշարկման չափանիշները սահմանում է Հայաստանի Հանրապետության կառավարությունը` առաջնահերթությունը տալով`
երեխաներ ունեցող ընտանիքներին,
զոհված (մահացած) և հաշմանդամ դարձած զինծառայողների (ազատամարտիկների) ընտանիքներին (ՀՀ կառավարության 2005 թվականի հունիսի 9-ի N 947-Ն որոշմամբ սահմանված կարգով հաշվառված և բնակարանային պայմանների բարելավման նպատակով անհատույց պետական ֆինանսական աջակցություն չստացած),
նոր կառուցված բնակարաններին,
սահմանամերձ և բարձրլեռնային բնակավայրերին:
Պետական նպատակային ծրագրում ավելի մեծ թվով երիտասարդ ընտանիքների ընդգրկումից բացի, կարևորվում է նաև արդեն շահառու դարձած երիտասարդ ընտանիքների վերարտադրողական նպատակադրումների խրախուսումը: Ուստի, պետական նպատակային ծրագրի ժողովրդագրական ազդեցության հետագա մեծացման նպատակով շահառու դարձած երիտասարդ ընտանիքին երրորդ կամ հաջորդ երեխայի ծննդյան դեպքում աջակցել բնակարանային վարկի մայր գումարի և տոկոսադրույքների մարման համար` յուրաքանչյուր ընտանիքի մեկ անգամ, 1 մլն. դրամի չափով:
.gif)
