ԼՂՀ առողջապահության նախարարության Հանրապետական բժշկական կենտրոնում բուժվող Ադրբեջանի ապրիլյան նախահարձակ ռազմական գործողությունների ժամանակ վիրավորված հիվանդների վիճակը կայուն է. այժմ նրանք ապաքինման փուլում են:
Այս մասին «Արցախպրես»-ի թղթակցի հետ զրույցում ասել է Հանրապետական բժշկական կենտրոնի հիվանդանոցային բուժօգնության գծով տեղակալ Ալեն Պողոսյանը:
«Այս պահին մեր կենտրոնում բուժում է ստանում 7 վիրավոր, որից 4-ը քաղաքացիական անձ է, 3-ը՝ զինծառայողներ: Ծանր վիճակում գտնվող հիվանդներ չունենք»,-տեղեկացրել է Ա. Պողոսյանը:
Մատաղիսի բնակիչ ԼՂՀ ՊԲ պայմանագրային զինծառայող Կամո Աբրահամյանը մեզ հետ զրույցում հայտնել է, որ ապրիլի 2-ին ինքը բեկորային վնասվածք է ստացել. այժմ իր վիճակը կայուն է:
«Առաջին անգամ 1993 թվականին եմ վիրավորվել և կոնտուզիա ստացել, բայց հաշմանդամության կարգ չունեմ: Այս պատերազմը ոչնչով չի տարբերվում մյուսից. թշնամին նույնն է կատարել մեր հայրենիքի նկատմամբ: Փոխվել են միայն զինատեսակները. այս անգամ ռազմագործողություններում ավելի շատ կիրառվել են ժամանակակից զինատեսակներ՝ հատկապես անօդաչու սարքեր: 18-20 տարեկան մեր առյուծասիրտ տղաներն ունեն անկոտրում և ուժեղ կամք՝ առանց վարանելու ու խուճապի մատնվելու պատրաստ մինչև վերջ պայքարելու»,-ասել է Կ. Աբրահամյանը և ավելացրել, որ ապաքինվելուց հետո ինքն անպայման շարունակելու է ծառայությունը:
Կ. Աբրահամյանի խոսքով՝ իր ընտանիքն այժմ ժամանակավորապես բնակվում է Ստեփանակերտի հյուրանոցներից մեկում, քանի որ ռմբակոծության հետևանքով իրենց տունը ևս վնասվել է:
Մարտակերտի շրջանի Հոռաթաղ գյուղի բնակիչ ՊԲ պայմանագրային զինծառայող Վիլի Ղազարյանը, ով ապրիլի 4-ին բեկորային վնասվածք է ստացել առաջնագծում, նույնպես բուժում է ստանում ՀԲԿ-ում:
«Պատերազմի ժամանակ միայն մի նպատակ ունեի՝ հնարավորիս շատ թշնամի ոչնչացնել: Մենք միասնական, կազմակերպված էինք կռվում ու եթե մեր՝ մեկս մյուսի թիկունքը պահելը չլիներ, զոհեր ավելի շատ կունենայինք: Այս պահին բոլորս էլ ավելի մարտական ենք տրամադրված»,-մասնավորապես ասել է Վ. Ղազարյանը և հավելել, որ վիրավորված ժամանակ իր մարտական ընկերներն են առաջին օգնությունը ցուցաբերել, որից հետո էլ տեղափոխել հիվանդանոց:
«Ես չէի ուզում հեռանալ դիրքերից. խնդրում էի՝ զենք տան, որ շարունակեմ կռվել»,-խոստովանել է Վ. Ղազարյանը:
.gif)
