Այսօրվա տեղեկատվական դաշտում հեռուստատեսությունը, ռադիոն, ամսագրերը, լրատվական կայքերը, ինչպես նաեւ քաղաքի խաչմերուկներում տեղադրված գովազդային վահանակները շարունակում են գովազդել վիճակախաղեր, ծխախոտ եւ ալկոհոլ՝ այսպես Հայաստանի քաղաքացիներին դրդելով խաղամոլության եւ վնասակար սովորույթների: Եւ որքան էլ ցավալի է, այս ամենի վրա պետական համարժեք վերահսկողություն չի սահմանվում, ինչի արդյունքում վիճակախաղերն այսօր դարձել են սոցիալական չարիք:
Գաղտնիք չէ, որ Հայաստանի տնտեսության ներկայիս վիճակում խիստ որոշակի ուղղվածության բիզնեսներն են զարգանում, մասնավորապես՝ շահումով խաղերը վիճակախաղերը, լոտոները, առեւտրային բանկերը, վարկային կազմակերպությունները եւ ընդերքի հաշվին զարգացող հանքարդյունաբերությունը: Այս իրավիճակի պատճառն այն է, որ պաշտոնապես խրախուսվում է խաղամոլությունը, հեռուստաեթերից անընդմեջ պրոպագանդվում է լոտոն որպես բարեկեցության հասնելու միակ եղանակ, ինչն էլ, բնականաբար, գայթակղում է աղքատության մեջ գոյատեւող եւ բարեկեցիկ ապագայի այլ հույսեր չունեցող հազարավոր քաղաքացիների:
«Ժողովուրդ»-ին հայտնի դարձավ, որ այս տարվա փետրվարի 16-ին վիճակախաղերի, շահումով խաղերի, խաղատների եւ ինկասացիոն ծառայությունների մատուցման լիցենզավորող հանձնաժողովը համաձայնություն է տվել «Ինտեր Լոտո» ՍՊԸ կողմից ներկայացված «Լոտո Սմայլիկ» վիճակախաղի կազմակերպման եւ անցկացման կանոնակարգի փոփոխությանը: Այսինքն՝ վերոնշյալ ընկերությունը շուտով նոր՝ «Լոտո Սմայլիկ» լոտոն է կազմակերպելու:
Նկատենք, որ այս ընթացքում նաեւ «Վիվարո» բուքմեյքերական ընկերություններն են ակտիվացել, որոնց կանդրառնանք մեր առաջիկա հրապարակումներում: Իսկ այս անգամ խոսենք լոտոների մասին: Օրինակ՝ «Շահող», «Փող», «Տոնական», «Ավտո լոտո», «Զառ», «Մանի» եւ այլն: Ահա այսպիսի գայթակղիչ անուններ ունեն լոտոները: Հիշեցնենք, որ տարիներ առաջ մարդկանց նույնիսկ աշխատավարձ էին խոստանում լոտոն շահելու դեպքում: Իսկ «շահողները» հեռուստաեթերից հպարտությամբ հայտարարում էին, թե իրենք ստացել են լոտոյով 6 կամ 9 ամսվա աշխատավարձ ստանալու իրավունք՝ առանց մտածելու, որ աշխատավարձը լինում է աշխատանքի դիմաց, այլ ոչ թե շահումի:
«Ժողովուրդ»-ը պարզեց, որ ՀՀ-ում գործող բոլոր տեսակի վիճակախաղերը կազմակերպվում են «Ինտեր լոտո» ՍՊԸ-ի կողմից: Իսկ թե ինչպես է ստացվում, որ այս դաշտում նախկինում գործող վիճակախաղերը մեկը մյուսի հետեւից հեռանում են, իսկ սա դեռ շարունակում է մնալ, կարելի է միայն ենթադրել: Ըստ ամենայնի, այս ընկերությունն ունի շատ լուրջ հովանավոր: «Ժողովուրդ»-ը պետական ռեգիստրից տեղեկացավ, որ «Ինտեր լոտո» ընկերության հիմնադիրն է Լենդրուշ Վարդանյանը: Նրան է պատկանում նաեւ Արագածոտնի մարզում գործող «Արմենիա Վայն» գինու արտադրությամբ զբաղվող ընկերությունը: Իհարկե, այս անուն, ազգանունը հանրությանը ոչինչ չի ասում: Բայց մենք կարողացանք պարզել, որ վերոնշյալ վիճակախաղերը իրականացնող «Ինտեր լոտո»-ն կապվում է մասնավորապես ՀՀ կրթության եւ գիտության նորանշանակ նախարար Լեւոն Մկրտչյանի եղբոր՝ Վահագն Մկրտչյանի անվան հետ: Նշված անձանց անվան հետ է կապվում նաեւ հատուկ համբավով հայտնի «Վալեմ պլազա» ռեստորանահյուրանոցային համալիրը:
Խնդրի առնչությամբ «Ժողովուրդ»-ը կապ հաստատեց «Ինտեր լոտո» ընկերության հետ, սակայն ընկերության աշխատակիցը, ով ներկայացավ Նոնա, փոխանցեց, որ ընկերության տնօրենի օգնականը կզանգահարի: Սակայն այդպես էլ մենք չստացանք «Ինտեր լոտո»-ի տնօրենի օգնականի զանգը: Փորձեցինք պարզել, թե որքանով է կապված ՀՀ ԿԳ նախարար Լեւոն Մկրտչյանի անունն այս ընկերության հետ: Հարցին ի պատասխան՝ նորանշանակ նախարարի նույնքան նորանշանակ մամլո խոսնակ Լուսինե Մարգարյանը փոխանցեց. «Կրթության եւ գիտության նախարարը ոչ մի առնչություն չունի այդ ընկերության եւ բիզնեսի հետ: Իսկ Վահագն Մկրտչյանը, ինչպես գիտեք, հատնի գործարար է, բայց նախարարը ոչ մի կապ չունի նրա բիզնեսների հետ»:
Այսքանից հետո դժվար չէ հասկանալ, թե ինչու է զարգանում բիզնեսի այս տեսակը: Ցավոք, մեր քաղաքացիներն էլ հեշտորեն տրվում են` իրենց կենսամակարդակի բարելավումը կապելով ոչ թե աշխատանքի, կոնկրետ քայլերի, այլ ինչ-որ թղթի կտորների` լոտոների հետ: Իսկ, առհասարակ, խաղամոլությունը մարդկանց երբեմն հասցնում է անգամ ինքնասպանության, շատերն էլ կորցնում են իրենց ունեցվածքը, անգամ տունը եւ ընկնում վարկերի տակ: Սակայն պետությունը, փոխանակ սահմանափակելու նմանօրինակ վիճակախաղերի եւ գումարի վրա այլ խաղերի գովազդումն ու տարածումը` դաշտը ազատականացրել է եւ պարարտ հող ստեղծել տարատեսակ բարձր տանիքներ ունեցող ընկերությունների բարգավաճման համար:
Մինչդեռ խաղամոլությունից ոչ միայն հասարակությունն է տուժում, այլեւ պետությունը, քանի որ ավելանում է ունեզրկված քաղաքացիների թիվը, որոնց մասին պետությունն ինքն է պարտավոր հոգ տանել: Մյուս կողմից էլ, ի դեմս խաղամոլ երիտասարդության, խեղված հոգեբանությամբ սերունդ է մեծանում, ինչն արդեն լուրջ վտանգ է մեր պետականության համար:
ՍՅՈՒՆԷ ՀԱՄԲԱՐՁՈՒՄՅԱՆ
ՍՊԱՆՈՒՄ ԵՆ ԽԱՂԱՂ ԲՆԱԿԻՉՆԵՐԻ
Սիրիայի նախագահ Բաշար Ասադի եւ ՌԴ նախագահ Վլադիմիր Պուտինի զորքերը Սիրիայում պարբերաբար ռմբակոծում են հիվանդանոցներն ու քաղաքացիական ենթակառուցվածքները՝ սպանելով խաղաղ բնակիչների: Այս մասին հայտարարել է Amnesty International իրավապաշտպան կազմակերպության ճգնաժամային իրավիճակների կարգավորման հարցով տնօրեն Տիրանա Հասանը: Նրա խոսքով՝ ընդդիմության կողմից վերահսկվող Հալեպ քաղաքում հարվածների գլխավոր թիրախը հենց բուժհաստատություններն են եղել: «Դա ռազմավարության մի մասն է, որը մշակվել է Մոսկվայի եւ Դամասկոսի կողմից»: Սիրիացի իրավապաշտպանների տվյալների համաձայն՝ 2015թ. սեպտեմբերից, երբ Ռուսաստանը սկսեց իր ռազմական օպերացիան Սիրիայում, ռուսական եւ սիրիական ուժերի ռմբակոծությունների տակ հայտնվեցին առնվազն 27 հիվանդանոց: Իրավապաշտպանները հայտնում են նաեւ ռուսական ավիահարվածների հետեւանքով ավելի քան 1700 քաղաքացու, այդ թվում 429 երեխայի մահվան մասին:
.gif)
