Հովհաննես Թումանյանի թանգարանը սեպտեմբերի 20-22-ը կանցկացնի «Երկնքից երեք խնձոր ընկավ…» հեքիաթասացության եւ բարբառի 5-րդ մրցույթ-փառատոնը: Արդեն 5-րդ անգամ անցկացվող մրցույթ-փառատոնին մասնակցելու հայտեր են ներկայացրել Արագածոտնի, Կոտայքի, Գեղարքունիքի, Շիրակի, Տավուշի մարզերը, ՀՀ-ում բնակվող քրդական, վրացական, գերմանական, եզդիական, լեհական համայնքները, Սիրիայի, Լիբանանի, Վրաստանի, ինչպես նաեւ արեւմտահայ համայնքի ներկայացուցիչներ: Մասնակիցները հայերենի բարբառներով կներկայացնեն բելառուսական, գերմանական, ճապոնական, ռուսական, վրացական, իռլանդական, անգլիական, բուլղարական, ֆրանսիական հեքիաթներ:
Մեր աչքից չվրիպեց, որ մասնակիցների թվում չկա մեծ լոռեցու հայրենի Լոռու մարզի անունը, եւ դրա պատճառը պարզաբանելու նպատակով դիմեցինք թանգարանի տնօրեն Նարինե Թուխիկյանին:
-Լոռու մարզը պարզապես չի ուզում մասնակցել։ Հայտարարություն ենք տարածում, կապվում ենք մարզպետարանների հետ, եւ Լոռու մարզպետարանից միշտ պատասխանում են, որ ցանկացող չկա։ Բայց, կարծում եմ, մի քիչ հոգնած են աշխատում, մարզպետարանը պիտի շահագրգռված լինի դպրոցներին ասելու, օգնելու, ճանապարհներ գտնելու։ Ըստ մեզ՝ նույնիսկ պետք է հատուկ պատվիրակություն գա Դսեղից՝ Թումանյանի հայրենի գյուղից։ Առաջին անգամ, երբ տեսանք, որ մարզը ոչ մի բան չի նախաձեռնում, ինքներս Դսեղից (ոչ թե որպես հեքիաթասացի, այլ որպես այդ գյուղի ներկայացուցչի) մի ծերունու հրավիրեցինք եւ առոք-փառոք ճանապարհ դրեցինք։ Նույնիսկ Թումանյանի ձեռնափայտի կրկնօրինակը պատրաստել տվեցինք (դրանից աշխարհում ուրիշ մեկը չունի), նվիրեցինք… Ի դեպ, այս տարվա ամենամեծ մասնակիցը 87 տարեկան է։
-Ո՞րն է փառատոնի անցկացման հիմնական նպատակը։
-Փառատոնի նպատակն է վերակենդանացնել հեքիաթասացությունը՝ որպես բանահյուսական նյութի մատուցման կարեւորագույն միջոց, խրախուսել բանավոր խոսքի մշակույթի զարգացումը: Փառատոնը նպաստում է նաեւ հայերենի այն բարբառների կիրառմանը, որոնք այսօր հնարավորություն չունեն կենցաղավարելու իրենց պատմաաշխարհագրական հայրենիքում՝ Արեւմտյան Հայաստանի եւ Նախիջեւանի բարբառները նկատի ունեմ: Որոշ երկրների դեսպաններ էլ են մասնակցելու փառատոնին, որոնք վերջին օրը իրենց մայրենի լեզուներով հատվածաբար կպատմեն «Բարիկենդանը»։
Ի դեպ, 2013թ. փառատոնը հաղթող է ճանաչվել ԻԿՕՄ-ի (Թանգարանների միջազգային կոմիտե) գագաթնաժողովի շրջանակներում իրականացվող ՍԵԿԱ-ի (ԻԿՕՄ-ի կրթության եւ մշակութային գործունեության միջազգային կոմիտե) հայտարարած «Լավագույն փորձ» մրցույթում՝ ընդգրկվելով «5 լավագույն փորձ» ծրագրերի շարքում:
.gif)
