Հայոց ցեղասպանության զոհերի հուշահամալիրում Հռոմի պապը ճառ չարտասանեց, քանի որ նրա համար խորհելու, մտորելու պահեր էին: «Արմենպրես»-ի հաղորդմամբ` հունիսի 25-ին Գյումրիում լրագրողների հետ ճեպազրույցում հայտնեց Սուրբ Աթոռի մամուլի գրասենյակի տնօրեն մոնսինյոր Ֆեդերիկո Լոմբարդին: «Հռոմի Ֆրանցիսկոս պապը կարճ խորհրդածության պահեր ապրեց հուշահամալիր այցելելիս: Ֆրանցիսկոս պապի ոճն ավելի հարիր է լռությանն ու աղոթքին»,- ասաց Լոմբարդին: Անդրադառնալով թանգարանի պատվո հուշամատյանում Պապի գրառմանը` Սուրբ Աթոռի մամուլի գրասենյակի տնօրենը շեշտեց, որ կաթոլիկների առաջնորդը հանպատրաստից տողեր է ավելացրել արդեն որոշված տեքստին:
«Նա ավելացրել է մի քանի խոսքեր, որոնք բխում են իր այս օրերի փորձառությունից»,հավելեց Լոմբարդին` խոսելով նաև Ֆրանցիսկոս պապի և ցեղասպանությունը վերապրածների ժառանգների հանդիպման մասին: Լոմբարդիի խոսքով` Ֆրանցիսկոս պապը ժամանակ չունեցավ թանգարան այցելելու, բայց գիտի, որ այնտեղ պահվում է կարևոր փաստաթուղթ` Բենեդիկտոս 15րդ պապի նամակը` հասցեագրված Օսմանյան սուլթանին, որով նա միջնորդում էր հանուն հայերի փրկության:
«Մենք նաև այս առավոտ ցնծությամբ տեսանք լուսապայծառ Արարատ լեռը: Այս պատմական պահին Հայաստանի խորհրդանիշ Արարատը բացվեց մեզ»,փաստեց Լոմբարդին: Ճեպազրույցի ժամանակ անդրադարձ եղավ նաև հայերի հետ Պապի առնչությանը: «Նա խորը հարաբերություններ ուներ Արգենտինայի հայկական համայնքի հետ: Երեկ էլ հանդիպեց արգենտինահայ առաքելական եպիսկոպոսի հետ, նրանք իրար շատ լավ ճանաչում են ու բարեկամներ են: Հայ ժողովուրդը նրա համար նորություն չէ, հայկական պատմությունը ևս: Նրա համար մեծ ուրախություն է հայկական մշակույթի սկզբնաղբյուրի հետ շփվելը, որը խարսխվում է գիտելիքի ու բարեկամության երկար նախապատմության վրա»,- եզրափակեց Սուրբ Աթոռի լրատվության պատասխանատուն:
.gif)
