ՀՀ Ազգային ժողովի գյուղատնտեսական և բնապահպանական հարցերի մշտական հանձնաժողովն այսօր կազմակերպել էր խորհրդարանական լսումներ` «Անազատ և կիսաազատ պայմաններում վայրի կենդանիների պահելու օրենսդրական կարգավորումը և առկա թերությունները» թեմայով:
Բնապահպանության նախարար Արամայիս Գրիգորյանը բացման խոսքում ընդգծեց, որ այս բնագավառում օրենսդրական բացեր կան, և այս լսումների կազմակերպման նպատակն էլ առկա խնդիրների վեր հանումն է և ողջամիտ լուծումների գնալը: Իսկ հանձնաժողովի նախագահ Մարտուն Գրիգորյանը նշեց, որ այսօրվա լսումների կազմակերպման պատճառներից մեկն էլ Գյումրիում վերջերս կենդանիների հետ տեղի ունեցած դեպքն էր:
Արդեն լրագրողների հետ զրույցում բնապահպանության նախարարը նշեց, որ հիմնականում լրատվամիջոցներից են տեղեկություններ ստացել կենդանիներին ոչ նորմալ պայմաններում պահելու մասին: Նա հայտարարեց, թե օրենքի առաջ բոլորը լինելու են հավասար և առանձին մոտեցումներ` առանձին մարդկանց մասով չեն իրականացնելու:
Հարցին` տեղյա՞կ եք, որ տարբեր պաշտոնյաներ կենդանիներ են պահում, Գրիգորյանը ընդգծեց, որ բոլորը` անկախ այն բանից` քաղաքական գործիչ են, թե սովորական քաղաքացի, պարտավոր են գործունեությունն իրականացնել օրենքի սահմաններում:
.gif)
