Հուլիսի 23-ից օգոստոսի 22-ն ընկած ժամանակահատվածում Երևան-Սևան մայրուղու չորս հատվածներում ուրբաթ օրերին ժամը 16:00-ից 22:00-ը, իսկ շաբաթ և կիրակի օրերին ժամը 08:00-ից-22:00-ը հերթապահություն իրականացնող Կոտայքի մարզի Աբովյանի, Չարենցավանի, Հրազդանի և Գեղարքունիքի մարզի Սևանի բժշկական կենտրոնների շտապ բժշկական օգնության բրիգադների կողմից անհրաժեշտ օգնություն է ցուցաբերվել 46 անձի` նախորդող ամսվա 25-ի դիմաց։
11 քաղաքացի հոսպիտալացվել է ինչպես մարզային ԲԿ-եր, այնպես էլ մայրաքաղաքի բազմապրոֆիլ հիվանդանոց։
Նշված ժամանակահատվածում շտապ բժշկական օգնության բրիգադների հերթապահության ժամանակ արձանագրվել է երկու ավտովթար` օգոստոսի 10-ին, ժամը 19.30-ի և օգոստոսի 17-ին, ժամը 17-50-ի սահմաններում Հրազդանի հենակետի սպասարկման տարածքում։ Արդյունքում տուժել է հինգ ուղևոր։ Անհրաժեշտ առաջին և անհետաձգելի բուժօգնություն ցուցաբերելուց հետո կազմակերպվել է նրանց տեղափոխումը հիվանդանոց։ Տուժածներից 4-ի մոտ եղել են միջին ծանրության վնասվածքներ, իսկ մեկի մոտ արձանագրվել է գանգուղեղային վնասվածք և ծանր աստիճանի գլխուղեղի ցնցում։ Վերջինս տեղափոխվել է նախ Հրազդանի ԲԿ, այնուհետև` ,Սուրբ Գրիգոր Լուսավորիչե բժշկական կենտրոն։
Մնացած դեպքերում հերթապահող շտապ բժշկական օգնության բրիգադներին ուղևորները հիմնականում դիմել են, զարկերակային գերճնշման, արևահարության, ալերգիկ վիճակի, գոտկասրբանային ռադիկուլիտների, նեյրոցիրկուլյատոր դիստոնիայի և այլ դեպքերի կապակցությամբ։ Ընդհանուր առմամբ հուլիսի 23-ից օգոստոսի 22-ը Սևանի հենակետում բժշկական օգնություն է ցուցաբերվել 15, Հրազդանի հենակետում` 12, Չարենցավանի հենակետում` 13, իսկ Աբովյանի հենակետում` 6 մարդու։
Հիշեցնենք, որ այս հերթապահություններն իրականացվում են ՀՀ առողջապահության նախարար Դերենիկ Դումանյանի հրամանով ճանապարհատրանսպորտային պատահարների հետևանքով տուժած անձանց շտապ բժշկական օգնությունը պատշաճ և արագ կազմակերպելու նպատակով։
Հերթապահությունները նույն ժամանակացույցով կիրականացվեն մինչև սեպտեմբերի 20-ը։
.gif)
