Լավրովը Երևան բերեց «Մադրիդյան սկզբունքների» արդիականացված տարբերակը. «Կոմերսանտ»

ՌԴ արտգործնախարար Սերգեյ Լավրովը երեկ այցելեց Երևան, որտեղ փորձեց համոզել իր զրուցակիցներին, որ Մոսկվան մտադիր չէ հրաժարվել Հայաստանի հետ ռազմավարական համագործակցությունից՝ չնայած Լեռնային Ղարաբաղի հակամարտությունում «ցուցադրական չեզոքության և Ադրբեջանին ռուսական զենքի վաճառքը շարունակելուն», գրում է ռուսական «Կոմերսանտ» պարբերականը: Ընդ որում, ՌԴ արտգործնախարարը Երևան բերեց միջազգային միջնորդների հետ համաձայնեցված առաջարկներ, որոնք, պարբերականի տվյալների համաձայն, «Մադրիդյան սկզբունքների» արդիականացված տարբերակն են:

Երևանում առավոտը սկսվեց ավանդական պաշտոնական այցերից: Սերգեյ Լավրովն այցելեց Ցեղասպանության զոհերի հիշատակը հավերժացնող «Ծիծեռնակաբերդ»: «Մենք պետք է անենք ամեն ինչ, որպեսզի նման բան այլևս չկրկնվի»,-պատվավոր հյուրերի համար գրքում գրություն է թողել Սերգեյ Լավրովը:

«Լավրովը ծաղիկներ է դրել հուշակոթողին և ապա թանգարանում ոչ միայն համբերությամբ լսել է էքսկուրսավարին, այլև ակտիվորեն հարցեր է տվել, իսկ 2007թ. նույնիսկ թանգարանում եղևնի է տնկել, որը երեկ ջրել է»,-գրում է պարբերականը:

Պարբերականը հիշեցնում է Երևան այցի նախօրեին ՌԴ ԱԳՆ պաշտոնական ներկայացուցիչ Մարիա Զախարովայի մեկնաբանությունն այն հաղորդագրությունների մասին, որ ՌԴ արտգործնախարարը Երևան կտանի ԼՂ հակամարտության կարգավորման հարցով որոշակի պլան: «Սերգեյ Լավրովը երբեք ոչ մի տեղ դատարկ ձեռքով չի գնում»,-ասել էր Զախարովան՝ հավելելով, որ դրանք «որոշակի մշակումներ են, և ոչ թե պլան, ծրագիր կամ փաստաթուղթ»:

Իսկ Սերգեյ Լավրովը, ինչպես գրում է «Կոմերսանտ»-ը, հասկացնել տվեց հետևյալը. «առանցքային խնդիրներից է մնում 1994-1995թթ. հրադադարի շուրջ ձեռք բերված համաձայնագրերի հետևումը»: Նախարարը հիշեցրեց նաև «վստահություն միջոցների, անվտանգության ապահովման և դեպքերի հետաքննության» մասին, որոնք 2011թ. ռուսական միջնորդությամբ համաձայնեցվել էին Հայաստանի և Ադրբեջանի միջև: «Դրանք պետք է կյանքի կոչի ԵԱՀԿ-ն»,-հիշեցրել էր Լավրովը:

Ռուսական պատվիրակությունում «Կոմերսանտ»-ի աղբյուրը նշում է, որ Լավրովի առաջարկները հիմնվում են «Մադրիդյան սկզբունքների» վրա, որոնք առաջարկվել էին 2007թ. ԵԱՀԿ Մինսկի խմբի կողմից:

Միևնույն ժամանակ, չնայած այն բանին, որ կոնֆլիկտի կողմերը մշտապես խոսում են ուժի գործադրումից խուսափելու և բանակցություններին վերադառնալու անհրաժեշտության մասին, նրանց դիրքորոշումները նախկինի պես արմատապես տարբերվում են: Հինգշաբթի օրը Ադրբեջանի ԱԳՆ-ն հասկացնել տվեց, որ կոնֆլիկտը միայն պետք է կարգավորվի՝ հաշվի առնելով Ղարաբաղի պատկանելիությունը Ադրբեջանին: Հայաստանում «Կոմերսանտ»-ի զրուցակիցները պնդում են Լեռնային Ղարաբաղի Հանրապետության անկախության միջազգային ճանաչումը:

ՀՀ արտգործնախարար Էդվարդ Նալբանդյանը երեկ տեղի ունեցած մամուլի ասուլիսի ժամանակ խոսեց «Ադրբեջանի ագրեսիվ գործողությունների և Բաքվի արկածախնդրության մասին», որը լուրջ վնաս հասցրեց բանակցային գործընթացին:

Պարբերականի տվյալներով՝ հատկապես հայկական կողմին զայրացրել է այն, որ զոհվածների մարմինների վրա բռնության հետքեր են հայտնաբերվել: Սերգեյ Լավրովը շարունակում էր պահպանել չեզոքությունը և Բաքվին բացահայտորեն չէր քննադատում: Իսկ ահա Թուրքիայի ղեկավարության վերջին հայտարարությունները քննադատելու հնարավորությունը բաց չթողեց, գրում է պարբերականը: «Դրանք ոչ թե խաղաղության, այլ պատերազմի կոչեր են: Սակայն մենք, ցավոք, արդեն սովոր ենք թուրքական ներկայիս ղեկավարության նման  հայտարարություններին»,-ասել էր Լավրովը:

Թարգմանիչ՝ Քրիստինե Պողոսյան