Այսօր Երևանում Ռուսաստանի դեսպանատան մոտ մի խումբ քաղաքացիներ բողոքի ակցիա էին կազմակերպել՝ պահանջելով ազատ արձակել ուկրաինացի օդաչու Նադեժդա Սավչենկոյին, հայտնում է «Ազատությունը»:
Շուրջ երկու տասնյակի հասնող ոստիկաններն ու անվտանգության աշխատակիցները լուռ հետևում էին:
Ուկրաինուհու լուսանկարով պաստառը բռնած, որի վրա գրված էր՝ «Ձեր և մեր ազատության համար», ակցիային մասնակցում էր նաև կինոռեժիսոր Տիգրան Խզմալյանը:
«Ամբողջ աշխարհի աչքի առաջ խիզախ կին, հայրենասեր, ազատամարտիկ, Ուկրաինայի սպա Նադյա Սավչենկոն դատվում է խայտառակ պայմաններում, անհեթեթ մեղադրանքներով: Ես կարծում եմ, որ ցանկացած երկրի, ցանկացած ազգի ազգային-ազատագրական պայքարի մասնակիցները պետք է գիտակցեն համերաշխության կարևորությունը»,- մեկնաբանեց կինոռեժիսորը:
Նադեժդա Սավչենկոն ռուսաստանյան բանտում է 2014թ․-ից: Նրան մեղադրում են Ուկրաինայում իրենց մասնագիտական պարտքը կատարող ռուսաստանցի երկու լրագրողի սպանության մեջ: Սավչենկոն հերքում է մեղադրանքը՝ հայտարարելով, որ իրեն Ուկրաինայում առևանգել և Ռուսաստան են տեղափոխել ռուսաստանյան հատուկ ծառայությունները:
Դատաքննության ժամանակ մեղադրողը պահանջել է Սավչենկոյին դատապարտել 23 տարվա ազատազրկման: Մարտի 3-ից ուկրաինուհին չոր հացադուլ է հայտարարել: Եվրամիությունը, ինչպես նաև քսան երկրներից ավելի քան 270 հայտնի հասարակական-քաղաքական, մշակութային գործիչներ պահանջել են ազատ արձակել Սավչենկոյին:
«Իրազեկ քաղաքացիների միավորման» ներկայացուցիչ Դանիել Իոաննիսյանի խոսքով, առևանգելով Սավչենկոյին՝ Ռուսաստանի իշխանությունները, փաստորեն, նրան պատանդ են վերցրել:
«Սա ուղղակի մի ապաիրավական պրոցես է, որը ավելի շատ վենդետայի է նման»,- ասում է Իոաննիսյանը: Ռուսաստանի դեսպանատնից չարձագանքեցին ակցիային:
.gif)
