ԻՆՉՈ՞Ւ ԷՐ ԶԱՅՐԱՑԵԼ ՍԵՐԺ ՍԱՐԳՍՅԱՆԸ

Ապրիլի 27-ին Սերժ Սարգսյանի անակնկալ հանդիպումը ՀՀԿ խմբակցության պատգամավորների հետ տարբեր խոսակցությունների տեղիք տվեց: Քանի որ նման ձեւաչափով հանդիպումները ավանդական բնույթ չեն կրում, բացի այդ՝ հանդիպումը հաջորդեց «Հրազդան ցեմենտի» նախագծի տապալմանը, եւ տեղեկություններ շրջանառվեցին, թե Սերժ Սարգսյանն այդ հանդիպման ընթացքում իր վրդովմունքն է հայտնել ՀՀԿ-ական պատգամավորներին՝ նրանց խստորեն զգուշացնելով, որ այլեւս նման պահվածքը չի ներվելու:

«Ժողովուրդ»-ը երեկ ՀՀԿ խմբակցության պատգամավորներ Սուքիաս Ավետիսյանից եւ Մարգարիտ Եսայանից փորձեց պարզել, թե ինչն է եղել Ս. Սարգսյանի վրդովմունքի հիմնական պատճառը:

ՀՀԿ խմբակցության պատգամավոր Սուքիաս Ավետիսյան
-Պարո՛ն Ավետիսյան, ապրիլի 27-ին Սերժ Սարգսյանը հանդիպել է ՀՀԿ խմբակցության պատգամավորների հետ եւ այդ փակ հանդիպման ընթացքում, ըստ տարբեր աղբյուրներից ստացված տեղեկությունների, իր վրդովմունքը հայտնել պատգամավորներին՝ «Հրազդան ցեմենտ»-ի նախագծի քվեարկությունը տապալելու, եւ, առհսարակ, վատ աշխատելու կապակցությամբ: Ըստ Ձեզ՝ արդարացված է Ս. Սարգսյանի վրդովմունքը:
-Կոնկրետ «Հրազդան ցեմենտի» քվեարկության հետ կապված որեւէ բան չի եղել: Ընդհանուր մեր աշխատանքների հետ կապված խորհրդակցություն է եղել: Եւ բնական է, որ կուսակցության նախագահը նաեւ իր որոշակի կարծիքներն է հայտնել, մեր աշխատանքների հետ կապված արել է իր դիտարկումները, այնպես որ սա շատ նորմալ եւ բնական բան է:
-Տեղեկություններ կան, որ նիստի ժամանակ խմբակցության ղեկավար Վահրամ Բաղդասարյանը ասել է, թե ԲՀԿ-ն անակնկալ է մատուցել եւ չի մասնակցել քվեարկությանը: Սերժ Սարգսյանն էլ նշել է, որ կպատժի նրանց: Ի՞նչ պատժի մասին է խոսքը:
-Նման բան ես չգիտեմ, համենայն դեպս, մեզ չի հետաքրքրում, թե ուրիշ քաղաքական ուժերը ինչ են անում, ինչ են մտածում, ինչ ձեւով են իրենց պահում: Մենք մեր խնդիրներն ունենք, մենք մեր աշխատանքներով ենք զբաղվում: Ինչ-որ ասեցի, սա է, նիստի մասին ուրիշ ինֆորմացիայից տեղյակ չեմ:
-Պարո՛ն Ավետիսյան, մեկնաբանություններ կան, որ Սերժ Սարգսյանը վախեցել է, թե հետագայում ավելի լուրջ խնդիրներ կառաջանան կուսակցության ներսում, այդ պատճառով փորձել է շուտափույթ կանխել անցանկալի միտումները: Այդպե՞ս է:
-Ես չգիտեմ՝ ինչ մտավախության մասին է խոսքը: Սերժ Սարգսյանը ինքը վստահ է իր թիմի վրա, երբեւիցե մտավախություն չի ունեցել իր թիմի հետ կապված: Հետաքրքիր բան է, բա կուսակցության նախագահը չհանդիպի՞ իր թիմի հետ, ինչու են բոլորը այդպես խառնվել իրար: Ես դա սովորական, նորմալ բան եմ համարում ու շատ ճիշտ:
ՀՀԿ խմբակցության պատգամավոր Մարգարիտ Եսայան
-Տիկի՛ն Եսայան, նախօրեին Սերժ Սարգսյան-ՀՀԿ խմբակցության պատգամավորներ փակ հանդիպման ժամանակ ինչո՞ւ էր Ս. Սարգսյանը բարկացել:
-Եթե նիստի անունը փակ նիստ է, ուրեմն չի կարելի եւ չարժի այդ մասին խոսել, որովհետեւ դա մեր աշխատանքային փակ խորհրդակցությունն է եղել մեր կուսակցության ղեկավարի, երկրի նախագահի հետ: Թե ով ինչ է ասել, ոնց է ասել, դա վերաբերում է մեզ: Աշխատանքային խորհրդակցություն է եղել, հանդիպել ենք մեր կուսակցության ղեկավարի հետ, հարցեր ենք քննարկել, հարցեր ենք տվել, պատասխան ենք լսել: Նորմալ, արդյունավետ, կառուցողական աշխատանքային հանդիպում էր, որեւէ արտառոց բան չի եղել, որի մասին արժի, որ մամուլը իմանա:
-Ըստ տեղեկությունների՝ նիստի ժամանակ խմբակցության ղեկավար Վահրամ Բաղդասարյանը հայտնել է, որ ԲՀԿ-ն չի մասնակցել քվեարկությանը, Ս. Սարգսյանն էլ խոստացել է նրանց պատժել: Ի՞նչ պատժի մասին է խոսքը:
-Նման բան իրականում չի եղել, նման խոսակցության ներկա չեմ եղել:
-Այնուամենայնիվ, խոսակցություններ կան, որ Ս. Սարգսյանը կուսակիցների վրա բարկացել է, քանի որ վախեցել է, որ առաջիկայում հնարավոր է՝ ավելի լուրջ խնդիրներ առաջանան: Ի՞նչ կասեք:
-Մեր կուսակցության նախագահը եւ երկրի նախագահը իրավունք ունի ցանկացած հարցի մասին իր կարծիքը հայտնել, իր տեսակետը հայտնել, իր ասելիքը ասել, ինչը եւ նա արել է, ինչը եւ մենք լսել ենք եւ հետեւություններ արել: Որեւէ մտավախություն, անհանգստություն, լարվածություն մեր կուսակցության ներսում չկա: Աշխատանքային ենք տրամադրված, մարտական ենք տրամադրված: Նման մտահոգությունները անտեղի են:

 
ՁԵՎԱՎՈՐՎՈՒՄ Է ՆՈՐ ՏԵՍԱԿԻ ՕԼԻԳԱՐԽԻԿ ՀԱՄԱԿԱՐԳ

Տեւական ժամանակ է՝ Արա Աբրահամյանի կողմից ստեղծվելիք կուսակցության մասին խոսակցությունները դադարել են: «Ժողովուրդ»-ը Ռուսաստանի հայերի միության փոխնախագահ, Հայաստանի Դեմոկրատական կուսկացության նախագահ Արամ Գ. Սարգսյանից հետաքրքրվել է, թե արդյոք Արա Աբրահամյանի համար շարունակում է օրակարգային մնալ կուսակցության ստեղծումը, նաեւ պարզել Դեմկուսի առաջիկա ծրագրերի մասին:

-Պարո՛ն Սարգսյան, 2017 թվականի խորհրդարանական ընտրություններին ՀԴԿ-ն մասնակցելո՞ւ է:
-Անպայման մասնակցելու ենք: Ֆորմատը կորոշենք ավելի ուշ: Հավանաբար կլինի այն կուսակցությունների միավորումը, որոնք կարող են գաղափարապես միասնական լինել: Դա այս պահին դեռ որոշված չէ:
-ՌՀՄ նախագահ Արա Աբրահամյանի կողմից ստեղծվելիք կուսակցության մասին խոսակցությունները կարծես թե դադարել են: Ե՞րբ է ձեւավորվելու այն:
-Չկա այդպիսի կուսակցություն ձեւավորված, կա «Ազգային միասնության» շարժում, որի նպատակները հստակ դրված են մեր կայքէջում: Այսօր ես վերադարձել եմ Վայոց Ձորից, ունեցել ենք մեր կառույցի հետ հանդիպում, քննարկել ենք հնարավոր խնդիրները համագործակցության, տնտեսական ծրագրի զարգացման վերաբերյալ: «Ազգային միասնության» շարժման գրասենյակներն այսօր ձեւավորված են բոլոր մարզերում եւ դրանք արդեն սկսել են իրենց գործունեությունը: Եղել ենք Գյումրիում, վաղը լինելու ենք Հրազդանում: Մենք հոկտեմբերի 2-5-ը նախապատրաստվում ենք բիզնես ֆորում անցկացնել, որը իր նպատակներն արդեն հայտարարել է` ՀՀ տնտեսության զարգացմանը նպաստելը: Եւ այդ առումով մենք բավականին մեծ աշխատանք ենք կատարել, որի մասին հետագայում ավելի կմանրամասնենք: Մեր խնդիրը այս պահին դա է:
-Օրեր առաջ ԱԺ պատգամավոր Վարդան Օսկանյանը հայտարարեց նոր՝ «Համախմբում» անվամբ կուսակցություն ստեղծելու մասին: Ի՞նչ կարծիք ունեք այս նորաստեղծ ուժի մասին:
-Երբ որ կստեղծվի, հիմնադիր ժողով կլինի, կհայտարարեն իրենց ծրագրային դրույթների մասին, այդ ժամանակ կսկսենք խոսել, հիմա ի՞նչ խոսենք: Իրար հետեւից առաջ են գալիս, կուսակցություններ են գրանցվում, թե հետո ինչպիսի գործունեություն են ծավալում, պարզ չի:
-Ղարաբաղա-ադրբեջանական սահմանում վերջին լարվածությունից հետո Հայաստանում հակառուսական տրամադրությունները շեշտակիորեն խորացան: Ըստ Ձեզ՝ ով է դրանում մեղավոր՝ Ռուսաստանը, որը զինում է Ադրբեջանին, թե ՀՀ իշխանությունները, որոնք չնայած դրան՝ շարունակում են ռուսների հետ խոսել վասալային լեզվով:
-Հակառուսական տրամադրություններ ձեւավորելը շատ հեշտ է: Եթե դու ինչ-որ մի բան այն չես արել, փորձում ես մեղադրել Ռուսաստանին, որ այս չարեց, այն չարեց, մենք այսպիսի մոտեցում ունեինք, իրենք՝ այլ: Բայց կարծում եմ, որ ժողովուրդը հասկացավ՝ ում էր ձեռնտու այդ տրամադրությունները բերելը, եւ ինչպիսի հետեւանքներ դրանք կարող էին ունենալ: Այդ փուլը անցավ: Ինձ այնքան չի հետաքրքրում դրսի գործոնը, ինչքան ներքին խնդիրների կարգավորումը: Երբ որ մենք դա կանենք, կտեսնենք, որ շատ բան կախված է մեզանից:
-Պարո՛ն Սարգսյան, նոր ԸՕ քննարկումների ժամանակ Դուք եւս առաջարկներով հանդես եկաք, արդյո՞ք իշխանության կողմից դրանք ընդունվել են:
-Մեր առաջարկները հիմնականում ընդդիմության առաջարկներն էին, որոնք անտեսվեցին: Ես լսելով ելույթները, հատկապես ՀՀԿ ներկայացուցիչների, մեկ բան կարող եմ ասել, որ նրանք փորձում են ցույց տալ, թե իրենք չեն հասկանում՝ մենք ինչ ենք ասում: Եթե իբր իրենք զիջել են եւ արել են այն, ինչ որ ընդդիմությունը ցանկանում էր` համամասնական ընտրակարգը, ապա փաստացի այդ համամասնական ընտրակարգը չկա: Ռեյտինգային քվեարկության արդյունքում ընտրվելու են միայն օլիգարխները կամ մեծահարուստները, որոնք նորից գնալու են այլասերելու մեր ժողովրդին: Այսօրվա կառավարող կուսակցությունը չընդունելով մեր այդ առաջարկը` հրաժարվել է ռեյտինգային քվեարկությունից, մեղսակից է դառնում ապագայում նոր տեսակի օլիգարխիկ համակարգի ձեւավորմանը:

Նյութերը՝ ԱՐՓԻՆԵ ԹՈՎՄԱՍՅԱՆԻ

 
ԿԴԻՄԻ ԱԱԾ-ԻՆ
2015 թվականի նոյեմբերի 25-ին ՀՀ ԱԱԾ-ի կողմից Նորք-Մարաշում վնասազերծված «հանցավոր» խմբի գործով կալանավորված 49-ամյա Հարություն Սարիբեկյանի որդին` Ռուբեն Սարիբեկյանը, պատրաստվում է դիմել ԱԱԾ պետ Գեւորգի Կուտոյանին: «ժողովուրդ»-ի հետ զրույցում Ռուբեն Սարիբեկյանն ասաց, որ երբ ԱԱԾ-ն կալանավորել է իր հորը, նրա գրպանում փաստաթուղթ է եղել, որտեղ երկու հեռախոսահամարներ են եղել նշված, որոնցից մեկը շատ կարեւոր է իրենց համար: «Ես պատրաստ եմ գնալ ԱԱԾ, իրավապահները թող ինձ հարցաքննեն: Կալանավորելուց հետո իրավապահներն այդ թուղթն առգարվել են հայրիկիս մոտից, եւ մենք ոչ մի կերպ չենք կարողանում այդ հեռախոսահամարը պարզել: Իմ դիմում-խնդրանքը իրավապահներին այն է, որ օգնեն ինձ, ասեն այդ հեռախոսահամարը, մինչեւ տեսնենք, թե ինչ կլինի»,- ասաց Ռուբեն Սարիբեկյանը: Ի դեպ, շուտով այս գործով կալանավորվածների խափանման միջոցը՝ կալանքի երկամսյա ժամկետը, հերթական անգամ կլրանա: Դեռեւս պարզ չէ՝ արդյոք ԱԱԾ-ն կրկին անգամ կմիջնորդի կալանքի ժամկետը երկարաձգելու համար, թե մինչ այդ կհասցնեն գործն ուղարկել դատարան:

ՀՀ ՔԱՂԱՔԱՑԻՆԵՐԸ՝ ՌԴ-ՈՒՄ
Ռուսաստանի Դաշնության ներքին գործերի նախարարության հրապարակած տվյալների համաձայն՝ այս տարվա ապրիլի 1-ի դրությամբ այդ երկրում բնակվում է ՀՀ 470 հազար քաղաքացի: Հայաստանի քաղաքացիներից շուրջ 380 հազարը աշխատունակ տարիքի տղամարդիկ եւ կանայք են, այսինքն՝ 18-ից 60 տարեկան են: Հարկ է նկատել, որ անցած տարվա վերջին Ռուսաստանում բնակվող քաղաքացիների թիվը մոտ 20 հազարով ավել է եղել: Այս տարբերությունը կարող է պայմանավորված լինել այն հանգամանքով, որ Ամանորից առաջ Ռուսաստանից Հայաստան վերադարձած ՀՀ քաղաքացիները դեռեւս ետ չեն գնացել արտագնա աշխատանքի: Իհարկե, բացառված չէ նաեւ, որ ՀՀ քաղաքացիների թվի անկումը կարող է պայմանավորված լինել նրանց մի մասի՝ Ռուսաստանի քաղաքացիություն ձեռք բերելու հանգամանքով:

ՀԱՆՔԱՆՅՈՒԹԸ ՉԻ ՎԱՃԱՌՎՈՒՄ
Այս տարվա առաջին եռամսյակի արդյունքներով՝ Հայաստանում արդյունահանված պղնձի հանքանյութը, անցած տարվա նույն ժամանակահատվածի համեմատ, աճել է ավելի քան 33 տոկոսով: Սակայն հանքանյութի գումարային արժեքը անցած տարվա համեմատ աճել է 27 տոկոսով: Այսինքն՝ ավելի շատ պղնձի խտանյութով ավելի քիչ եկամուտ է ստացվել: Հենց այս հանգամանքով է պայմանավորված այն փաստը, որ «Զանգեզուրի պղնձամոլիբդենային կոմբինատի» վճարած հարկերն անցած տարվա համեմատ ավելի քան կիսով չափ կրճատվել, 4 միլիարդ 36 մլն դրամից նվազել են՝ կազմելով 1 միլիարդ 990 միլիոն դրամ: