Երևանի քաղաքապետ Տարոն Մարգարյանն այցելել է Գլխավոր պողոտայի «Վերնիսաժ» հատված և ծանոթացել տարածքի վերակառուցման, արդիականացման, կանոնակարգման ու բարեկարգման ծրագրով նախատեսված առաջին փուլի նախապատրաստական աշխատանքների ընթացքին:
Քաղաքապետին ներկայացնելով աշխատանքների ընթացքը, «Երևաննախագիծ» ՓԲԸ տնօրենը նշել է, որ տարածքի միջնամասում գտնվող, չգործող շատրվանների փոխարեն նախատեսվում է ստեղծել նոր ճեմուղի, որի կողային հատվածներում էլ կկազմակերպվի «Վերնիսաժը»՝ ձևավորելով նոր մոտեցումներով բացօթյա ցուցասրահ և առևտրային տարածք: Ամբողջ հատվածը կբարեկարգվի և կկանաչապատվի:
Մուտքերն էլ՝ երկու կողմերից, կառանձնանան ջրային ավազաններով: Տարածքը նաև կկահավորվի նստարաններով՝ ձևավորելով երեկոյան հանգստի լիարժեք գոտի: «Վերնիսաժի» բարեկարգման և արդիականացման ծրագիրն իրականացվելու է համայնք-մասնավոր հատված համագործակցությամբ՝ տեղի վարձակալի միջոցներով:
Քաղաքապետ Տարոն Մարգարյանը ծանոթանալով աշխատանքների ընթացքին պատասխանատուներին հանձնարարել է խստորեն վերահսկել իրականացվող աշխատանքների որակը և հետևել, որ այն ավարտվի սահմանված ժամկետներում:
.gif)
