Ռուսաստանի Դաշնության արտգործնախարարության պաշտոնական ներկայացուցիչ Մարիա Զախարովան հինգշաբթի օրը Մոսկվայում տեղի ունեցած ճեպազրույցի ընթացքում անդրադարձել է Թուրքիայի հնարավոր մասնակցությանը Լեռնային Ղարաբաղի հակամարտության կարգավորմանը:
Ռիա Նովոստիի փոխանցմամբ` Զախարովան ասել է, թե դա կախված է կառուցողական ներդրում առաջարկելու հնարավորությունից:
«Ինչ վերաբերում է ղարաբաղյան կարգավորմանը Թուրքիայի միանալու հարցին, ապա ինչպես այս կամ այլ կարգավորման, որևէ խաղաղ գործընթացի պարագայում, ցանկացած կառուցողական աջակցություն կարելի է դիտարկել հենց կառուցողական փոխգործողության տեսանկյունից: Եվ այստեղ ընդհանուր առմամբ խոսքը միայն Թուրքիայի մասին չէ․ եթե որևէ պետություն կարող է ինչ-որ բան ավելացնել այդ դրական գործընթացին, ապա ոչ մի խնդիր չեմ տեսնում: Բայց, կրկնում եմ, խոսքը կառուցողական ներդրման մասին է»,- ընդգծել է Ռուսաստանի արտաքին գերատեսչության տեղեկատվության և մամուլի բաժնի տնօրեն Մարիա Զախարովան:
Նա երեկ նաև հույս է հայտնել, որ ղարաբաղյան ակտիվ բանակցությունների դինամիկան չի թուլանա:
Երեկ ուշ երեկոյան Մարիա Զախարովան սոցցանցում կատարած գրառմամբ քննադատել է «Հայաստանից և Ադրբեջանից որոշ լրագրողների»՝ ճեպազրույցում իր պատասխանից «իբր ղարաբաղյան կարգավորմանը Անկարային միացնելու՝ Մոսկվայի ցանկության մասին սենսացիա մոդելավորելու» ցանկությունը:
«Ամոթ չէ՞: Այն էլ նման պահին, երբ իրոք կա առաջընթացի հասնելու հնարավորություն: Ինչո՞ւ եք դա անում: Մի՞թե այդքան տարիները և այդքան զոհերը փաստարկ չեն ի օգուտ պատասխանատու մոտեցման», – գրել է Ռուսաստանի դիվանագիտական գերատեսչության պաշտոնական ներկայացուցիչը:
.gif)
