Մի շարք միջոցառումներ Ուսանողության միջազգային տոնի առթիվ

Հայաստանի երիտասարդական հիմնադրամը Երիտասարդության համաշխարհային օրվա (նշվում է նոյեմբերի 10-ին) և Ուսանողության միջազգային տոնի (նշվում է նոյեմբերի 17-ին) առթիվ կազմակերպում է մի շարք միջոցառումներ։

Մասնավորապես նոյեմբերի 12-14-ը Երևանում կանցկացնի երիտասարդական կազմակերպությունների ցուցահանդես-համաժողով, որտեղ առանձին տաղավարներով ներկայացված կլինեն երիտասարդական, ուսանողական կառույցներ, երիտասարդական ոլորտում գործունեություն ծավալող կազմակերպություններ։ Նոյեմբերի 13-16-ը Հայաստանի նկարիչների միությունում կկազմակերպվի երիտասարդ ստեղծագործողների աշխատանքների (գեղանկար, գրաֆիկա, լուսանկար, քանդակ) ցուցահանդես-մրցույթ։ Հիմնադրամը տոնական օրերի շրջանակներում նոյեմբերի 18-ին ՙԱրամ Խաչատրյան՚ համերգասրահում կանցկացնի նաև երիտասարդ կոմպոզիտորների ստեղծագործությունների երեկո։ Իսկ “Երաժշտությունն անիվների վրա” միջոցառմամբ երաժշտական խմբերն ու անհատ կատարողները տոնական տրամադրություն կստեղծեն բուհերի տարածքում և քաղաքում։

Հայաստանի երիտասարդական հիմնադրամը երիտասարդական տոների առթիվ կազմակերպել է նաև մի շարք մրցույթներ, մասնավորապես, ֆեյսբուքյան գրառումների և ՀՀ անկախության թեմայով հոլովակների մրցույթ։ Հաղթողները մրցանակները կստանան տոնական միջոցառումների ընթացքում։ Սպասվում են նաև այլ անակնկալներ։ 

Հայաստանի երտասարդական հիմնադրամի ծրագրերը երիտասարդական տոների առթիվ արդեն ավանդույթ են դարձել։ Դրանց նպատակը երիտասարդներին համախմբելն է, երիտասարդական կառույցների ակտիվացումը, տոնական օրերը բովանդակալի դարձնելը, ինչպես նաև՝ երիտասարդներին մշակութային, հանրային կյանքում ներգրավելը։