Եթե բանակցային սեղանի շուրջ չկա ԼՂՀ ներկայացուցիչ, ուրեմն չկա ԼՂՀ հարցի կարգավորման բանակցություն. Նիկոլ Փաշինյան

ԱԺ պատգամավոր Նիկոլ Փաշինյանըսոցցանցի իր էջում գրել է.

«ԼՂՀ հարցի կարգավորման որևէ բանակցային պրոցես առանց ԼՂՀ ներկայացուցչի անընդունելի է:

Մեր զինվորներն ու սպաները իրենց կյանքի գնով կասեցրել են մի մեծ դավադրություն ընդդեմ Հայաստանի Հանրապետության և Լեռնային Ղարաբաղի Հանրապետության:

Մեր բանակի սխրանքը դիվանագիտական ճակատում չպետք է տանուլ տրվի. Հայաստանի ներկայացուցիչը չպետք է նստի ԼՂՀ հարցի կարգավորման որևէ բանակցային սեղանի շուրջ, որտեղ ներկա չէ ԼՂՀ պաշտոնական ներկայացուցիչը:

Ալիևը երկար ժամանակ լկտիորեն բոյկոտում էր բանակցային պրոցեսը ու նաև դրա արդյունքում ստացավ հարձակման «դաբրո»: Բանակցային խնդրարկուի կարգավիճակը մեզ կբերի նոր «4-օրյա» կամ գուցե ավելի երկարատև պատերազմի:

Ազգային մեր համախմբումը պետք է ծառայեցվի կոնկրետ բանաձևի կենսագործման. եթե բանակցային սեղանի շուրջ չկա ԼՂՀ ներկայացուցիչ, ուրեմն չկա ԼՂՀ հարցի կարգավորման բանակցություն:

Եթե բանակցություն, ուրեմն այն պետք է լինի իրոք բանակցություն:

Եթե ոչ՝ à la guerre comme à la guerre (պատերազմում՝ ինչպես պատերազմում):