«ԱՐՑԱԽ»-Ը ԳԵՐԱԶԱՆՑ ԽԱՂ ՑՈՒՑԱԴՐԵՑ

Հայաստանի տղամարդկանց բասկետբոլի առաջնության` երեկ կայացած վերջին տուրից առաջ արդեն հայտնի էր չեմպիոնը։ Այն բանից հետո, երբ նախորդ օրն Արեգ Վաթյանի գլխավորած «Արցախ»-ը 81:71 հաշվով առավելության հասավ «Գրանդ սպորտ»-ի նկատմամբ, դարձավ անհասանելի։ Առաջնությանը մասնակցում էին Երեւանի «Նաիրի»-ն, «Գրանդ սպորտ»-ը եւ «Ինժեներ»-ը, Արթիկի, Գյումրու եւ Արցախի համանուն թիմերը:
Առաջնության մասին կարծիք հայտնեց Հայաստանի բասկետբոլի ֆեդերացիայի մրցավարական հանձնաժողովի նախագահ Դրաստամատ Մուրադյանը:
-«Արցախ»-ը գերազանց խաղ ցուցադրեց եւ արժանիորեն դարձավ չեմպիոն։
-Թիմում արցախցիներ կա՞ն, թե՞ միայն անունն է։
-Խաղացողները ե՛ւ Արցախից են, ե՛ւ Երեւանից։
-Առաջնությանը լեգեոներներ մասնակցո՞ւմ էին։
-Վրաստանից լեգեոներ կա հենց «Արցախ»-ի կազմում։ Նաեւ սիրիահայեր են մասնակցում առաջնությանը։
-Մարզերի թիմերը խաղի մակարդակով շա՞տ են տարբերվում մայրաքաղաքային թիմերից։
-Այս տարվա առաջնության մակարդակն ընդհանրապես բավականին բարձր էր, եւ տարբերություն չկա՝ Երեւանի, թե մարզերի թիմ էր։ Նույն Արցախի թիմը զբաղեցրեց առաջին տեղը, Արթիկի թիմը պայքարում է երկրորդ տեղի համար, Գյումրու թիմը վատ հանդես չեկավ։
-Վերջերս ամերիկահայ բասկետբոլիստներով կազմավորվեց մեր ազգային հավաքականը։ Կա՞ն արժանի տեղացի բասկետբոլիստներ, որոնք կարող են համալրել հավաքականի կազմը։
-Երբ ամերիկահայերից կազմավորված հավաքականի անդամները եկել էին Հայաստան, թիմի հավաքներին տեղի մարզիկներից էլ էին հրավիրվել։ Կան խաղացողներ, ովքեր չեն զիջում ԱՄՆ-ից եկածներին, եւ ինձ թվում է՝ մարզիչը նրանց էլ կընդգրկի հավաքականի կազմում։
-Իսկ Սիրիայից, Լիբանանից, Վրաստանից, այլ երկրներից հայազգի բասկետբոլիստներ կընդգրկվե՞ն հավաքականի կազմում։
-Այդ ուղղությամբ աշխատանքներ տարվում են։
-Ի՞նչ ծրագիր ունի հավաքականը։
-Հավաքականի առաջիկա ծրագրերում Եվրոպայի 2014թ. C դիվիզիոնի առաջնությանը մասնակցելն է։ Ընդ որում, հնարավոր է, որ այն տեղի ունենա Հայաստանում։ Այդ ուղղությամբ էլ են աշխատանքներ տարվում։
-Իսկ «Արցախ»-ը կմասնակցի՞ Եվրալիգայի մրցաշարին։
-Հնարավորությունը կա, բայց հաղթող թիմը պետք է համալրվի թե՛ տեղի այլ ակումբների ուժեղ խաղացողներով, թե՛ լեգեոներներով, եւ այդ դեպքում մասնակցությունն իմաստ կունենա։
-Ավելի վաղ ավարտվել էր կանանց առաջնությունը, այն ինչպե՞ս ընթացավ։
-Կանանց առաջնությունում առաջին հորիզոնականը զբաղեցրեց Երեւանի «Էրեբունի» թիմը, երկրորդը՝ Հայ-սլավոնական համալսարանի հավաքականը, երրորդը՝ Գյումրու թիմը։
-Երբեւէ «Հատիս»-ի նման թիմ ունենալու հնարավորություն կստեղծվի՞։
-«Հատիս»-ում հիմնականում լեգեոներներ էին, մինչդեռ մեր առաջնությանը մասնակցում էին տեղի բասկետբոլիստուհիները, իսկ այդ խաղացողներով նման բարձր մակարդակի թիմ հնարավոր չէ ունենալ։