ՀԱՐՑ. Տեղյակ եմ, որ գյուղատնտեսական վարկերի տոկոսադրույքի մասնակի սուբսիդավորման ծրագրով տարեկան տոկոսադրույքի չափը 4 տոկոս է: Բայց որոշ համայնքներում այն 6 տոկոս է կազմում: Ինչո՞վ է պայմանավորված տոկոսադրույքի չափի տարբերությունը, եւ ի՞նչ չափորոշիչներով է այն որոշվում:

ՊԱՏԱՍԽԱՆ. ՀՀ թիրախային տարածաշրջանների համայնքներում գյուղատնտեսության համար առաջնահերթ համարվող ոլորտներում զբաղված ֆիզիկական եւ իրավաբանական անձանց տրամադրվող վարկերի տոկոսադրույքի մասնակի սուբսիդավորման նպատակով ՀՀ կառավարության կողմից 31.03.2011թ. ընդունվել է «ՀՀ 2010 թվականի դեկտեմբերի 23-ի N1748-Ն որոշման մեջ փոփոխություններ եւ լրացումներ կատարելու եւ ՀՀ 2011թ. պետական բյուջեից ՀՀ գյուղատնտեսության նախարարությանը գումար հատկացնելու մասին» N 349-Ն որոշումը:
Նույն որոշմամբ հաստատվել է «Գյուղատնտեսական ոլորտին տրամադրվող վարկերի տոկոսադրույքների սուբսիդավորման» կարգը, որի 3-րդ հավելվածի 4-րդ կետի համաձայն՝ սուբսիդավորվում է վարկի տոկոսադրույքի 4 տոկոսային կետին համարժեք մասը (գումարը), իսկ հանրապետության առավել կարիքավոր համայնքների վարկառուների վարկի տոկոսադրույքի 6 տոկոսային կետին համարժեք մասը (գումարը):
Ցուցակում ներառված 225 վարկառուների համար, որպես ընտրության չափանիշ, հաշվի է առնվել նրանց աղքատության մակարդակը, ինչպես նաեւ հեռավոր ու սահմանամերձ գոտիներում գտնվելու հանգամանքը:

«ԺՈՂՈՎՈՒՐԴ». Եթե վարկերի տոկոսադրույքների չափը որոշվի աղքատության մակարդակի սկզբունքով, ապա բոլոր գյուղերին, առանց որեւէ բացառության, վարկերը պետք է տրամադրվեն առանց տոկոսադրույքի: Մինչդեռ այսօր գյուղացին վճարում է վերցրած վարկի 10 տոկոսը, իսկ պետությունը սուբսիդավորում է ընդամենը 4 տոկոսը: Եվ սա էլ համարվում է կառավարության կողմից ցուցաբերված առարկայական օգնություն: