ArmLur.am-ն արդեն հայտնել է, որ երեկ երեկոյան Հրազդանում Արամ Դանիելյանի թիմակիցները հարձակվել են Սասուն Միքայելյանի թիմակիցների վրա. նրանց միջև բախումներ են տեղի ունեցել:
ArmLur.am-ը փորձեց մանրամասներ իմանալ ոստիկանությունից, մասնավորապես, ինչ հանգուցալուծում է ունեցել միջադեպը, եղե՞լ են արդյոք բերման ենթարկվածներ:
Մեր հարցին ի պատասխան՝ ոստիկանության լրատվական ծառայությունից հայտնեցին, որ ահազանգով դեպքի վայր մեկնած օպերատիվ խումբը վիճաբանության մասնակիցներին տարել է Ոստիկանության Հրազդանի բաժին: Այստեղ նրանցից որևէ մեկը հաղորդում չի տվել: Նրանք բոլորը բաց են թողնվել:
Լրատվական ծառայությունը հրաժարվեց անուններ հրապարակել՝ պատճառաբանելով, որ բաժին տարվածներից որևէ մեկը դեռ որևէ կարգավիճակ չունի:
Այդուհանդերձ, «Ժողովուրդ» օրաթերթն այսօրվա համարում հայտնել է, որ դեպքից հետո Արամ Դանիելյանը շտապել է ոստիկանության Կոտայքի մարզային վարչություն և այնտեղից դուրս բերել իր եղբորը՝ Արթուրին, եղբորորդուն՝ Արգամին, և ՊԵԿ մաքսանենգության դեմ պայքարի վարչության պետ Սամվել Սանամյանի «նազիր-վեզիր» Սմբատին:
Ավելի վաղ ArmLur.am-ը հայտնել է, որ դեպքը տեղի է ունեցել Սասուն Միքայելյանին պատկանող, սակայն չգործող ռեստորանի մոտ: Այստեղ հավաքույթ էր տեղի ունենում` Միքայելյանի թիմակիցներին շնորհակալություն հայտնելու համար: Ազգային ժողովի պատգամավոր Նիկոլ Փաշինյանը փոխանցել է, որ հավաքույթը սկսվելուց շատ չանցած Դանիելյանի մի խումբ թիմակիցներ երեկույթից փողոց են հրավիրել Միքայելյանի թիմի անդամներից մի քանիսին և տասը մեքենայից կազմված հրոսակախմբով հարձակվել նրանց վրա:
Ի դեպ, միջադեպի վայր էին ժամանել Ոստիկանության Կոտայքի մարզային վարչության աշխատակիցները` մարզային վարչության պետի գլխավորությամբ:
.gif)
