Երկրապահ կամավորականների միության Շիրակի մարզային խորհրդի անդամներն այցելեցին Ախուրյանի ծննդատուն՝ զոհված հերոս Հրաչ Գալստյանի նորածին դուստր Անահիտին: ԵԿՄ-ի և ԵԿՄ Շիրակի մարզային խորհրդի նախագահ Յուրա Ալեքսանյանի անունից Հրաչ Գալստյանին հետմահու շնորհվեց ԵԿՄ հուշամեդալ: «Ճիշտ է, Հրաչը հերոսի մահով զոհվեց, բայց իր դստեր ծնունդը նոր կյանքի խորհուրդ ստացավ ու ուրախանալ է պետք»,- «Արմենպրես»-ի հետ զրույցում նշեց ԵԿՄ Շիրակի մարզային խորհրդի «Պատանի երկրապահ» ակումբի նախագահ Վաչագան Սարգսյանը:
ԼՂՀ Թալիշ գյուղում ապրիլի 3-ին զոհված 25-ամյա ավագ լեյտենանտ Հրաչ Գալստյանի եւ Անուշ Օհանյանի դուստրը ծնվել է Ախուրյանի «Մոր ու մանկան հիվանդանոց»-ում մայիսի 6-ին առավոտյան 6:10-ին: Հրաչի ցանկությամբ փոքրիկին կոչել են տատի անունով՝ Անահիտ:
.gif)
