Մայիսի 17-ին ՀՀ ԱԺ փոխնախագահ Էդուարդ Շարմազանովը մասնակցել է «Հայաստանում ՔՀԿ-ների մասնակցությունը որոշումների կայացման գործընթացներում» թեմայով միջազգային վերապատրաստման դասընթացին: Միջոցառմանը մասնակցել են նաեւ ԱԺ պատգամավորներ, քաղաքացիական հասարակության կազմակերպությունների ներկայացուցիչներ եւ այլք:
Ողջունելով դասընթացի մասնակիցներին՝ Էդուարդ Շարմազանովը կարեւորել է նախաձեռնությունը պետության, ժողովրդի եւ առհասարակ եվրոպական, քրիստոնեական ու ժողովրդավարական արժեհամակարգի զարգացման ու տարածման տեսանկյունից: ԱԺ փոխնախագահը շնորհակալություն է հայտնել կազմակերպությանը նման նախաձեռնության համար, որն ուղղված է Հայաստանում ժողովրդավարական արժեքների տարածմանը:
ԱԺ փոխնախագահը նշել է, որ 21-րդ դարում կան բազմաթիվ մարտահրավերներ՝ թե՛ ներքին եւ թե՛ արտաքին:
«Համոզված եղեք, որ մենք այդ մարտահրավերներն ավելի հաջողությամբ կարող ենք լուծել, այդ մարտահրավերներին ավելի հաջողությամբ կարող ենք դիմակայել, եթե իրականում զարգացնենք եւ ամրապնդեք Հայաստանում ժողովրդավարական արժեքները»,-ասել է պարոն Շարմազանովը:
Նա նշել է, որ Հայաստանը համամարդկային, քրիստոնեական, եվրոպական ու ժողովրդավարական արժեքային համակարգի մի մաս է. մեր երկրում ժողովրդավարական արժեքներին այլընտրանք չի կարող լինել: Պարոն Շարմազանովի համոզմամբ՝ Հայաստանի 25-ամյա անկախ սերունդն ապրելու է միայն ժողովրդավարական արժեքներով եւ այս համատեքստում արժեւորել է քաղաքացիական հասարակության եւ նմանատիպ կազմակերպությունների դերը: Նա համոզմունք է հայտնել, որ Ազգային ժողովը պատրաստ է իր նպաստել Հայաստանում ժողովրդավարության զարգացմանը, օժանդակել նմանատիպ միջոցառումների իրականացմանը: Այս համատեքստում ԱԺ փոխնախագահը կարծիք է հայտնել, որ եթե քաղհասարակությունն ու խորհրդարանի հանձնաժողովները մշտապես կապի մեջ են թե՛ օրենսդրական եւ թե՛ քաղաքական խնդիրների լուծման մակարդակով, ապա որեւէ անջրպետ քաղաքացիների ու քաղաքական ուժերի մեջ չի կարող լինել:
.gif)
