Երեկ ՀՀԿ առաջնորդ Սերժ Սարգսյանը Ռոբերտ Նազարյանին վերանշանակել է ՀՀ հանրային ծառայությունները կարգավորող հանձնաժողովի նախագահ հինգ տարի պաշտոնավարման ժամկետով: Այս առիթով «Ժողովուրդ»-ը մի քանի հարցեր ուղղեց Ռոբերտ Նազարյանին:
-Պարո՛ն Նազարյան, Երեւանի քաղաքապետի պաշտոնից հետո՝ 2003թ.-ին, Ձեզ նշանակեցին ՀՀ հանրային ծառայությունները կարգավորող հանձնաժողովի նախագահ, որտեղ աշխատանքը բոլորովին այլ բնույթի է: Ձեզ համար դժվա՞ր չէր այդպիսի կտրուկ փոփոխությունը:
-Նախ՝ քաղաքապետ աշխատելու ժամանակ ես համակարգել եմ բոլոր ոլորտները, ընդ որում՝ նաեւ կոմունալ ոլորտը, Երեւան քաղաքի հետ կապված ջրամատակարարման եւ այլն, եւ այլն, մինչ այդ էլ աշխատել եմ քաղսովետի նախագահի տեղակալ՝ 4 տարի շարունակ, ու ղեկավարել եմ կոմունալ ոլորտը: Այնուհետեւ երեք տարի աշխատել եմ էներգետիկայի փոխնախարար, եղել եմ ՀՀ էլեկտրացանցերի պետ, ես ոլորտի մեջ միշտ էլ աշխատել եմ: Իսկ քաղաքապետի դեպքում բոլոր հոգսերն էլ ինձ վրա էին:
-Դուք արդեն երրորդ անգամ վերանշանակվել եք նույն պաշտոնում՝ տասնամյա պաշտոնավարումից հետո պատրաստվելով եւս հինգ տարով պաշտոնավարել: Մի առիթով ՀՀ ոստիկանապետ Վլադիմիր Գասպարյանը նկատել էր, որ եթե պաշտոնյան երկար ժամանակ մնում է նույն «աթոռին», դառնում է անշարժ գույք: Համամի՞տ չեք այդ բնորոշմանը:
-Ես կփորձեմ Ձեզ պատասխանել հետեւյալ կերպ. արդյոք Գրիգոր Հասրաթյանը, որը 13 տարի աշխատել է Երեւանի քաղաքապետ, որն այսօր քաղաքացիների կողմից գնահատվում է որպես լավագույն քաղաքապետ, անշարժ գույք էր: Յուրաքանչյուր մարդ ունի իր կարծիքը, ես այս տարիներին ղեկավարել եմ ու ստեղծել մի կառույց, որտեղ հանրային կարծիքն է կարեւորվում: Սա մի ստեղծագործ կառույց է:
-Դուք գո՞հ եք Ձեր կատարած աշխատանքից, արդյո՞ք կարողացել եք այս 10 տարիների ընթացքում կառույցն իսկապես ղեկավարել այնպես, որ այն ծառայի իր բուն նպատակին:
-Ես մի անգամ մի առիթով ասել եմ, որ կցանկանայի, որպեսզի այս տարիների ընթացքում այնպիսի ջանքեր գործադրենք, որ հանրությունը ճանաչի այս կառույցը, ու իսկապես այս կառույցը կարողանա արտահայտել հանրության շահերը: Որ հանրությունը հավատա ու վստահի այս կառույցին, դա կլինի իմ ամենամեծ ցանկությունը, ու ես շարունակում եմ այդ կարգախոսով առաջնորդվել, որպեսզի հանրությունը լավագույնս ճանաչի մեզ ու վստահի:
-Բայց արդյո՞ք Դուք այսօր հասել եք դրան, հանրությունը վստահո՞ւմ է Ձեզ:
-Ես ուզում էի նշել նաեւ դա ու կանխել Ձեր հետագա հարցը, բայց սիրով կպատասխանեմ, որ մեր առաքելությունն այն է, որ մենք կարողանանք պաշտպանել հանրության շահերը: Եվ չի եղել այնպես, որ մենք մի որոշում կայացնենք, որ երկու կողմին էլ բավարարի, միշտ էլ երկու կողմն էլ դժգոհ են: Բայց մենք աշխատում ենք ի շահ հանրության: Ինչ վերաբերում է հանրության կարծիքին, ապա մենք շատ ազատ ու թափանցիկ կառույց ենք, մեր նիստերը բաց են, ու բոլորը կարող են գալ ու մասնակցել, մեր որոշումներն ու բոլոր տեղեկությունները տեղադրվում են մեր պաշտոնական կայքում: Երբ մենք հայտ ենք ստանում, ամբողջությամբ տեղադրում ենք մեր ինտերնետային կայքում, հրապարակային հայտարարում ենք, թե ինչ գործընթաց է սկսվել: Մեզ մոտ մշտապես լսումներ են կազմակերպվում, որոնց բոլորն էլ կարող են մասնակցել:
-Բայց պարո՛ն Նազարյան, համաձայնե՛ք, որ Ձեր ղեկավարած հանձնաժողովը մշտապես բավարարում է հայտատու կազմակերպությունների պահանջները, մինչդեռ դժվար է հիշել որեւէ դեպք, երբ հօգուտ ժողովրդի որոշում կայացրած լինեք: Ամենաարդիական ու թարմ օրինակը` գազի եւ էլեկտրաէներգիայի սակագների թանկացման հարցը, որը եւս լուծվեց ոչ հօգուտ ժողովրդի…
-Լավ, եթե այդպես է, այդ դեպքում եկե՛ք ավելի թվային լեզվով խոսենք. «Հայռուսգազարդ»-ը հայտ էր ներկայացրել, այլ բան էր ուզում, բայց մենք այլ բան ենք սահմանել, բա այդ դեպքում ինչպե՞ս եղավ, որ բոլոր որոշումները հօգուտ իրենց է եւ ոչ թե հասարակության: Եթե ցանկանում եք, եկե՛ք, մասնակցե՛ք մեր նիստերին ու ասե՛ք, թե մեր կառույցը էլ ինչ պետք է անի, որ չի անում: Ես միայն ուրախ կլինեմ, եթե նման հարցերով մեզ օգնեք: Ես որեւէ մարմնից կախում չունեմ:
-Գազի, էլեկտրաէներգիայի թանկացումը էլ ավելի կնպաստի արտագաղթի աճին: Երբեւէ մտածե՞լ եք, թե ինչպես կարելի է կանխել մարդկանց արտահոսքը:
-Ուրեմն գազի եւ հոսանքի թանկացման դեմ միշտ հակաթույն կա, դա սոցիալական խնդիր է, կառավարությունը պարտավոր է, եւ համոզված եմ, որ կանի իր խոստումները, դա երեւում է: Բայց, իմ կարծիքով, արտագաղթի պատճառը միայն դա չէ, պատճառը բոլորս ենք:
.gif)
