ՀԱՐՑ. Ես ուզում եմ իմանալ, թե Հայաստանի Հանրապետության քաղաքացին տվյալ տարվա մեջ քանի՞ օր պետք է բնակվի ՀՀ տարածքում, որպեսզի համարվի ՀՀ-ում մշտական բնակվող անձ:

ՊԱՏԱՍԽԱՆ. Տեղեկացնում եմ, որ Հայաստանի Հանրապետության քաղաքացու մշտական բնակության վայրը համարվում է այն տեղը, որտեղ նա առավելապես կամ մշտապես բնակվում է: Նման ձեւակերպում չկա, թե տարվա քանի օրը պետք է բնակվես Հայաստանի Հանրապետությունում, որպեսզի համարվես ՀՀ-ում մշտական բնակվող անձ: Իսկ ինչ վերաբերվում է օտարերկրացիներին, ապա նշեմ, որ նրանց համար գոյություն ունի մշտական կացության կարգավիճակ, որը սահմանում է հինգ տարվա կացության կարգավիճակ:

«ԺՈՂՈՎՈՒՐԴ». Նշենք, որ Ազգային վիճակագրական ծառայության կողմից հրապարակված ՀՀ սահմանային էլեկտրոնային կառավարման տեղեկատվական (ՍԷԿՏ) համակարգով ստացված տվյալների համաձայն՝ սահմանային անցման կետերով իրականացվող արտաքին ուղեւորաշրջանառության համախառն ծավալը 2013թ. հունվար-մարտին կազմել է 826,7 հազար: Ստացված տեղեկատվության համաձայն՝ 2013թ. հունվար-մարտին ՀՀ սահմանային անցակետերով արտաքին ուղեւորաշրջանառությանը մասնակցել է 657 հազար 45 մարդ՝ 2012թ. հունվար-մարտի 524 հազար 914 մարդու համեմատ: Այդ թվում՝ Հայաստան է ժամանել 155 հազար 502 ՀՀ քաղաքացի, մեկնել՝ 188 հազար 76-ը: Ստացվում է, որ ժամանողների եւ մեկնողների հաշվեկշիռը բացասական է՝ -32 հազար 574: 2012թ. առաջին երեք ամիսներին ժամանել է 134 հազար 291 ՀՀ քաղաքացի, մեկնել՝ 157 հազար 150-ը, բացասական հաշվեկշիռը -22 հազար 859 է: