«ՌԲԿ» Ռուսական ՌԲԿ հեռուստաալիքը բացահայտել է, որ «Տաշիր գրուպի» սեփականատեր հայազգի գործարար Սամվել Կարապետյանի հետ կապ ունեցող ընկերությունները 2015թ. պետական պատվերներից ստացել են ավելի քան 52 մլրդ ռուբլի: Ինչպե՞ս է նրանց հաջողվում պայմանագրեր կնքել նախագահի վարչակազմի, Դաշնային ծառայության պահպանության և «Գազպրոմ»-ի հետ, գրում է «ՌԲԿ»-ն:
«Տաշիր գրուպի» մոսկովյան գրասենյակը գտնվում է Կարապետյանին պատկանող «Նեպման կլուբ» բիզնես կենտրոնի մոտ, Պոդկոլոկոլնի նրբանցքում: Բիզնես կենտրոնի առաջին հարկում Forbest ռեստորան և կարաոկեն է, որի առաջին 6 տառերը համընկնում են Forbes ամսագրի լոգոյին: Դատելով անվանումից՝ իր հաջողությունը Կարապետյանը նախազգում էր. այն բացվել է 2008թ.՝ 2 տարի առաջ այն բանից հետո, երբ Forbes-ն ընդգրկեց նրան ամենահարուստ ռուսների ցուցակում: «ՌԲԿ»-ն նշում է, որ իր թղթակիցներին գործարարն ընդունել է «Նեպման կլուբ»-ի մեծ աշխատասենյակում, որի պատերին երևանյան բնապատկերներ են, պատուհանից՝ տեսարան է բացվում դեպի Մոսկվայի կենտրոն:
«Տաշիր»-ը, ինչպես գրում է լրատվամիջոցը, կոմերցիոն անշարժ գույքի շուկայում ամենախոշոր խաղացողներից է, սակայն վերջին երկու տարում Կարապետյանին եկամուտների էական մաս է բերում պետության, այդ թվում մայրաքաղաքային իշխանությունների հետ աշխատանքը: «ՌԲԿ»-ի հաշվարկների համաձայն՝ 2014թ. «Տաշիր»-ի հետ կապ ունեցող կառույցները պետական ընկերություններից և գերատեսչություններից մոտ 116,2 մլրդ ռուբլիի պատվերներ են ստացել, որոնցից մոտ 52,9 մլրդ ռուբլին՝ 2015թ.: Նման պորտֆելով, գրում է հեռուստաալիքը, Կարապետյանը կարող էր հայտնվել մեկ այլ վարկանիշային աղյուսակում՝ «Պետական պատվերների արքա 2016»:
Այժմ այդ տեղը զբաղեցնում է «Գազպրոմի» համար խողովակ արտադրող «Խողովակների ինովացիոն տեխնոլոգիաներ» ընկերության սեփականատեր Իվան Շաբալովը (պետական պատվերները գնահատվում են 38,1 մլրդ ռուբլի): Շաբալովից և Կարապետյանից առաջ է անցնում Crocus Group-ի հիմնադիր Արաս Աղալարովը (69,3 մլրդ ռուբլի):
.gif)
