Ապրիլի 16-ին ՀՀ Ազգային ժողովի պաշտպանության, ազգային անվտանգության եւ ներքին գործերի մշտական հանձնաժողովի նախագահ Կորյուն Նահապետյանի ուղեկցությամբ Հայոց ցեղասպանության հուշահամալիր են այցելել ՌԴ Դաշնային ժողովի Դաշնության խորհրդի պաշտպանության եւ անվտանգության կոմիտեի պատգամավորները:
Խորհրդարանականները ծաղիկներ են դրել Հայոց ցեղասպանության զոհերի հիշատակը հավերժացնող հուշարձանին եւ խոնարհումով ու մեկ րոպե լռությամբ հարգել մեկուկես միլիոն նահատակների հիշատակը:
Խորհրդարանական պատվիրակությունը եղել է նաեւ Հայոց ցեղասպանության թանգարան-ինստիտուտում, ծանոթացել 1915 թվականին կատարված ոճրագործության մասին պատմող փաստավավերագրական նյութերին:
Թանգարան այցելելուց հետո ՌԴ ԴԺ ԴԽ պաշտպանության եւ անվտանգության կոմիտեի նախագահի առաջին տեղակալ Ալեքսանդր Չեկալինը գրառում է կատարել պատվավոր հյուրերի հուշամատյանում:
Լրագրողների հետ զրույցում Ալեքսանդր Չեկալինը նշել է. «Այն, ինչ տեսա ու լսեցի Հայոց ցեղասպանության թանգարան-ինստիտուտում, ինձ ցնցեց: Կատարված դաժանությունը որեւէ կերպ չի տեղավորվում մարդկային գիտակցության մեջ: Անհավատալի է, որ նման ոճրագործությունը տեղի է ունեցել ոչ վաղ անցյալում: Որքան շատ պատվիրակություններ ու քաղաքական գործիչներ լինեն այս թանգարանում, այնքան ապագայում չեն կրկնվի նման դաժանություներ, եւ չեն լինի խեղված ճակատագրեր»:
.gif)
