Նորմալ երկրում, երբ պետական պաշտոնյան հանդես գա ագրեսիվ, հիստերիկ, առանձնակի դաժանություն պարունակող եւ սպանություն քարոզող կոչերով, ապա նրան ոչ միայն կհեռացնեն զբաղեցրած պաշտոնից, այլեւ նվազագույնը՝ կձերբակալեն: Սակայն խոսքը նորմալ երկրների մասին է, այլ ոչ «ապահով Հայաստանի», որտեղ իրենց անձեռնմխելիությունն են վայելում ՀՀԿ-ականները: Նույն «ապահով Հայաստանում» սպորտի փոխնախարար, «Հայոց արծիվներ» կազմակերպության առաջնորդ, «հայոց գերագույն արծիվ» ՀՀԿ-ական Խաչիկ Ասրյանը, ով համատեղության կարգով նաեւ «Ադոլֆ Հիտլերի հաջորդ վերածնունդն» է, «Երկիր»-ի հետ զրույցում ոչ միայն «թուրքի բոստանից զորացրված դաշտամուկ» է անվանել Զարուհի Փոստանջյանին, այլեւ կոչ արել նրան խարույկի վրա կենդանի այրել ոչ թե որպես Ժաննա Դ’Արկի, այլ որպես Ռամիլ Սաֆարովի:
Մեր երկրում փոխնախարարը նման կոչով հանդես եկավ, եւ ո՛չ իշխանության ներկայացուցիչները, ո՛չ էլ իրավապահներն այդ կապակցությամբ որեւէ գնահատական չհնչեցրին: Ավելին, գրեթե չենք կասկածում, որ նույն «վեհ արծիվը» կշարունակի պաշտոնավարել, իսկ մեր «արդարամիտ» դատաիրավական համակարգը իշխանասեր Գեւորգ Կոստանյանի գլխավորությամբ նույնիսկ Ասրյանի հայտարարությունը կորակի որպես ինքնապաշտպանություն:
.gif)
