ԼՈՒՐ ԿԱԴՐ

Լուսանկարն արվել է ՀՀ ֆինանսների նախարարության շենքի դիմացի այգում

Այս այգում բոլորը հավասար են. մարդիկ եւ կենդանիներն իրենց հանգիստն են անցկացնում՝ պառկելով այգու ծառերի տակ:

 
ՀԱՐՑ. Խնդրում եմ ասեք՝ իրավաբանական անձը միաձուլման համար ի՞նչ փաստաթղթեր պետք է ներկայացնի:

Սուսաննա Իսահակյան (42 տարեկան, տնօրեն)

ՊԱՏԱՍԽԱՆ. Հայտնում ենք, որ միաձուլվող իրավաբանական անձը ներկայացնում է պետական տուրքի վճարումը հավաստող փաստաթուղթ:
Միաձուլման արդյունքում ստեղծվող իրավաբանական անձը ներկայացնում է՝
-իրավաբանական անձ հիմնադրելու մասին հիմնադիր ժողովի արձանագրությունը՝ ստորագրված բոլոր հիմնադիրների կամ նախագահի եւ քարտուղարի կողմից: Օրենքով սահմանված դեպքում մեկ անձի կողմից իրավաբանական անձի հիմնադրման դեպքում ներկայացվում է հիմնադրի գրավոր որոշումը,
– ժողովի հաստատած էլեկտրոնային փաստաթղթի ձեւով կանոնադրությունը կամ կանոնադրության առնվազն երկու օրինակ՝ թղթային կրիչի վրա,
– միաձուլվող իրավաբանական անձանց մասնակիցների կամ դրա համար կանոնադրությամբ լիազորված մարմինների որոշումները,
– պետական տուրքի վճարումը հավաստող փաստաթուղթ,
– փոխանցման ակտերը,
– միաձուլման պայմանագիրը,
-առանձին կազմակերպական-իրավական ձեւ ունեցող իրավաբանական անձանց վերաբերյալ օրենքներով կամ այլ օրենքներով նախատեսված պետական գրանցման համար պարտադիր ներկայացման ենթակա այլ փաստաթղթեր:

ՀՀ արդարադատության նախարարություն

«ԺՈՂՈՎՈՒՐԴ». Հայտնում ենք, որ իրավաբանական անձանց միաձուլում է համարվում նոր իրավաբանական անձի uտեղծումը՝ նրան երկու կամ ավելի իրավաբանական անձանց իրավունքների եւ պարտականությունների փոխանցմամբ եւ այդ իրավաբանական անձանց դադարմամբ:

 
ՀԱՐՑ. Ես ուզում եմ հասկանալ, թե ի՞նչ է իրենից ներկայացնում սոցիալական վճարը: Եվ խնդրում եմ ասել, թե որքա՞ն է կազմում նպատակային սոցիալական վճարի դրույքաչափը:

Անահիտ Խաչատրյան (54 տարեկան)

ՊԱՏԱՍԽԱՆ. Ա. Խաչատրյանի հարցին ի պատասխան՝ տեղեկացնում ենք, որ նպատակային սոցիալական վճարը օրենքով սահմանված կարգով եւ չափով Հայաստանի Հանրապետության պետական բյուջե վճարվող նպատակային վճար է:
Նպատակային սոցիալական վճարի դրույքաչափը կազմում է աշխատավարձի 5 %-ը: Սկսած 2020 թվականի հուլիսի 1-ից, եթե աշխատավարձի չափը գերազանցում է 500 000 դրամը, ապա սոցիալական վճարի չափը կազմում է աշխատավարձի 10 տոկոսի եւ 25.000 դրամի տարբերության չափով:
Օրենքով սահմանվում է սոցիալական վճարի հաշվարկման օբյեկտի առավելագույն շեմ՝ մինչեւ 2020 թվականը՝ 500 000 դրամ, սկսած 2020 թվականից՝ նվազագույն ամսական աշխատավարձի 15-ապատիկը (մինչեւ 2020 թվականը՝ սոցիալական վճարի ամսական գումարը չի կարող գերազանցել 25.000 դրամը):
Եթե անձը եկամուտ է ստանում մի քանի աղբյուրից, ապա սոցիալական վճարների հաշվարկման օբյեկտի առավելագույն շեմը գերազանցող գումարներից գործատուի (հարկային գործակալի) կողմից հաշվարկված եւ փոխանցված (գանձված) գումարները Հայաստանի Հանրապետության կառավարության սահմանած կարգով վերադարձվում են անձին:

Կենսաթոշակային համակարգի իրազեկման կենտրոն

«ԺՈՂՈՎՈՒՐԴ». Ավելացնենք, որ նպատակային սոցիալական վճարը պետական բյուջեի եկամուտ է: Նպատակային կատարող անձի համար օրենքով սահմանված կանոնների համաձայն՝ ՀՀ պետական բյուջեի միջոցների հաշվին պարտադիր կենսաթոշակային ֆոնդի փայեր ձեռք բերելու նպատակով կատարվում է կուտակային հատկացում: Կուտակային հատկացումների վերադարձելիության երաշխավորումը եւ դրա ընթացակարգը սահմանված է օրենքով: