Այս պահին զինված խմբի կողմից գրավված ՊՊԾ գնդի տարածքում իրավիճակը հանգիստ է։ Այս մասին ArmLur.am-ին հայտնեց զինված հարձակում իրականացրած խմբի անդամ, «Հիմնադիր խորհրդարան»-ի փոխնախագահ, ՊՊԾ գնդում գտնվող Վարուժան Ավետիսյանը։
– Պարո′ն Ավետիսյան, կասեք՝ այժմ ի՞նչ իրավիճակ է տիրում։
– Ամեն ինչ հանգիստ է, հանգիստ իրավիճակ է տիրում։
– Իսկ հետագա քայլերը որո՞նք են լինելու, մինչև ինչքա՞ն եք պատրաստ այդպես մնալ։
– Եթե մեզ վրա չեն հարձակվում, մենք առավել ևս չենք հարձակվում։
– Բայց ինչքա՞ն ժամանակ դա կարող է շարունակվել։
– Մինչև բոլոր հարցերը լուծում ստանան։
– Բայց այդ հարցում դեռ առաջխաղացում չի նկատվում․ ՀՀԿ-ականները հայտարարեցին, որ Սերժ Սարգսյանը չի պատրաստվում հրաժարական տալ, Սէֆիլյանին ազատ էլ չեն արձակել, հետագա քայլերը որո՞նք են լինելու։
– Մենք հանձնվելու մատդրություն չունենք, երրորդ տարբերակներ են միգուցե հնարավոր, տեսնենք։ Այդ տարբերակների մասին խոսակցություն կա, որի մասին չեմ կարող մանրամասներ հայտնել, բայց չի բացառվում, որ նման բան լինի։
– Իսկ պատանդներն այժմ ի՞նչ վիճակում են։
– Բոլորը քնած են։ Մենք քիչ առաջ ևս մեկ հոգու ազատ ենք արձակել։
– Բայց ինչո՞ւ որոշեցիք ազատ արձակել ևս մեկ ոստիկանի։
– Բարի կամքի դրսևորում, ուղղակի լուծում գտնելու համար․ կոնստրուկտիվ հունի մեջ մտնելու, հույսի արձանագրում։
Հ․ Գ․ Հավելենք, որ քիչ առաջ Էրեբունիում ՊՊԾ գունդ է այցելել ՀՀ ոստիկանապետ Վլադիմիր Գասպարյանը։ Արդյոք նրան հաջողվել է բանակցել զինված խմբի անդամների հետ, թե ոչ, դեռ պարզ չէ։ Եվս մեկ անգամ հիշեցնենք, որ զինված խմբի հիմնական պահանջները Ժիրայր Սէֆիլյանի ազատ արձակումն ու Սերժ Սարգսյանի հրաժարականն է։
Նաիրա Հովհաննիսյան
.gif)
