Համաշխարհային տնտեսական ճգնաժամը պատվով հաղթահարելու մասին Հայաստանի էկոնոմիկայի նախկին նախարար Ներսես Երիցյանի սկանդալային հայտարարությունից երեք տարի անց՝ երեկ, նույնպիսի հայտարարությամբ հանդես եկավ Համաշխարհային բանկի Հարավային Կովկասի տարածաշրջանային տնօրեն Հենրի Քերալին: Սակայն, ինչպես եւ երեք տարի առաջ, այնպես էլ այսօր Հայաստանի` տնտեսական ճգնաժամը հաղթահարելու մասին հայտարարություններն իրականությունից հեռու են: Համենայնդեպս, շարքային հայաստանցու համար դա տեսանելի չէ: Հենրի Քերալին որպես իր ասածի հիմնավորում երեկ ներկայացրեց մեկ շնչին բաժին ընկնող եկամուտը, որը, ըստ Համաշխարհային բանկի ներկայացրած տվյալների, 2008-ին կազմող 3400 ԱՄՆ դոլարից դարձել է 3700 ԱՄՆ դոլար: Անկեղծ ասած` լավ չպատկերացնելով Համաշխարհային բանկի եւ տարբեր ֆինանսատնտեսական կառույցների հաշվարկների խրթին մեթոդաբանությունը, որի հետեւում այնքան սիրում են թաքնվել իշխանական ֆինանսիստները, մեզ համար առնվազն տարակուսելի է, թե ինչպես է հաշվարկվել, որ ՀՀ քաղաքացիների մեկ շնչին բաժին է ընկնում 3700 ԱՄՆ դոլարի եկամուտ, ասել է թե` ամսական 308 ԱՄՆ դոլար կամ 125 հազար դրամ: Արդյոք այսօր հայաստանյան միջին վիճակագրական ընտանիքում առկա է նման եկամուտ: Ընդգծենք, որ խոսքը ոչ միայն կոնկրետ ընտանիքը կերակրողի աշխատավարձի, այլեւ այդ ընտանիքի բոլոր անդամների ամսական եկամտի մասին է: Ասել է թե` եթե ընտանիքը բաղկացած է, օրինակ, 5 հոգուց՝ ծնողներից եւ նրանց երեք երեխաներից, ապա ընտանիքի կերակրողը, որն առավել հաճախ մեկ հոգի է, պետք է վաստակի ամսական 1540 ԱՄՆ դոլար կամ շուրջ 630 հազար դրամ: Բնականաբար, նման աշխատավարձ Հայաստանում ստանում են, մեղմ ասած, քչերը: Բայց, իհարկե, այս ամենը շատ կարեւոր չէ, կարեւորն այն է, որ ՀԲ պաշտոնյան հնչեցներ ճգնաժամը հաղթահարելու մասին հայտարարությունը եւ ասեր. «Համաշխարհային բանկի տեսանկյունից՝ ՀՀ-ն միջին եկամուտ ունեցող երկիր է՝ ո՛չ աշխարհի ամենաաղքատ երկրների շարքում է, ո՛չ էլ ամենահարուստ երկրների»: Մինչդեռ մենք միամտաբար կարծում էինք, որ պաշտոնական տվյալներով 35 տոկոս աղքատություն ունեցող երկիրը, որտեղ նվազագույն աշխատավարձը զգալիորեն զիջում է սպառողական նվազագույն զամբյուղի համար սահմանված գումարին, եթե ոչ աղքատ, ապա առնվազն ցածր եկամուտ ունեցող երկիր է: Բայց քանի որ Համաշխարհային բանկում որոշել են, որ մենք միջին եկամուտ ունեցող երկիր ենք, ուրեմն այդպես է պետք: Եվ հոգ չէ, որ հենց ինքը` ՀԲ ներկայացուցիչն է ընդունում, որ ՀՀ-ում երեքից մեկն ապրում է աղքատության գծից ներքեւ:
.gif)
