Հայաստանի և Բելառուսի պաշտպանության նախարարները Երևանում քննարկել են ռազմական համագործակցության հետ կապված հարցեր: ՀՀ ՊՆ վարչական համալիրում Բելառուսի պաշտպանության նախարար Անդրեյ Ռավկովի գլխավորած պատվիրակության հետ հանդիպումից հետո լրագրողների հետ հանդիպմանն այս մասին ասաց ՀՀ պաշտպանության նախարար Սեյրան Օհանյանը:
«Դուք գիտեք, որ օգոստոսի 16-ին մենք հանդիպել ենք նաև Հավաքական անվտանգության պայմանագրի կազմակերպության անդամ երկրների պաշտպանության նախարարների խորհրդի նիստի շրջանակներում, որն անցել է Հայաստանի համանախագահության ներքո: Այսօր մենք պաշտպանության նախարարությունում ընդլայնված կազմով դեմ առ դեմ զրույց ենք ունեցել: Մենք փոխանակվել ենք մտքերով տարածաշրջանային և միջազգային իրավիճակի վերաբերյալ: Հատկապես ուշադրություն ենք դարձրել մեր տարածաշրջանում տիրող ռազմաքաղաքական իրավիճակին:
Մեր տարածաշրջանում, կարելի է ասել՝ իրավիճակը շատ բարդ է, և նման այցերը հատուկ նշանակություն ունեն համատեղ ծրագրված միջոցառումների շարքը իրականացնելու համար»,- նշեց Օհանյանը: Նախարարներն ուշադրություն են հատկացրել նաև 2016թ. համար նախատեսված ծրագրերի իրականացմանը: «2016թ. մեզ համար շատ լարված է՝ լի տարբեր միջոցառումներով:
Կարծում եմ, որ համատեղ մարտական օպերատիվ պատրաստվածությունը, փորձի փոխանակումը, համագործակցությունը տարբեր ուղղություններով, բոլոր հարցերի վերաբերյալ փոխհասկացվածությունը հանգեցնում են նրան, որ մեր համագործակցությունը շատ բարձր մակարդակի վրա է և դինամիկ զարգանում է: Միանշանակ, Բելառուսի պաշտպանության նախարարի այցը իմպուլս կհաղորդի մեր հարաբերություններին»,- եզրափակեց Սեյրան Օհանյանը:
.gif)
