Սամվել Ալեքսանյանը, Հակոբ Հակոբյանը, Սուրեն Բարսեղյանն ու մի խումբ ազատամարտիկներ մեկնեցին Արցախ (տեսանյութ)

Հայ կամավորականների հոսքը դեպի առաջնագիծ շարունակվում է: Քանի դեռ հրադադարը չի կնքվել Հայաստանին ձեռնտու պայմաններով` որեւէ հայ չի կարող տանը հանգիստ նստել: Պաշտպանական գերատեսչության պատասխանատուները, ըստ հերթագրման եւ պահի նպատակահարմարության, արդեն որոշում են, թե ով երբ պետք է շարժվի սահման եւ որ հատվածները պետք է լինեն ուշադրության կենտրոնում:

Ազատամարտիկ,  գնդապետ Սուրեն Բարսեղյանի գլխավորությամբ համախմբված ազատամարտիկներն այսօր վաղ առավոտից խմբվել էին Երեւանի զորամասերից մեկի տարածքում եւ անհրաժեշտ ցուցումներն էին ստանում: Արցախյան ազատամարտի տարիներին իրենց ակտիվ մասնակցությունն ունեցած «Դավիթ Բեկ», «Մալաթիա», «Աջափնյակ», «Սասուն» եւ այլ ջոկատների անդամները մարտական տրամադրությամբ որոշել են շարունակել կիսատ թողած գործը:

Կամավորների թվում են նաև ԱԺ պատգամավոր, գործարար Սամվել Ալեքսանյանը, ԱԺ նախկին պատգամավոր, ընդդիմադիր գործիչ Հակոբ Հակոբյանը, որը արցախյան ազատամարտի ակտիվ ու փորձառու հրամանատար է եղել:

Նկատենք, որ Սամվել Ալեքսանյանը ոչ միայն Մալաթիայի, այլեւ մյուս բոլոր ջոկատների ազատամարտիկների համար անհրաժեշտ սնունդ եւ հիգիենիայի պարագաներ էր բերել` մի քանի ավտոմեքենայով, որ կամավորները ոչնչի կարիք չունենան:

ArmLur.am-ը զրուցեց գործարար պատգամավորի, առաջնագիծ մեկնող կամավորների հետ: Զուցեցինք նաեւ հրամանատար Սուրեն Բարսեղյանի հետ, ով, սակայն  3 բառով ամփոփեց ասելիքը եւ շտապեց դեպի ավտոբուսը:

Այսպիսով, կամավորների այս խումբ էլ առավոտյան մեկնեց Արցախ` հայ զինվորի կողքին կանգնելու, այսպես ասած` դուխ տալու, սատարելու համար: Ի վերջո, հրադադարը դեռ կնքված չէ, եւ թշնամին ամեն րոպե կարող է էլի հարձակվել:

Արփինե Թովմասյան, Նարեկ Սարգսյան