Թեեւ հոկտեմբերին Ադրբեջանում կայանալիք նախագահական ընտրությունների արդյունքների հետ կապված անակնկալները գրեթե բացառվում են, քանի որ, ինչպես հայտնի է, այդ երկրի Սահմանադրության մեջ արված փոփոխությամբ Իլհամ Ալիեւն ամրագրել է արդեն երրորդ անգամ առաջադրվելու իր իրավունքը, այդուհանդերձ, հայտնի գրող, կինոսցենարիստ Ռուստամ Իբրահիմբեկովի հայտնությունը որպես նախագահի թեկնածու, ոմանց մոտ սպասելիքներ առաջացրեց նախագահական ընտրություններից: Նախօրեին էլ հայտնի դարձավ, որ Իբրահիմբեկովին առաջադրելու է նորաստեղծ ժողովրդավարական ուժերի ազգային խորհուրդը, որում ընդգրկված են Ադրբեջանի գրեթե բոլոր ընդդիմադիր կուսակցությունները: Այսինքն` Ռուստամ Իբրահիմբեկովը առաջադրվելու է որպես Ադրբեջանի ընդդիմության միասնական թեկնածու:
Նա, ինչպես հայտնի է, վերջին տարիներին հրապարակավ սուր քննադատության էր ենթարկում ալիեւյան կլանին, ինչի արդյունքում էլ մոտ երկու տարի առաջ ստիպված եղավ հեռանալ Ադրբեջանից եւ բնակություն հաստատել Ռուսաստանում: Ուշագրավ է, որ իբրեւ Իբրահիմբեկովի նախընտրական կամպանիայի հովանավորներ՝ նշվում են անցած տարի սեպտեմբերին հիմնադրված Ռուսաստանի ադրբեջանական կազմակերպությունների միության կամ ինչպես այն կոչում են` «Ադրբեջանի միլիարդատերերի ակումբի» առանցքային դեմքերի անունները, այդ թվում եւ` Իլհամ Ալիեւի խնամի Արազ Աղալարովի, որի հետ Ալիեւները, բացի խնամիական կապերից, նաեւ հսկայական համատեղ բիզնես ունեն: Ինչեւէ, անկախ այն բանից՝ կկարողանա Իբրահիմբեկովը հաջողության հասնել նախագահական մրցապայքարում, թե ոչ, արդեն իսկ այն փաստը, որ Ադրբեջանի ընդդիմությունը միավորվել է եւ որպես թեկնածու է ընտրել հայտնի մտավորականի, բավականին դրական տպավորություն է ձեւավորում: Իսկ օրինակ Հայաստանում վերջին նախագահական ընտրություններից առաջ, չնայած մի քանի ուղղություններով ընթացող «քաղաքական կոնսուլտացիաներին», այդպես էլ չհաջողվեց ընդդիմության միասնական թեկնածու ընտրել անգամ որեւէ կարկառուն քաղաքական գործչի, էլ ուր մնաց` որեւէ մտավորականի: Առհասարակ, այն երեւույթը, որ օլիգարխը պատրաստ է իր փողերը ներդնել մտավորական մարդու քաղաքական պայքարի համար, անկախ ամեն ինչից, քաղաքական առավել կայացած մշակույթի մասին է խոսում: Մինչդեռ մեզանում, ինչպես հիշում ենք, օլիգարխ քաղաքական գործիչները պատրաստ են փող ներդնել բացառապես սեփական թեկնածության քարոզչության համար: Եվ այն, որ օրինակ ադրբեջանցի մեծահարուստը պատրաստ է, թեկուզ ֆորմալ առումով, որպես նախագահի պոտենցիալ թեկնածու տեսնել հայտնի մտավորականի եւ ոչ թե հենց իրեն, խոսում է առողջ մտածողություն ունեցող ադրբեջանական օլիգարխիայի առկայության մասին:
Հ.Գ. Ի դեպ, Ռուստամ Իբրահիմբեկովը տարբեր առիթներով բավականին տոլերանտ հայտարարություններ է արել` կապված հայ-ադրբեջանական հարաբերությունների եւ ղարաբաղյան հակամարտության հետ:
.gif)
