Առավոտյան բախումից անցել է 18 ժամ. ինչ իրավիճակ է մայրաքաղաքում (տեսանյութ)

Մինչ այս պահը «Սասնա ծռեր» խմբավորման շուրջ 30 ներկայացուցիչներ շարունակում են պատանդ պահել 7 ոստիկանների:

Թերեւս պետք է արձանագրել, որ ամեն ինչ սկսվեց հուլիսի 13-ին Ժիրայր Սէֆիլյանի կողմից հիմնադիր խորհրդարանի նախագահ Գարեգին Չուքասզյանին ուղղված բաց նամակից, որտեղ գրված էր. «Այժմ ես բանտում եմ, ուստի դու պետք է ստանձնես նաև մեր տանդեմի այդ գործառույթը: Համոզված եմ, որ հաջողելու ես: Համոզված եմ նաև, որ շատ մոտ ապագայում դեռ առիթ ու հնարավորություն կունենանք միասին ծառայելու մեր ազգին և Հայրենիքին: Ի գո՛րծ, սիրելի՛ Գարեգին: Մե՛նք ենք տերը մեր երկրի»:

Նամակի հրապարակումից 5 օր անց հայտնի դարձավ, որ Հիմնադիր խորհրդարանի անդամները՝ Վարուժան Ավետիսյանը, Պավել Մանուկյանը, Արեգ Կյուրեղյանը,  Մխիթար Ավետիսյանը, Արայիկ Խանդոյանը և  այլոք «Սասնա Ծռեր» խմբավորում ձեւավորելով 2016 թվականի հուլիսի 17-ին  ժամը 5:28-ի սահմաններում «Կռազ» մակնիշի ավտոմեքենայով գրոհել են ՀՀ ոստիկանության ՊՊԾ գունդը, տիրացել ոստիկանների զենքերին, հագել նրանց զրահաբաճկոնները և պատանդ են պահում 7 ոստիկանների, որոնց թվում է ՀՀ փոխոստիկանապետ Վարդան Եղիազարյանը եւ Երեւանի փոխոստիկանապետ Վալերի Օսիպյանը:

Զինված խմբի անդաները պահանջում են ժիրայր Սէֆիլյանի ազատությունն ու Սերժ Սարգսյանի հրաժարականը: Սակայն ՀՀ իշխանության ներկայացուցիչները հրաժարվում են կատարել զինված խմբավորման պահանջները:

Իսկ ի՞նչ ձեռք բերեց այս իրավիճակում մեր երկիրը եւ ի՞նչ կորցրեց, թերեւս կպարզվի երկար մտորելուց եւ վերլուծելուց հետո: Բայց փաստ է, որ Թուրքիայում տեղի ունեցած զինված հեղաշրջման փորձից հետո Հայաստանում նմանօրինակ իրադարձությունը մեր երկրի արտաքին իմիջի վրա կունենա խիստ բացասական ազդեցություն, որի համար նախեւառաջ մեծագույն պատասխանատվությունը կրում է գործող իշխանությունը, որը անհաղորդ է հասարակության խնդիրներին ու պահանջներին:

ArmLur.am-ը կշարունակի հետեւել իրադարձությունների զարգացմանը եւ օպերատիվ կերպով կտեղեկացնենք անցուդարձի մանրամասները:

Մանրամասները`  ArmLur.am-ի տեսանյութում:

Քնար Մանուկյան, Նարեկ Սարգսյան