ՇԱՀԱՌՈՒՆԵՐԻՆ ՇԱՐՈՒՆԱԿՈՒՄ ԵՆ ԽԱԲԵԼ

«Աջակցություն երիտասարդ համալսարանականների բնակարանաշինությանը» սոցիալական ծրագրի երկրորդ փուլի մի խումբ շահառուներ երեկ հաղորդագրություն են տարածել, որում պնդում են, թե Սերժ Սարգսյանի հովանու ներքո իրականացվող բնակարանաշինարարական ծրագիրը տապալման եզրին է:
Ավելին, շահառուներն իրենց հաղորդագրության մեջ ներկայացրել են փաստեր այն մասին, որ «ԵՊՀ շրջանավարտների միավորում» ՀԿ-ի նշված ծրագիրն իրականացվում է ժամկետների էական խախտումներով եւ առանց իրավիճակի մասին շահառուների պատշաճ իրազեկման:
Տեղեկացնենք, որ 2012թ. հոկտեմբերի 30-ին պետք է ավարտվեր «Աջակցություն երիտասարդ համալսարանականների բնակարանաշինությանը» սոցիալական ծրագրի երկրորդ փուլը, ինչի արդյունքում պետք է շահագործման հանձնվեր Երեւանի Ծարավ Աղբյուրի 55/6 հասցեում կառուցվող բազմաբնակարան շենքային համալիրը: Նշենք, որ ծրագիրն  իրականացվում է «ԵՊՀ շրջանավարտների միավորում» ՀԿ-ի հոգաբարձուների խորհրդի նախագահ Սերժ Սարգսյանի բարձր հովանու ներքո: Համաձայն շահառուների հետ կնքված նախնական պայմանագրի՝ այդ ժամկետը կարող էր երկարաձգվել վեց ամսով՝ մինչեւ 2013թ. ապրիլի 30-ը: Սակայն ապրիլի 30-ից 4 ամիս անց՝ 2013թ. սեպտեմբերին, շենքը դեռ շահագործման չի հանձնվել: Շահագործման կրկին երկարաձգված՝ հունիսի 30-ի վերջնաժամկետը, «ԵՊՀ շրջանավարտների միավորում» ՀԿ-ի կայքում 2013թ. հուլիսի 4-ին զետեղված հայտարարության համաձայն, դարձյալ երկարաձգվել է՝ այս անգամ առանց նշելու հստակ նոր ժամկետ:
Օգոստոսի 30-ին «ԵՊՀ շրջանավարտների միավորում» ՀԿ-ն իր կայքում տարածել է հայտարարություն, ըստ որի՝ վերջին ամիսների ընթացքում շինաշխատանքներ իրականացնող «Ի Էմ Էյջ Քոնսթրաքշըն» ՓԲԸ-ի կողմից դրսեւորված անպատասխանատու գործելաոճի արդյունքում շենքի կառուցման շինարարական աշխատանքները մինչ օրս չեն ավարտվել, իսկ շենքում չկատարված աշխատանքները կազմում են ընդհանուր ծավալի 3 տոկոսը: Հայտարարության մեջ նաեւ ասվում է, որ շինարարությունն ավարտին հասցնելու նպատակով ՀԿ-ի կողմից համալիրի կառուցման պայմանագրային արժեքը վճարվել է ամբողջությամբ՝ չնայած այն հանգամանքին, որ ծրագրի շահառուներից շատերը չեն վճարել իրենց բնակարանների ամբողջ արժեքը: Նշենք, որ այս ընկերությունը «Գլենդել հիլզ» ՓԲԸ-ի դուստր ձեռնարկությունն է: Այս մասին «Ժողովուրդ»-ը տեղեկացավ ՀՀ սպորտի եւ երիտասարդության հարցերի նախարարի տեղակալ, «ԵՊՀ շրջանավարտների միավորում» ՀԿ-ի նախագահ Արսեն Քարամյանից:
Ծարավ Աղբյուրի 55/6 հասցեի շահառու Գայանե Վարդանյանը «Ժողովուրդ»-ին տեղեկացրեց, որ շինարարները փաստում են այն մասին, որ 6-7 ամիս գումար չեն ստացել, ինչի արդյունքում էլ շինաշխատանքները սառեցվել են: Շահառուներն առաջարկում են իրենց ներկայությամբ կազմակերպել համատեղ մամուլի ասուլիս` ՀԿ-ի եւ շինարարական կազմակերպության ներկայացուցիչների մասնակցությամբ, ինչի ընթացքում կբարձրաձայնվեն բոլորի տեսակետները:
ՀԿ-ի կողմից տարածված հայտարարության մեջ նշված է նաեւ, թե իբր շենքում չկատարված աշխատանքները կազմում են ընդհանուր ծավալի 3 տոկոսը, մինչդեռ շահառուները հակառակն են պնդում. ավարտված են շենքի ընդամենը առաջին 5 հարկերի բնակարանների աշխատանքները, իսկ վերջին հարկերում գրեթե ոչինչ արված չէ:
«Համաձայն կնքված պայմանագրի՝ շահառուն մինչեւ շենքի կառուցման ավարտը պիտի վճարեր բնակարանի արժեքի 85 տոկոսը: Մնացած 15 տոկոսը շահառուն պարտավորվում էր վճարել իր բնակարանը ստանալուց հետո՝ 7 օրվա ընթացքում: Բոլոր շահառուներն ըստ ժամանակացույցի վճարել են իրենցից պահանջվող 85 տոկոս գումարները, ավելին, կան շահառուներ, որոնք ՀԿ-ի խնդրանք-պահանջով վճարել են իրենց բնակարանների ողջ գումարը՝ չնայած կառուցապատողը մնացյալ 15 տոկոս գումարն անգամ խնդրել-պահանջելու որեւէ իրավասություն չուներ»,-ներկայացրեց Գ. Վարդանյանը:
Իսկ ՀՀ սպորտի եւ երիտասարդության հարցերի նախարարի տեղակալ, «ԵՊՀ շրջանավարտների միավորում» ՀԿ-ի նախագահ Արսեն Քարամյանը շարունակում է հայտարարել, թե ինքը շենքի համար 181 միլիոն դրամ ավել է վճարել. «Բնականաբար, առաջին շահառուն ես եմ: Չորրորդ ամիսն է՝ պարբերաբար խոստանում են, տարբեր ժամկետներ են նախանշում: Հետո էլի չեն կատարում իրենց խոստումները, մենք էլ շարունակում ենք բանակցել: Բայց հույս ունենք, որ մեկուկես ամսվա ընթացքում այն ավարտին կհասցնեն»: Նրա խոսքով՝ այս հարցն ունի լուծման երկու ճանապարհ. առաջին՝ այն, որով հիմա ՀԿ-ն ընթանում է, երկրորդ՝ շինընկերությունը պետք է պատասխանատվության ենթարկվի:
«Ժողովուրդ»-ը «Գլենդել հիլզ» ՓԲԸ-ի մամուլի բաժնի պատասխանատու Արմինե Ուդումյանից տեղեկացավ, որ «Գլենդել հիլզ»-ը նշված հասցեում իրականացվող շինարարության հետ որեւէ կապ չունի:
Եթե Սերժ Սարգսյանի հովանու ներքո ընդամենը մեկ շենքի կառուցումն է այդքան մեծ դժվարությամբ իրականացվում, ապա կարելի է պատկերացնել, թե նրա` երկրի տնտեսական աճի, գյուղատնտեսության, գիտության եւ այլ բնագավառների զարգացման վերաբերյալ խոստումներն ինչ ճակատագրի կարժանանան: Ի դեպ, ավելորդ չէ հիշեցնել, որ Ս. Սարգսյանի 2008-ի նախընտրական ծրագրում նշված էր, որ յուրաքանչյուր  երիտասարդ ընտանիք արդեն 2013-ին պետք է ունենար առնվազն մեկ բնակարան եւ մեկ ավտոմեքենա: