ՃՈ ՊԱՇՏՈՆՅԱՆԵՐԸ ՎԵՐԱԿԱՆԳՆՈՒՄ ԵՆ «ՄՍԽԱԾ» ԳՈՒՄԱՐՆԵՐԸ

ՀՀ հատուկ քննչական ծառայությունը (ՀՔԾ) հաղորդագրություն էր տարածել այն մասին, որ տարբեր անվճարունակ քաղաքացիներ համաձայնության գալով թանկարժեք մեքենաներ ունեցողների հետ, նրանց հասցեագրված ճանապարհային երթեւեկության կանոնների խախտման վարչական ակտերն իրենց անունով են վերահասցեագրել: Այնուհետեւ կեղծ դիմումներն են ներկայացրել ՀՀ ճանապարհային ոստիկանություն, որ անվճարունակ են ու տուգանքները չեն վճարել: «Ժողովուրդ»-ի տեղեկություններով՝ վճարունակ քաղաքացիներին եւ ՃՈ պաշտոնյաներին հրահանգվել է վերականգնել պետության վնասը:

Որտեղից սկսվեց պատմությունը
«Ժողովուրդ»-ի տեղեկություններով՝ 2016 թվականին ճանապարհային երթեւեկության կանոնները խախտելու հետեւանքով ավտովթար է եղել` մահացու ելքով, որից հետո մեքենայի վարորդը, քաղաքացուն թողնելով անօգնական վիճակում, փախուստի է դիմել: Փաստի առթիվ հարուցվել է քրեական գործ, իրավապահները փորձել են գտնել փախուստի դիմած քաղաքացուն, որպեսզի պատասխանատվության ենթարկեն: Քրեական գործը վարող ՀՔԾ քննիչները սկսել են վարորդին փնտրել մեքենայի համարանիշով, որպեսզի հասկանան` ում է պատկանում: Բնականաբար, հարցում են ուղարկում ՀՀ ճանապարհային ոստիկանություն:

Տուգանքի առեղծվածը
Երբ իրավապահները գնում են ՃՈ տված հասցեով, պարզում են, որ աղքատ տնակում բնակվող քաղաքացին Range Rover մակնիշի թանկարժեք մեքենա չի ունեցել: Եւ փորձում են բացել կծիկը: Պարզվում է, որ մի շարք հարուստ գործարարներ, պաշտոնյաներ օրենքը շրջանցելու բանաձեւ են մշակել՝ ըստ ամենայնի, համաձայնեցնելով ճանապարհային ոստիկանության պաշտոնյաների հետ: Իրենց գերթանկարժեք ավտոմեքենաները գրանցել են անվճարունակ քաղաքացիների անունով եւ ազատ երթեւեկել բազում խախտումներով` այդպիսով հրաժարվելով տուգանքներ վճարելուց:

Ինչ շահ ուներ ՃՈ-ն
Նկարագրված մեքենայության մեջ, բնականաբար, իր զգալի մեղքի բաժինն ունի նաեւ ճանապարհային ոստիկանությունը: ՀՀ ճանապարհային ոստիկանության պետ Արմեն Հակոբյանի ղեկավարած ծառայությունում եղել են պաշտոնյաներ, որոնք այս գործում կոնկրետ շահագրգռվածություն են ունեցել եւ ներկայացված գերթանկարժեք ավտոմեքենա ունեցողների անվճարունակության մասին դիմումներն աչքաթող են արել: Իսկ թե ինչքան գումարի դիմաց կամ ինչ հումանիստական հիմունքներով են ՃՈ աշխատակիցները նման գործարքի գնացել, թերեւս քննությունը ցույց կտա:
«Ժողովուրդ»-ին իր աղբյուրներից հայտնի դարձավ, որ անվճարունակության թերթիկներ ներկայացնելով՝ տուգանքների վճարումներից խուսափել են նաեւ մի շարք տաքսի ծառայության սեփականատերեր:

8 միլիոն դրամից ավել վնաս
Պաշտոնապես հայտնի է, որ այս գործով ՀՔԾ-ում ՀՀ քրեական օրենսգրքի 184-րդ հոդվածի 2-րդ մասի 2-րդ կետի (գույքային վնաս պատճառելը խաբեությամբ կամ վստահությամբ չարաշահելու եղանակով) եւ 325-րդ հոդվածի 2-րդ մասի (փաստաթղթեր, տրանսպորտային միջոցների պետհամարանիշներ կեղծելը) հատկանիշներով քրեական գործ է հարուցվել:
Այս հոդվածների հատկանիշներով 12 անձ, այդ թվում պետական հատուկ ծառայություն իրականացնող պաշտոնատար անձանց մեղադրանք է առաջադրվել, որից 5-ը գտնվում են կալանքի տակ:
Արդեն տեղեկացրել էինք, որ այս գործը 12 մեղադրյալներով չի ավարտվի, նրանց թիվը կմեծանա: Գրել էինք, որ չի բացառվում` գործը հասնի նաեւ ՀՀ ՃՈ պետ Արմեն Հակոբյանին:
Իր աղբյուրների փոխանցմամբ՝ «Ժողովուրդ»-ը տեղեկացավ, որ պետությանը հասցված վնասի չափը կազմում է 8 միլիոն դրամից ավել գումար, որը դեռ աճելու միտում ունի, քանի որ գործով բացահայտումները շարունակվում են: Ի՞նչ նոր հանգամանքներ կան: «Ժողովուրդ»-ը նշված տեղեկությունների մասով հավելյալ ինֆորմացիա ստանալու նպատակով դիմեց ՀՔԾ լրատվական բաժին, որտեղից ՀՔԾ մամուլի քարտուղար Միքայել Ահարոնյանն ասաց. «Ասեմ, որ այս պահին քրեական գործով կատարվում են մեծածավալ քննչական գործողություններ, ձեռնարկվում են նաեւ անհետաձգելի միջոցառումներ՝ նույն եղանակով գույքի տիրապետողին խաբեությամբ վնաս պատճառելու առերեւույթ հանցագործություն կատարած անձանց սպառիչ ցանկը բացահայտելու եւ քրեական պատասխանատվության ենթարկելու նպատակով: Հորդորում ենք այն քաղաքացիներին, ովքեր տվյալներ ունեն նմանատիպ մեխանիզմներով ՃԵԿ խախտման համար նշանակված, վճարման ենթակա տուգանքները այլ քաղաքացիների անուններով գրանցելու վերաբերյալ, դիմեն ՀՀ ՀՔԾ (հասցեն՝ Վ. Վաղարշյան 13ա, հեռ.՝ 011 900-035, 011 900-011, էլ. փոստ՝ [email protected]): Տվյալներ տրամադրող անձանց գաղտնիությունը երաշխավորվում է: Միաժամանակ տեղեկացնենք քաղաքացիներին՝ ճանապարհային երթեւեկության կանոնները խախտելու համար նշանակված վճարման ենթակա տուգանքների վճարումից խուսափելու նպատակով դրանք չվերագրել անվճարունակ անձանց: Այդ գործողություններն իրենց մեջ պարունակում են հանցագործության հատկանիշներ. արարքը քրեորեն հետապնդելի է»:

Հետ են վճարում
Ու մինչ հատուկ քննչական ծառայությունը շարունակում է քննել գործը, մեքենաների իրական սեփականատերերը, ՃՈ պաշտոնյաների հետ համատեղ սկսել են վերականգնել պետությանը հասցված վնասը: Ըստ էության, եթե չլինեին ճանապարհատրանսպորտային պատահարը եւ փախուստի դիմած վարորդը, ՃՈ պաշտոնյաները եւ վճարունակ մեքենաների սեփականատերերը կշարունակեին իրենց գործը: Ու չի բացառվում, որ դեռ էլի կան այդպիսիք:

ՔՆԱՐ ՄԱՆՈՒԿՅԱՆ

ՆԱԽԿԻՆ ՔԱՂԱՔԱՊԵՏԻ ՇՈՒՐՋ
Հունիսի 25-ին Գյումրի քաղաքում Հռոմի պապի այցին ընդառաջ քաղաքի կենտրոնական փողոցի գրեթե բոլոր խանութները փակել էին տվել, սակայն ըստ լուրերի` Գյումրիի նախկին քաղաքապետ Վարդան Ղուկասյանը չի ենթարկվել քաղաքային իշխանության կոչերին եւ իրեն պատկանող «ԺպՑրՍՌռ ՎՌՐ» խանութը չի փակել:
«Ժողովուրդ»-ն այս առիթով զրուցեց Վարդան Ղուկասյանի հետ:
-Պարո՛ն Ղուկասյան, Հռոմի Ֆրանցիսկոս պապի այցելությունը մեծ ոգեւորություն առաջացրեց հանրության շրջանում: Սակայն շատերի փափագը՝ Սրբազան քահանայապետին մոտիկից տեսնելու, այդպես էլ չիրականացավ: Կարծես թե Դուք էլ չեք հանդիպել պապին, ինչո՞ւ, ցանկություն չկա՞ր, թե՞ Ձեզ նման հնարավորություն չէին ընձեռել:
-Մեկ ուրիշ բան չունե՞ք հարցնելու: Թող Հռոմի պապի համեստությունը եւ պարկեշտությունը, աստվածապաշտությունը յուրաքանչյուրս ունենանք:
-Շատերը համեստության, պարկեշտության համար գնացել էին նրան տեսնելու, Դուք ինչո՞ւ չգնացիք:
-Դա ինչ կարեւոր է՝ գնացել եմ կամ չեմ գնացել:
-Դուք միշտ հավատքից եք խոսում, նույնիսկ բազմաթիվ անգամ Գրիգոր Նարեկացու «Մատյան ողբերգությունից» մեջբերումներ եք անում մարդկային մեղքերի մասով: Միգուցե սա լավ առիթ էր:
-Դա կապ չունի, որ այնտեղ պետք է լինեմ կամ չլինեմ: Ես որ այդպիսի տեղերում եմ լինում, մարդիկ վատ են զգում, կարող է՝ իմ շուքս ընկնում է շատերի վրա, չեմ ուզում անհանգստացնեմ մարդկանց:
-Իսկ գոնե լսեցի՞ք Հռոմի պապի աղոթքը, եւ ի՞նչ կփոխի այն Ձեր կյանքում: Քրիստոնեական պատվիրանները ի՞նչ չափով կկատարեք:
-Ես ասում եմ, ես բազմամեղս, ես եղկելիս ու թշվառականս, ես ամենամեղավոր մարդս, եթե մեծ Նարեկացին իրեն մեղավոր է համարում, եթե Ներսես Շնորհալին իր «Հավատով խոստովանում»-ի վերջին տողերում, 24 տան վերջում ասում է. «Եւ ողորմեա քո արարածոց եւ ինձ՝ բազմամեղիս»: Եթե Գրիգոր Նարեկացին ասում է. «Ամբողջ աշխարհի օվկիանոսները դառնային թանաք, մայրցամաքները՝ մագաղաթ, Լիբանանի անտառները դառնային գրիչ, դարձյալ չէին կարող կրել իմ մեղքերի մեկ հազարերորդական մասնիկը…», եթե նա ասում է. «Արարատ լեռը դնեն մեկ կշեռքի նժարին, իմ մեղքերս՝ մյուս նժարին, իմ մեղքերս կգերազանցեն» Արարատ լեռին, ինձ պես աշխարհիկը ո՞նց կարող է ասել, թե ես մեղավոր չեմ, ես ամենամեղավոր մարդն եմ: Այսքանը:

Զրուցեց ՔՆԱՐ ՄԱՆՈՒԿՅԱՆԸ

ԻՆՉՈՒ ՄԵՐԺԵՑԻՆ
Շիրակի մարզի ընդհանուր իրավասության դատարանը երեկ մերժել է Ավետիսյանների ընտանիքի իրավահաջորդների շահերի պաշտպանների քաղաքացիական հայցն ընդդեմ Ռուսաստանի Դաշնության: Ավետիսյանների իրավահաջորդների ներկայացուցիչները, հիշեցնենք, քաղհայցով Ռուսաստանից պահանջում էին Ավետիսյանների 7 հոգանոց ընտանիքի սպանության գործով բարոյական վնասի փոխհատուցում:

 
ԹԱԼԻՇՑԻՆԵՐԸ ԹԻՐԱԽՈՒՄ
Ղարաբաղա-ադրբեջանական հակամարտ զորքերի շփման գծի տարբեր հատվածներում հակառակորդը պարբերաբար հրաձգային զինատեսակներից սկսել է խախտել հրադադարի պահպանման ռեժիմը՝ թիրախ ընտրելով սահմանին մերձակա գյուղատնտեսական նշանակության տարածքներում աշխատանքներ իրականացնող քաղաքացիական անձանց: Մասնավորապես, երեկ՝ ժամը 14:10-ի սահմաններում, նման միջադեպ է արձանագրվել Թալիշ գյուղի մերձակա տարածքում հացահատիկային մշակաբույսերի բերքահավաքի ժամանակ, որի արդյունքում, բարեբախտաբար, տուժածներ չեն եղել: ԼՂՀ պաշտպանության նախարարությունը կոչ է անում ադրբեջանական կողմին հրաժարվել իր սադրիչ գործողություններից եւ չթիրախավորել գյուղատնտեսական աշխատանքներին ընդգրկված խաղաղ բնակչությանը, այլապես ստեղծված իրավիճակի հետեւանքների ողջ պատասխանատվությունը կրելու է Ադրբեջանի ռազմաքաղաքական ղեկավարությունը:

ԼՂՀ ՄԻՊ-Ը՝ ԲՐՅՈՒՍԵԼՈՒՄ
Եվրոպայի Հայ դատի հանձնախմբի հրավերով Արցախի Հանրապետության Մարդու իրավունքների պաշտպան Ռուբեն Մելիքյանը հունիսի 26-ից աշխատանքային այցով գտնվում է Բելգիայի մայրաքաղաքում: Արցախի օմբուդսմենը բելգիացի գործընկերներին համառոտ ներկայացրել է մարդու իրավունքների պաշտպանի արցախյան ինստիտուտի կայացման ուղին, իրավական վիճակը, առաջնահերթությունները, պաշտպանի եւ աշխատակազմի առջեւ կանգնած խնդիրները:

ՀՀ ՄԻՊ-Ը՝ ԺՆԵՎՈՒՄ
Հունիսի 29-ին Ժնեւում ՀՀ մարդու իրավունքների պաշտպան Արման Թաթոյանը հանդիպել է Human Rights Watch կազմակերպության Եվրոպայի եւ Կենտրոնական Ասիայի գրասենյակի տնօրեն Ֆիլիպ Դամին: Կողմերը կարեւորել են Մարդու իրավունքների պաշտպանի կողմից կանխարգելիչ ակտիվ գործունեության իրականացումը Հայաստանում մարդու իրավունքների միջազգային չափանիշների ներդրման ուղղությամբ: