Ո՞ւմ էր ձեռնտու Վիտալի Բալասանյանին վարկաբեկելը. իրադարձությունների ավարտն այլ բան ցույց տվեց

Ակնհայտ է, որ ոստիկանության ՊՊԾ գնդի գրավումից հետո ստեղծված իրավիճակը հնարավոր եղավ կանխել առանց մեծ արյունահեղությունների, շնորհից Արցախի հերոս Վիտալի Բալասանյանի, ով հուլիսի 21-ից սկսած հանդիսանում էր «Սասնա ծռեր»-Ժիրայր Սէֆիլյան-իշխանություններ բանակցությունների հիմնական կողմը: Սակայն ինչպես նրան ընդունեցին Հայաստանում…

Հուլիսի 21. Վիտալի Բալասանյանը շտապ եկավ Երևան

Հուլիսի 21-ին`  Խորենացու փողոցում տեղի ունեցած բախումներից մեկ օր անց պարզ դարձավ, որ Արցախից շտապ Երևան է եկել Վիտալի Բալասանյանը` բանակցելու «Սասնա ծռեր» խմբավորման անդամների հետ: ArmLur.am-ն այդ մասին տեղեկացավ, երբ մեր թղթակիցը զրուցում էր խմբավորման անդամ Պավլիկ Մանուկյանի հետ:  Վերջինս մեզ հետ զրույցում նկատեց, որ իշխանությունները չեն կարողանում ոչինչ անել և իրենց մոտ ուղարկում են հարգված մարդու, ով իրենց համար արժեք է ներկայացնում:

Այդ հանդիպումից հետո «Ժողովուրդ» օրաթերթը հրապարակեց, որ Վիտալի Բալասանյանը ՊՊԾ գնդի տարածքից դուրս գալուց հետո ուղևորվել է ՀՀ նախագահի նստավայր`  հանդիպելու Սերժ Սարգսյանին և նրան բանակցություններին ընթացքի մասին տեղյակ պահելու համար:

Հուլիսի 22. Վիտալի Բալասանյանը`  դարձյալ ՊՊԾ գնդում

Արցախի հերոսն իր մի քանի զինակից ընկերների հետ հուլիսի 22-ին կրկին ՊՊԾ գնդում է եղել: ArmLur.am-ի աղբյուրները հայտնել էին, որ Բալասանյանը կրկին բանակցություններ է վարել գունդը գրաված զինյալների հետ, որպեսզի փալուկուղային իրավիճակից ելքեր գտնվեն։  Նույն օրը երեկոյան Բալասանյանը  «Շանթ» հեռուստաընկերության «Հորիզոն» ծրագրի եթերում ներկայացրել էր մանրամասներ իր`  գնդի տարածք այցելությունից և բանակցությունների ընթացքին: Անդրադառնալով բանացկություններին, Վիտալի Բալասանյանը նշել էր, որ գտնում է, թե իշխանությունների առաջարկները կոմպետենտ են, սակայն խմբի տղաները դեռևս դրանք քննարկում են և այլ բաներ են առաջարկում: «Իրենք առաջարկում են Սերժ Սարգսյանի հրաժարականը, միջանկյալ կառավարության ձևավորում, սակայն ամենակարևորը հարցը դրել են Ժիրայր Սեֆիլյանի խափանման միջոցի քննարկումը, որն այս պահի դրությամբ ներկայացված է իշխանություններին և գտնվում է օրակարգային ամենակարևոր հարցերում: Նույնը նրանք ներկայացրել են քաղբանտարկյալների մասին, ճիշտն ասած  ես այդ «քաղբանտարկյալ» բառը չեմ ուզում օգտագործել, որովհետև քաղբանտարկյալ Հայաստանում ընդհանրապես չկա»,- ասել էր նա:

Հուլիսի 23. Լրագրողները մուտք գործեցին ՊՊԾ գունդ

Հուլիսի 23-ին, Բալասանյանի բանակցությունների շնորհի ազատվեցին պատանդ չորս ոստիկանները, որոնց թվում էին նաև ՀՀ փոխոստիկանապետ Վարդան Եղիազարյանն ու Երևանի փոխոստիկանապետ Վալերի Օսիպյանը, իսկ լրագրողներն էլ հնարավորություն ունեցան մուտք գործել գնդի տարածք: Ներսում Վիտալի Բալասանյանը պատասխանեց լրագրողների հարցերին, նշեց, որ Ժիրայր Սէֆիլյանը հրաժարվել է Սերժ Սարգսյանի հրաժարականի պահանջից. և հենց դրանից էլ սկսվեցին հետագա զարգացումները:   «Սէֆիլյանը շատ դրական է արձագանքել, պատրաստ է, ճիշտն ասած, բայց Սէֆիլյանը մի քանի հարցեր է առաջ քաշել, և այդ հարցերին պատկան մարմինները կպատասխանեն: … Կարող եմ պաշտոնական ասել, որ քիչ առաջ էլ` կես ժամ առաջ, Ժիրայր Սէֆիլյանն ասաց` ես հրաժարվում եմ Սերժ Սարգսյանի հրաժարականից», -նշել էր նա:

Լրագրողների`  ՊՊԾ գնդի տարածքում գտնվելու ընթացքում Բալասանյանը զայրացավ և վերջում բոլորին դուրս հանեց տարածքից: Ժամեր չանցած խմբավորման անդամ Վարուժան Ավետիսյանը հայտարարեց, որ իրենք հրաժարվում են Բալասանյանի միջնորդական առաքելությունից, նշելով, որ Վիտալի Բալասանյանն իրեն ոստիկանի պես է պահել. ասել է, թե իշխանությունների շահերից բխող հայտարարություններ է արել, որոնք իրականության հետ որևէ աղերս չունեն:

Հուլիսի 24. Քննադատություններ Բալասանյանի հասցեին և «նոր» միջնորդ

Այս իրադարձությունների հաջորդ օրն իսկ «Հիմնադիր խորհրդարան»-ի անդամները, մասնավորապես Ալեք Ենիգոմշյանը սկսեցին անխնա քննադատել Բալասանյանին և նրան ստախոս անվանել`  պնդելով, որ  Ժիրայր Սէֆիլյանը չի հրաժարվել Սարգսյանի հրաժարականի պահանջից: Սկսեցին տեղեկություններ տարածվել, որ Բալասանյանի փոխարեն նոր միջնորդ է լինելու Սիսիանի «Սիսական» ջոկատի հրամանատար Աշոտ Մինասյանը, ինչը, սակայն ոչ մի կերպ չէր հաստատվում և պարզ էր, որ բանակցութունները կրկին Բալասանյանն է շարունակում:

Հաջորդող օրերին Բալասանյանին վարկաբեկելու փորձերն ու նոր միջնորդի մասին խոսակցությունները շարունակվեցին:

Հուլիսի 29. Պրոցեսը կրկին Բալասանյանի ձեռքում է

Այդ օրը գրել էինք, որ արդեն երկու օր է՝ վերսկսվել են ակտիվ բանակցությունները իշխանության և զինյալների միջեւ: Դարձյալ պրոցեսը գտնվում է գեներալ Բալասանյանի ձեռքին: Փորձ է արվում համոզել «Սասնա ծռեր»-ին` հանձնվել իշխանություններին, որպեսզի բախումներ չլինեն եւ քաղաքակիրթ բանակցություններ սկսվեն՝ առանց զենքի:  Մեր այս լուրից հետո սոցիալական ցանցերում սկսեցին հերքել մեր հրապարակած տեղեկությունները` նշելով, թե ոչ մի բանակցություն էլ չի ընթանում:

Հուլիսի 31. ՊՊԾ գնդից վերջինը դուրս եկավ Վիտալի Բալասանյանը

Վիտալի Բալասանյանի`  10 օր անընդմեջ բանակցությունների կենտրոնում լինելու հանգամանքը հաստատվեց հուլիսի 31-ին, երբ «Սասնա ծտեր» խմբավորման անդամները վայր դրեցին զենքերը և հանձնվեցին իշխանություններին: Այդ օրը խմբավորման անդամներից հետո, ամենավերջինը տարածքից դուրս եկավ հենց Բալասանյանը:

Այս հանգամանքը դարձավ ապացույց, որ այս ամբողջ ընթացքում նա ակտիվ բանակցությունների մեջ  է եղել իշխանությունների և խմբավորման անդամների միջև և նպաստել, որպեսզի հարցը լուծվի առանց արյունահեղության:

Նաիրա Հովհաննիսյան