ԼՈՒՐԵՐ

ՇԱԽՄԱՏԸ՝ ԹՎԵՐՈՎ
Երեկ ՖԻԴԵ-ն հրապարակել է աշխարհի 100 ուժեղագույն շախմատիստների վարկանշային ցանկը: Հայ գրոսմայստեր Լեւոն Արոնյանը վերադարձել է «2800-ի ակումբ»՝ հավաքելով ռեյտինգային 2801 միավոր: Հիշեցնենք, որ հոկտեմբերին մեր հայրենակիցը դարձավ «Մեծ սաղավարտի» հաղթող, որն անցկացվում էր Բիլբաոյում, եւ հենց դա էլ նպաստել է նրա վարկանշային առաջընթացին։
Այս ցուցանիշով մեր հավաքականի առաջատարը զիջում է միայն նորվեգացի Մագնուս Կարլսենին, ում վարկանիշը 2870 է: Հավելենք նաեւ, որ լավագույն 100 շախմատիստների ցանկում տեղ են զբաղեցրել եւս չորս հայ գրոսմայստերներ: Իսկ այժմ ներկայացնենք ՖԻԴԵ-ի վարկանշային աղյուսակի լավագույն հնգյակն ու մեր գրոսմայստերների զբաղեցրած տեղերը. Մագնուս Կարլսեն (Նորվեգիա)՝ 2870, Լեւոն Արոնյան (Հայաստան)՝ 2801, Վլադիմիր Կրամնիկ (Ռուսաստան)՝ 2793, Հիկարու Նակամուրա (ԱՄՆ)՝ 2786, Ալեքսանդր Գրիշչուկ (Ռուսաստան)՝ 2785։ 49-րդ տեղում Սերգեյ Մովսեսյանն է՝ 2700, 63-րդում՝ Վլադիմիր Հակոբյանը՝ 2681, 71-րդում՝ Գաբրիել Սարգսյանը՝ 2676, 89-րդում՝ Տիգրան Լ. Պետրոսյանը՝ 2660։
Օլիմպիական եռակի չեմպիոն Հայաստանի հավաքականն էլ ՖԻԴԵ-ի՝ նոյեմբեր ամսվա վարկանշային աղյուսակում զբաղեցնում է 5-րդ տեղը՝ շրջանցելով այնպիսի ուժեղագույն շախմատային ընտրանիների, ինչպիսիք են Հունգարիան, ԱՄՆ-ը եւ Հնդկաստանը: Ռեյտինգը կազմվում է՝ հաշվի առնելով տվյալ երկրի 10 լավագույն գրոսմայստերների եւ միջազգային վարպետների՝ ԷԼՕ-ի գործակիցների միջին վարկանշային ցուցանիշները: Ի դեպ, նշենք, որ ներկայումս Հայաստանն ունի 36 գրոսմայստեր եւ 23 միջազգային վարպետ:
Լավագույն տասնյակում առաջինը Ռուսաստանն է, երկրորդը՝ Ուկրաինան, երրորդը՝ Չինաստանը, չորրորդը՝ Ֆրանսիան, որին Հայաստանը զիջում է ընդամենը 8 միավորով։

ԷԼԻՆԱՅԻ ԱՐԾԱԹԸ
Հունաստանի Հռոդոս քաղաքում ավարտված շախմատի Եվրոպայի կանանց ակումբային առաջնությունում Երեւանի «Միկա»-ն գրավեց 4-րդ հորիզոնականը: Հայաստանի առաջատար գրոսմայստեր Էլինա Դանիելյանը, որը հանդես էր գալիս երրորդ խաղատախտակի վրա, արժանացավ արծաթե մեդալի՝ 6 հնարավորից վաստակելով 4.5 միավոր։
Ի դեպ, անցյալ տարի «Միկա»-ն գրավել էր երկրորդ տեղը, այնպես որ, այս տարվա չորրորդ տեղը կարելի է հետընթաց համարել։