ՀԱՄԱՆԵՐՄԱՄԲ ԿՈՐՈՇՎԻ ՔԱՂԲԱՆՏԱՐԿՅԱԼԻ ՀԱՐՑԸ

Երեկ պաշտոնապես հայտնի դարձավ, որ Սերժ Սարգսյանը սեպտեմբերի 30-ին ՀՀ
Ազգային ժողովի քննարկմանն է ներկայացրել ՀՀ անկախության հռչակման 22-րդ
տարեդարձի առթիվ համաներում հայտարարելու մաuին առաջարկությունը: Ուշագրավն
այն է, որ մինչեւ շաբաթ օրը իշխանությունները պնդում էին, թե համաներման
տեքստն անգամ պատրաստ չէ:  Ստացվում է, որ հանգստյան օրերը նախագահական
նստավայրում եղել են աշխատանքային, եւ համաներման տեքստը պատրաստվել է:
«Ժողովուրդ»-ի տեղեկություններով՝ իշխանություններն այս քայլին գնացել են
Ս. Սարգսյանի` ԵԽԽՎ այցից առաջ` խուսափելու համար եվրոպացիների անցանկալի
հարցադրումներից:  
Այսօր՝ ժամը 09:00-ին, ԱԺ պետական-իրավական հարցերի
մշտական հանձնաժողովի փակ նիստի շրջանակներում քննարկվելու է այդ հարցը:
Այս առիթով «Ժողովուրդ»-ը մի քանի հարց ուղղեց պետաիրավական հարցերի
մշտական հանձնաժողովի նախագահի տեղակալ, ԱԺ ՕԵԿ խմբակցության անդամ
Հովհաննես Մարգարյանին եւ հանձնաժողովի անդամ, անկախ պատգամավոր Էդմոն
Մարուքյանին: Ի դեպ, նշենք, որ հանձնաժողովի նախագահ, ԱԺ ՀՀԿ խմբակցության
պատգամավոր Դավիթ Հարությունյանը ներկա չի լինելու քննարկմանը, քանի որ 
մասնակցում է ԵԽԽՎ-ի նիստին:

ՀՈՎՀԱՆՆԵՍ ՄԱՐԳԱՐՅԱՆ
-Պարո՛ն
Մարգարյան, համաներման նախագիծն արդեն բերվել է ԱԺ, խնդրում եմ նշել, թե
կոնկրետ ինչ բովանդակություն ունի այն, ինչ է իրենից ներկայացնում:
-Առավոտյան
հայտնի կլինի, քանի որ մենք պետական-իրավական հանձնաժողովում նիստ ենք
հրավիրել եւ գիտեք, որ ըստ ընթացակարգի՝ առավոտյան փակ ծրարով մեզ կհանձնի
հատուկ բաժինը:
-Իսկ ԱԺ այս քառօրյային հնարավոր կլինի՞ քննարկել ու հաստատել նախագիծը:
-Չեմ
կարող ասել, պետք է աշխատենք, քննարկենք, իրականացնենք, քանի որ, այսպես
ասած, սպասողները շատ են: Այսինքն՝ դա մեկ հոգու չի վերաբերվում, երկու
հոգու չի վերաբերվում, դա հարյուրավոր մեր ՀՀ քաղաքացիներին է վերաբերվում,
որոնք օր առաջ սպասում են այդ նախագծի հաստատմանը:
-Տեսակետ կա, որ
Ս. Սարգսյանի այս քայլը պայմանավորված է նաեւ ՀԱԿ ակտիվիստ, քաղբանտարկյալ
Տիգրան Առաքելյանի ազատության հարցն այդ կերպ լուծելու անհրաժեշտությամբ:
Ըստ Ձեզ՝ իսկապե՞ս իշխանությունը ցանկանում է այս համաներմամբ լուծել նաեւ
Տ. Առաքելյանի հարցը:
-Գիտեք ի՞նչ, միշտ էլ տարբեր տեսակետներ եղել
են, ճիշտն ասած՝ ինձ համար անընդունելի է այդ տեսակետը, որովհետեւ
համաներումը կապված է ՀՀ անկախության 22-րդ տարեդարձի հետ, եւ մենք անկախ
Հայաստանում տարբեր ժամանակներում ականատես եղել ենք, որ նախագահների
կողմից համաներում է իրականացվել: Հիմա ճիշտ չի լինի դա կապել ինչ-որ բանի
հետ:
-Նախորդ երկու համաներումները քաղաքական նպատակներով են իրականացվել, կապված են եղել մարտի 1-ի քաղբանտարկյալների հետ…
-Ես
նախորդ անգամները… նախորդ անգամ, կարծում եմ, կապվել է ոչ թե մարտի 1-ի
իրադարձությունների հետ, այլ ինչ-որ առիթ եղել է: Իսկ մեր երկրում
քաղբանտարկյալներ չեն եղել, ես այդ կարծիքին չեմ:

ԷԴՄՈՆ ՄԱՐՈՒՔՅԱՆ
-Պարո՛ն
Մարուքյան, ՀՀԿ առաջնորդ Սերժ Սարգսյանը ԱԺ է դիմել ՀՀ անկախության
հռչակման 22-րդ տարեդարձի առթիվ համաներում հայտարարելու մաuին
առաջարկությամբ: Դուք՝ որպես պետաիրավական հարցերի մշտական հանձնաժողովի
անդամ, ինչպե՞ս եք մեկնաբանում այդ առաջարկությունը:
-Անկեղծ, ես
առանց որեւէ վերապահումների այն ողջունում եմ, որովհետեւ եթե մենք նայենք
քրեակատարողական հիմնարկների գերծանրաբեռնված վիճակը, նախ՝ սա մեծ բան
կլինի այն թեթեւացնելու, իսկ երկրորդն էլ՝ յուրաքանչյուր մարդ, նաեւ այն
մարդիկ, որոնք հանցագործություն են կատարել, ներվելու իրավունք ունեն:
Համաներումն էլ դրա համար է նախատեսված թե՛ մեր Սահմանադրությամբ, թե՛ մեր
օրենքներով: Մնացածն էլ արդեն նախագիծը կլինի, հոդված առ հոդված կքննարկենք
ու կասենք, թե այն ինչ է իրենից ներկայացնում:
-Նախորդ համաներումները քաղաքական նպատակներով են արվել, մասնավորապես քաղբանտարկյալներին ազատ արձակելու համար..
-Հիմա
ես Ձեզ ասեմ, թե ինչու ես դրանում նույնություն չեմ տեսնում, քանի որ այն
ժամանակ ուրիշ իրավիճակ էր: Այն ժամանակ՝ մարտի 1-ի դեպքերից անմիջապես
հետո, բազմաթիվ մարդիկ կային ՔԿՀ-ներում, այն ժամանակ կային նաեւ Եվրոպայի
խորհրդի խորհրդարանական վեհաժողովի տարբեր ազդանշաններ, պահանջներ,
միջազգային հանրության կողմից ճնշումներ, իսկ այս պարագայում մենք նման
բաներ չունենք: Հայաստանի 22-րդ տարեդարձի համար է կատարվում այդ ամենը:
-Նշվում է, որ իշխանություններն այս ամենն անում են ՀԱԿ ակտիվիստ Տիգրան Առաքելյանին այդ կերպ ազատ արձակելու համար: Համամի՞տ եք:
-Չեմ
կարծում եմ, որ մեկ դատապարտյալի համար պետությունը կգնա նրան, որ
համաներում իրականացնի: Դրա համար այդ ամենում ես քաղաքական ենթատեքստ չեմ
տեսնում: