Հուլիսի 17-ին «Սասնա ծռեր» զինված խմբի կողմից ՀՀ ոստիկանության պարեկապահակային գնդի տարածքի գրավումից անցել է արդեն 10 օր, սակայն իրավիճակի հանգուցալուծումն այդպես էլ տեսանելի չէ: Ավելին՝ իրավիճակը գնալով սրվում է թե՛ ոստիկանության կողմից կատարվող գործողությունների, թե՛ հետզհետե ավելի բազմամարդ դարձող բողոքի ակցիաների պատճառով:
Ընդ որում, իրավիճակի զավեշտն այն է, որ սովորաբար մեծ-մեծ խոսող, ամպագոռգոռ հայտարարություններ անող իշխող Հանրապետական կուսակցության անդամներն այս օրերին ասես մեկ մարդու նման «լռության ուխտ» են տվել եւ, առհասարակ, անհետացել դաշտից: Տեւական ջանքերից եւ անհաջող փորձերից հետո «Ժողովուրդ»-ին, ի վերջո, հաջողվեց զրուցել միակ համարձակ հանրապետականի՝ ԱԺ ՀՀԿ խմբակցության պատգամավոր Հայկ Գրիգորյանի հետ:
-Պարո՛ն Գրիգորյան, հուլիսի 17-ից Երեւանում ստեղծված արտակարգ իրավիճակին ՀՀԿ-ականները կարծես անհաղորդ են. սովորաբար ամեն առիթով ակտիվ մեկնաբանություններ եւ ամպագոռգոռ հայտարարություններ անող իշխող ուժի ներկայացուցիչներն այս օրերին ասես անհետացել են: Եթե առաջին վեց օրերին կարծիք կար, որ նրանց Սերժ Սարգսյանն արգելել է խոսել, ապա հենց իր՝ Սերժ Սարգսյանի ելույթից հետո, կարծես թե, այլեւս նման խնդիր չպիտի լիներ: Ինչո՞ւ են Ձեր կուսակիցները համատարած լռում, եւ ո՞րն է Ձեր գնահատականը այս զարգացումների վերաբերյալ:
-Իմ գնահատականը, բնականաբար, շատ բացասական է, որովհետեւ այսօրվա դրությամբ մենք այն վիճակում չենք, որ մեզ թույլ տանք նման իրավիճակ: Որովհետեւ այսօր մենք ունենք անվտանգության խնդիր, Ղարաբաղի հարցը ունենք, բանակցային փուլում ենք գտնվում, եւ չեմ կարծում որ նման իրավիճակները կարող են օգուտ բերել այդ հարցին, հատկապես անվտանգության խնդրի հետ կապված: Չեմ ցանկանում նման իրադարձություններ տեղի ունենան, հայը հայի վրա իրավունք չունի կրակի, հայը ունի այսօր թշնամի, մենք ունենք երկիրը շենացնելու, դրական ուղով տանելու խնդիրները: Այսօր յուրաքանչյուրիս ուղեղը պետք է դրանով զբաղվի, իսկ այսօր բոլորս նստած, սեւեռված այս իրադարձություններին ենք հետեւում: Չեմ ուզում, որ սա երկար ձգվի, իմ ցանկությունն է, որ շատ շուտով խաղաղ հանգուցալուծում ստանա:
-«Սասնա ծռեր» զինված խմբի անդամների պահանջները շարունակում են մնալ անփոփոխ: Դուք ինչպիսի՞ հանգուցալուծում եք կանխատեսում: Արդյո՞ք իշխանությունը կբավարարի այդ պահանջները, թե՞ կգնա ուժային լուծումների:
-Գիտեք՝ ես ո՛չ Վանգան եմ, ո՛չ Նոստրադամուսը, բայց եթե ուզում եք իմ ցանկությունը իմանալ, ապա ասեմ, որ ես ինքս կցանկանամ, եւ, բնականաբար, ցանկացած հայ էլ ցանկանում է, որ առանց արյուն թափվելու այս հարցը լուծվի: Այսինքն՝ տղաները զենքները վայր դնեն:
-Պարո՛ն Գրիգորյան, ըստ Ձեզ՝ ինչո՞ւ «Սասնա ծռեր» խմբավորման անդամները որոշեցին զենքով գնալ իշխանափոխության, այն էլ հենց այս փուլում:
-Չեմ կարող ասել, դա իրենց հարցվել է, իրենք իրենց տեսակետները ասել են, բայց իմ կարծիքով այդ իրավիճակը շատ սխալ է, զենքով հարց լուծում են բռնապետական երկրներում, իսկ Հայաստանի Հանրապետությունը հաստատ բռնապետական երկիր չէ: Մենք մեր երիտասարդ, նորանկախ հանրապետության 25-ամյա զարգացման ուղում ենք գտնվում, եւ դեռ այդ ուղին պետք է շարունակենք, բայց դրա համար մի քիչ համբերություն է պետք: Մենք հաստատ բռնապետական երկիր չենք, ինչպես տղաներից ոմանք ցանկանում են շեշտել:
-Մենք տեսանք, որ ԼՂՀ ԱԺ պատգամավոր Վիտալի Բալասանյանի միջնորդական ջանքերը ընդհատվեցին, եւ դրանից հետո բանակցություններ չեն ընթանում: Արդյո՞ք վերականգնվելու դեպքում բանակցություններն արդյունք կտան:
-Փաստորեն բանակցությունների կարեւորագույն փուլը լուծվեց: Ես շատ ուրախ եմ, որ մեր ոստիկանները, սպաները ազատ արձակվեցին, ունեինք 4 հոգի այնտեղ պատանդի կարգավիճակում: Դա արդեն դրական եւ հուսադրող քայլ է, եւ սպասենք հետագա ընթացքին:
-Սերժ Սարգսյանն իր ելույթում նշեց, որ ստեղծված իրավիճակից պետք է դասեր քաղենք: Դուք կոնկրետ ի՞նչ դասեր քաղեցիք:
-Մեզ իրականում անհրաժեշտ են արմատական փոփոխություններ, անկախ նրանից որ ես իշխող կուսակցության ներկայացուցիչ եմ, բայց, համենայնդեպս, ես նաեւ հայ եմ: Իհարկե, մենք բոլորս էլ տեսնում ենք, մենք ինքներս` հանրապետականներս, ընդունում ենք, որ երկրում կա իրական կոռուպցիա, կոնկրետ ինձ համար դաս քաղելու տեսակետից առաջնային է. կոռուպցիայի դեմ պետք է տարվի շատ լուրջ պայքար: Բազմիցս ենք շեշտել, որ այդ ախտանիշը ցանկացած հայ մարդու մտքից, երակներից, արյունից պետք է հանել ու դեն նետել: Դա է մեր երկրի զարգացման գրավականը: Կոռուպցիա կոչվածի վրա պետք է խաչ քաշել:
-Պարո՛ն Գրիգորյան, անձամբ Դուք ստեղծված իրավիճակում պատասխանատվություն զգո՞ւմ եք:
-Իհարկե, զգում եմ: Ես էլ եմ պատասխանատու, Դուք էլ եք պատասխանատու՝ որպես լրագրող, ցանկացած հայ էլ պատասխանատու է, ասում եմ ամենայն ազնվությամբ: Այն հայը, որն իր ուժերի հարյուր տոկոսով չի նվիրվում իր երկրի շենացմանը, ցանկացած վատ երեւույթի վերացմանը, նա կրում է պատասխանատվություն: Նույնիսկ 90 տոկոսն էլ քիչ է:
ԱՅՍ ՊԱՅԹՅՈՒՆԱՎՏԱՆԳ ՎԻՃԱԿԸ ՉԻ ԿԱՐՈՂ ՉԱԶԴԵԼ ԱՄԵՆ ԻՆՉԻ ՎՐԱ
Հուլիսի 17-ին Երեւանում սկսված իրադարձությունները ոչ միայն լարվածության մեծ ալիք բարձրացրին հանրության շրջանում, այլեւ բացասական սպասումներ առաջացրին ԼՂ բանակցային գործընթացի շուրջ:
Այս առնչությամբ «Ժողովուրդ»-ը զրուցեց քաղաքական վերլուծաբան Ստեփան Սաֆարյանի հետ` պարզելու համար, թե ստեղծված իրավիճակը որքանով կարող է ազդել ԼՂ հակամարտության բանակցային գործընթացի վրա: «Այս անորոշ, պայթյունավտանգ վիճակը չի կարող չազդել ամեն ինչի վրա: Սա այնպիսի մի խնդիր է, որ ազդում է անգամ տուրիզմի վրա: Մեր բոլոր ժամանակների իշխանությունները միշտ չարաշահել են այս խնդիրը. մի ընդվզեք, ժողովրդական գործընթացներին ազատություն մի՛ տվեք, որովհետեւ թուրքը դրանից կարող է օգտվել: Դրա արդյունքը նույնպես լավը չի եղել մեզ համար, որովհետեւ մենք անընդհատ ժողովրդավարությունն ենք զոհաբերել, բայց դրանից մեր պաշտպանվողականությունը չի մեծացել»,- ասաց նա:
Սաֆարյանի խոսքով՝ սա այնպիսի իրավիճակ է, երբ բանակցություններն առնվազն ժամանակավորապես դադարեցվում են: «Մենք նման իրավիճակ ունեցել ենք հոկտեմբերի 27-ից հետո: Ստամբուլում խնդիրը բավականին նոր զարգացումներ էր ստացել, Ստամբուլի գագաթնաժողովի նախաշեմին հոկտեմբերի 27-ը, կարող ենք ասել, կանխեց, պաուզա բերեց բանակցային առումներով: Նման պաուզաներ տրվել են ընտրությունների շրջանում, եւ այսօր էլ հասկանանք, որ եթե որեւէ երկրում իշխանության գլուխը խառն է ինչ-որ ներքաղաքական զարգացումներով, այդ թվում Հայաստանի, բնականաբար այս իրավիճակում բանակցություններ տեղի ունենալ չեն կարող, եւ սա ինչ-որ առումով թայմ աութ է տալիս Հայաստանին»,-ընդգծեց նա:
Վերլուծաբանը նշեց, որ ադրբեջանական հատկապես իշխանամետ լրատվամիջոցները բավականին ինտենսիվ ռեժիմով հետեւում են Հայաստանի իրադարձություններին, ինչը պատահական չէ: «Ադրբեջանը գիտի, որ իր ռազմական ավանտյուրան լավագույնս համապատասխանում է այնպիսի գործոնների հետ, ինչպիսիք միջազգային համակարգում Հայաստանի դիրքերի թուլացումն է, ռուս-հայկական հարաբերությունների վատթարացումն է, Հայաստանի ներքաղաքական իրավիճակի ապակայունացումն է, եւ այսպես շարունակ: Բայց եկեք հասկանանք, որ կոնկրետ տեսակի եւ մասշտաբի արկածախնդրության դեպքում, բացի Հայաստանի ներքին գործոնները, նաեւ այլ գործոններ են հարկավոր: Իհարկե, Հայաստանի ներքին վիճակը կարող է օգտագործել շատ լոկալ խախտումներ անելու համար, ինչպես այս օրերին ունեցանք, երբ նրանք հայ զինվորի արյուն հեղեցին: Բայց, կարծեք թե, այս պահին գոնե այդպիսի նշաններ չկան, որ տեղի ունեցողը նրանց հույս է ներշնչում, թե դա կարող է լուրջ ճակատագրական դեր խաղալ»,- եզրափակեց Սաֆարյանը:
Նյութերը՝ ԱՐՓԻՆԵ ԹՈՎՄԱՍՅԱՆԻ
ՄԱՐԶՊԵՏԻ ԴԱՏԱՎՈՐԸ
Սյունիքի մարզպետ Սուրիկ Խաչատրյանի դեմ 2015թ. մահափորձի գործը Սյունիքի մարզի ընդհանուր իրավասության դատարանում քննելու է դատավոր Անդրանիկ Մնացականյանը: Նույն դատավորը մարզպետի հետ կապված եւս մեկ աղմկալի քրեական գործ է քննում: Խոսքը 2015թ. Գորիսի Սդղլի գյոլ կոչվող տարածքում Մուշեղ եւ Հարություն Զաքարյաններին ծեծի ենթարկելու փաստի առիթով հարուցված քրեական գործի մասին է: Այս գործով մեղադրյալի աթոռին են հայտնվել մարզպետի եղբայրը՝ Սեյրան Խաչատրյանը, նրա որդին՝ էյներ Խաչատրյանը, նրա մյուս եղբոր որդին՝ Մայիս Խաչատրյանը, մարզպետի ազգականներ Յուրի Մանուչարյանը, Դերենիկ Հակոբյանը եւ Շահում Դավթյանը: Մի դեպքում Մնացականյանը մարզպետի դեմ հանցանք կատարողներին է դատելու, մյուս գործով էլ՝ նրա ազգականներին եւ մտերիմներին:
ՉՍԱՏԱՐԵԼՈՎ ԿՍԱՏԱՐԻ
Ինչպես հայտնի է՝ հոկտեմբերի 2-ին Գյումրիում կայանալիք տեղական ինքնակառավարման մարմինների ընտրություններին ՀՅԴ-ն կմասնակցի ավագանու անդամների թեկնածուների իր ցուցակով: Այն գլխավորելու է «Գյումրու մոր եւ մանկան ավստրիական հիվանդանոց» ՓԲԸ գործադիր տնօրեն Աշոտ Կուրղինյանը: «Ժողովուրդ»-ը Շիրակի մարզպետ Հովսեփ Սիմոնյանից փորձեց պարզել՝ ինքը իր կուսակցի՞ն է սատարելու, թե՞ ՀՀԿ-ին: Սկզբում մարզպետը հայտարարեց, որ ինքը որպես մարզպետ իրավունք չունի սատարել որեւէ թեկնածուի: Այնուհետեւ մտափոխվեց եւ ասաց. «Բայց ցանկացած կուսակցական անձ իր կուսակցությանը պետք է սատարի իր կեցվածքով, ճիշտ աշխատանքով, որպեսզի հասարակությունը, մեր ընտրողները հաշվի առնեն, որ տվյալ պաշտոնյան այս կամ այն կուսակցությունից լավն է, ճիշտ է աշխատում եւ դրանով ավելացնի քվեն: Սատարելու այլ տարբերակ չի լինի: Դաշնակցական թեկնածուին սատարում եմ այնքանով, որ, որպես դաշնակցական մարզպետ, իմ աշխատանքով կարողանամ ձայներ բերել այդ կուսակցությանը: Իսկ պետական լծակները բոլորի համար հավասար է աշխատելու»:
ԿՄԻԱՎՈՐԵՆ
«Ժողովուրդ»-ը տեղեկացավ, որ «Վաղարշապատի ծննդատուն» ՓԲԸ-ն առաջիկայում, հնարավոր է, միացվի «Վաղարշապատի պոլիկիլինիկա» ՓԲԸ-ին: Արդյունքում նախատեսվում է ստեղծել «Էջմիածնի բժշկական կենտրոն» անվանումով առողջապահական հաստատություն: Բանն այն է, որ Վաղարշապատի ծննդատանը ծնունդների քանակը նվազել է, եւ անցած տարի ծննդատունը 19 մլն դրամի պարտք է կուտակել: «Ժողովուրդ»-ը պաշտոնական փաստաթղթերից տեղեկացավ, որ ՀՀ Արմավիրի մարզպետ Աշոտ Ղահրամանյանի՝ մայիսի 24-ին ստորագրված կարգադրությամբ ստեղծվել է հատուկ հանձնաժողով, որը պետք է լուծի երկու հաստատությունների միավորման հետ կապված խնդիրները: Ի դեպ, Վաղարշապատի պոլիկլինիկայի տնօրենն է Լիլիթ Կարապետյանը, որը ՀՀ առողջապահության փոխնախարար Վահան Պողոսյանի կինն է: Հավանաբար միավորումից հետո հենց նա էլ կդառնա նոր ձեւավորված բուժհաստատության տնօրենը:
.gif)
