ԼՈՒՐ ԿԱԴՐ

Լուսանկարն արվել է 67 համարի ավտոբուսի մեջ

Այս ավտոբուսի վարորդը որոշել է բարի գործ անել: Նա գրություն է փակցրել ավտոբուսի մեջ եւ անվճար սպասարկում է բոլոր զինվորներին: Մտահղացումը հենց վարորդինն է: Համաձայնեք, որ մեր օրերում նման քայլեր նախաձեռնողները շատ քիչ են:

 
ՀԱՐՑ. Ես ուզում եմ իմանալ՝ ընտանեկան կարգավիճակի մասին տեղեկանք որտեղի՞ց կարող եմ ձեռք բերել: Եվ խնդրում եմ ասեք, թե ի՞նչ կարգով է տրամադրվում այն:

Ռուբինա Հակոբյան (36 տարեկան, տնային տնտեսուհի)

ՊԱՏԱՍԽԱՆ. Տեղեկանքը տրամադրում է ՀՀ արդարադատության նախարարությունը: Օտարերկրյա պետությունում գտնվող տեղեկանք հայցողը (լիազորված անձը, ծնողը) տեղեկանք ստանալու համար կարող է դիմել նաեւ տվյալ պետությունում ՀՀ դիվանագիտական ներկայացուցչություն կամ հյուպատոսական հիմնարկ (այսուհետ` հյուպատոսական հիմնարկ): Ընտանեկան կարգավիճակի վերաբերյալ տեղեկանքը տրամադրվում է ՀՀ մշտապես բնակվող ՀՀ քաղաքացիներին, օտարերկրյա քաղաքացիներին եւ քաղաքացիություն չունեցող անձանց՝ ՀՀ տարածքից դուրս ամուսնություն գրանցելու համար:
Տեղեկանք ստանալու համար կարող է դիմել ամուսնություն գրանցել ցանկացող անձը կամ նրա ծնողը, կամ նրա կողմից լիազորված անձը: Տեղեկանքն ուժի մեջ է այն տալու օրվանից 6 ամիս ժամկետով:

ՀՀ արդարադատության նախարարություն

«ԺՈՂՈՎՈՒՐԴ». Նշենք, որ ընտանեկան կարգավիճակի մասին տեղեկանք տրամադրելու համար գանձվում է պետական տուրք՝ 1000 ՀՀ դրամ: Մեկ աշխատանքային օրվա ընթացքում տեղեկանք տրամադրելու համար գանձվում է լրացուցիչ արտաբյուջետային վճար՝ 10000 ՀՀ դրամի չափով, իսկ երկու աշխատանքային օրվա ընթացքում ծառայությունը մատուցելու համար՝ 7000 ՀՀ դրամի չափով:

 
ՀԱՐՑ. 1987թ. ընդունվել եմ Գորիսի մանկավարժական համալսարան (ներկայում՝ Գորիսի պետական քոլեջ) որպես դասախոս: 1998թ. աշխատանքի եմ անցել որպես դասախոս Գորիսի պետական քոլեջում: 2003թ. աշխատում եմ որպես դասախոս: Իմ 55 տարին լրացել է, եւ ուզում եմ իմանալ՝ կարո՞ղ եմ ստանալ մասնակի կենսաթոշակ:

Ալվարդ Արմենակի Ավետիսյան (Աթոյան անց. 17 շենք)

ՊԱՏԱՍԽԱՆ. Ա. Ավետիսյանի դիմումի կապակցությամբ հայտնում ենք, որ «Պետական կենսաթոշակների մասին» ՀՀ օրենքի 14-րդ հոդվածի 1-ին մասի համաձայն՝ մասնակի կենսաթոշակ նշանակվում է կրթության, մշակույթի որոշ կատեգորիաների աշխատողներին, եթե լրացել է նրանց 55 տարին, եւ ունեն առնվազն 25 օրացուցային տարվա աշխատանքային ստաժ, որից առնվազն 12 օրացուցային տարին մասնագիտական ստաժ է: Նույն հոդվածի 3-րդ մասի համաձայն՝ մասնակի կենսաթոշակի իրավունք տվող մասնագիտական աշխատանքային ստաժում հաշվառվում են ՀՀ կառավարության սահմանած ցանկում նշված մասնագիտություններով եւ պաշտոններում մինչեւ 2003թ. օգոստոսի 1-ն աշխատած ժամանակահատվածները:
ՀՀ կառավարության 2011թ. մայիսի 5-ին թիվ 665-Ն որոշմամբ հաստատված «Կրթության, մշակույթի որոշ կատեգորիաների աշխատողներին մասնակի կենսաթոշակի իրավունք տվող մասնագիտությունների եւ պաշտոնների ցանկում» բարձրագույն ուսումնական հաստատությունները եւ դասախոս պաշտոնը նշված չեն: Հետեւաբար նշված պաշտոնում աշխատած ժամանակահատվածը մասնակի կենսաթոշակի իրավունք տվող մասնագիտական ստաժում հաշվառվել չի կարող:

ՀՀ աշխատանքի եւ սոցիալական հարցերի նախարարության հասարակայնության հետ կապերի բաժին

«ԺՈՂՈՎՈՒՐԴ». Ավելացնենք, որ մասնակի կենսաթոշակը հաշվարկվում է մասնագիտական աշխատանքային ստաժին համամասնորեն: Ի դեպ, համատեղությամբ աշխատած ժամանակահատվածը մասնագիտական աշխատանքային ստաժում չի հաշվառվում: Մասնակի կենսաթոշակը նշանակվում է մինչեւ տարիքային աշխատանքային կենսաթոշակի իրավունք տվող տարիքը լրանալը: