Արդեն հայտնել էինք, որ առավոտյան Էրեբունի բժշկական կենտրոն է տեղափոխվել Ոստիկանության ՊՊԾ գունը գրաված «Սասնա ծռեր» զինված խմբավորման անդամ Սեդրակ Նազարյանը: Էրեբունի բժշկական կենտրոնի գործադիր տնօրեն Միքայել Մանուկյանը քիչ առաջ լրագրողների հետ զրույցում հայտնեց, որ կատարվել է վիրահատություն, այս տվյալ պահին հիվանդը գտնվում է վերակենդանացման բաժանմունքում, իսկ վիճակն էլ գնահատվում է կայուն:
Նա նաև նշեց, որ օրեր առաջ ՊՊԾ տարածքից Էրեբունի հիվանդանոց տեղափոխված Արմեն Լամբարյանի վիճակը գնալով կայունանում է, գիտակցությունը տեղն է: «Սեդրակ Նազարյանն այս պահին չի կարող տեղափոխվել դատապարտյալների հիվանդանոց, այսօր նա կմնա Էրեբունի հիվանդանոցում, իսկ Պավել Մանուկյանի վիճակն օրեցօր բարելավվում է, և այսօր կարող էր տեղափոխվել դատապարտյալների հիվանդանոց»,- ասաց Մ. Մանուկյանը:
Նա նաև անդրադարձավ Սարի թաղի դեպքերի հետևանքով վիրավորներին և նշեց, որ տվյալ պահին Էրեբունի բ/կ-ում գտնվում է 6 ոստիկան, որոնցից 5-ի վիճակը դրական է գնահատվում, մեկը գտնվում է վերակենդանացման բաժանմունքում: Հավաքի մասնակից երկու քաղաքացիներ դեռ հիվանդանոցում են. նրանց վիճակը կայուն բավարար է գնահատվում:
.gif)
