Եթե Սանկտ Պետերբուրգի հանդիպումից հետո դիվանագետները լռում են, նշանակում է, որ մանրամասն քննարկումներ են ընթացել: Այս մասին «Նովոստի Ադրբեջան»-ին հայտնել է ՌԴ Հանրային պալատի անդամ, Կրեմլին մոտ կանգնած քաղաքագետ Սերգեյ Մարկովը՝ մեկնաբանելով Սանկտ Պետերբուրգում ԼՂ հակամարտության կարգավորման հարցով՝ Հայաստանի, Ռուսաստանի և Ադրբեջանի նախագահների միջև տեղի ունեցած հանդիպումը:
«Հանդիպումը դրական են գնահատել երկու կողմերի ներկայացուցիչները: Ինձ համար դրականն այն էր, որ կայացավ առանց խորհրդականների երեք նախագահների փակ հանդիպումը, որի ժամանակ, հավանաբար, քննարկվել են բոլոր հարցերը, ինչպես նաև այն, որ դեռևս ոչ մի արտահոսք չի եղել: Դիվանագետների մոտ, որպես կանոն, այսպես է. եթե ոչ մի արտառոց բան տեղի չի ունեցել, նրանք պատմում են այն մասին, թե ինչի են հասել, իսկ եթե իրական բանակցություններ են ընթացել, որպես կանոն, նրանք լռում են»,-ասել է քաղաքագետը:
Մարկովի խոսքով՝ դա վկայում է այն մասին, որ եռակողմ հանդիպման ժամանակ իրական առաջընթաց է գրանցվել:
Քաղաքագետը հավելել է նաև, որ բանակցությունների սեղանին է նաև Կազանի բանաձևը: «Այդ բանաձևը մշակվել է 2011թ. Դմիտրի Մեդվեդևի նախագահության ժամանակ, սակայն դրա արդյունքը եղավ սառեցված կոնֆլիկտն ու քառօրյա պատերազմը: Կարծում եմ, որ մոտ ժամանակներս կտեսնենք դրա իրականացումը»,-ընդգծել է նա:
.gif)
