ԱԺ ՀԱԿ խմբակցության անդամ Լյուդմիլա Սարգսյանը «Ժողովուրդ»-ի հետ զրույցում հերքեց այն տեղեկությունները, թե ինքը ՀՀ գլխավոր դատախազի ընտրության ժամանակ կողմ է քվեարկել Գեւորգ Կոստանյանի թեկնածությանը, քանի որ Կոստանյանն իրեն խոստացել է վերադարձնել կուսակցության ատենապետությունը:
-Տիկի՛ն Սարգսյան, արդեն տեւական ժամանակ է, ինչ ՍԴՀԿ-ում իսկական պատերազմ է կուսակցության ատենապետի պաշտոնի համար: Ի վերջո, ո՞վ է ՍԴՀԿ հայաստանյան կառույցի օրինական ղեկավարը:
-Գործը դեռ գտնվում է ՀՀ վճռաբեկ դատարանում, ու դատարանը դեռեւս որոշում չի կայացրել` իմ հայցն ընդունի, թե ոչ, համենայնդեպս, մենք ժամկետի մեջ ներկայացրել էինք նյութերը: Իրենք ձեւակերպել են ոչ թե ամսի 18-ից, այլ 28-ից, իրենք ուղիղ մեկ ամիս հետո որոշում պետք է կայացնեն, այսինքն՝ մինչեւ այս ամսվա 28-ը: Այժմ ամեն ինչ կապված է նրա հետ՝ վճռաբեկ դատարանը գործը վարույթ կընդունի, թե ոչ: Եթե վարույթ ընդունեց, ապա ես կհամարեմ, որ մենք հաղթել ենք: Մենք դիմել ենք դատարան, որպեսզի ապօրինի գրանցումը չեղյալ ճանաչեն. պետռեգիստրի դեմ է մեր բողոքը: Քաղաքական պատվերով պետռեգիստրը նման գրանցում է կատարել: Ի դեպ, նշեմ, որ իբրեւ թե կուսակցությունը համագումար է արել, որի ընթացքում իբրեւ թե ես չեմ վերընտրվել, այն դեպքում, երբ ո՛չ գործող վարչությունն է համագումարից տեղյակ եղել, ո՛չ էլ գործող ատենապետը, որը ես էի: Ես ո՛չ հաշվետվությամբ եմ հանդես եկել, ո՛չ էլ ներկա եմ եղել, բայց պարզվել է, որ ես չեմ վերընտրվել: Դուք այդ աբսուրդը հասկանո՞ւմ եք:
-Բայց կուսակցությունը պաշտոնապես հայտարարել է, որ ատենապետը Գ. Պերկուպերկյանն է…
-Դե, բնականաբար, եթե ես չեմ վերընտրվել, մեկը պետք է ընտրվեր, չէ՞: Բայց ըստ էության՝ դա խաբեություն եւ գործարք է եղել՝ այս դեպքում արդարադատության նախարար Հրայր Թովմասյանի հովանավորությամբ, ես կասեի` ուղիղ հրահանգով: Իսկ թե նրան ով է հրահանգել, դա կարելի է ենթադրել արդեն:
-ՀՀ գլխավոր դատախազի ընտրության ժամանակ տեղեկություններ էին շրջանառվում, որ Դուք ընտրել եք Գեւորգ Կոստանյանին, քանի որ վերջինս Ձեզ խոստացել է «վերադարձնել» կուսակցության ատենապետությունը: Ի՞նչ կասեք այդ կապակցությամբ:
-Ի դեպ, ասեմ, որ դա շատ հեշտ է հերքելը: Դուք ընդամենը կարող եք հանձնաժողովի անդամ ՕԵԿ ներկայացուցչին դիմել, որն ուղիղ կհաստատի, որ իր աչքի առաջ ես բաց քվեարկություն եմ կատարել, քանի որ գրիչ չկար, ու իր ներկայությամբ «կողմ»-ը ջնջել եմ: Ես խնդիր չեմ ունեցել, որ կողմ քվեարկեմ ու հետո հայտարարեմ, թե դեմ եմ քվեարկել: Եթե պետք է հաճոյանայի Գ. Կոստանյանին, ուրեմն չպետք է հայտարարեի, որ դեմ եմ քվեարկել:
-Այժմ ի՞նչ ակնկալիքներ ունեք, ի՞նչ եք կարծում՝ ի վերջո, ինչպիսի՞ որոշում է կայացվելու, կուսակցության ատենապետի պաշտոնը «վերադարձնելո՞ւ» են Ձեզ, թե՞ ոչ:
-Ես ե՛ւ դատախազություն եմ դիմել, ե՛ւ արդարադատության խորհուրդ` խնդրելով, որ գործն օբյեկտիվ քննության ենթարկեն, ու եթե կկարողանան` կոնկրետ պատժամիջոցներ կիրառեն դատավորների դեմ, որոնք կայացրել են ապօրինի վճիռներ: Քանի որ այդ վճիռների մեջ մեր ներկայացրած ոչ մի փաստարկ, ոչ մի հիմք հաշվի չի առնվել: Եթե հաշվի առնեին, ապա ակնհայտ էր լինելու կեղծիքը: Հետեւաբար դա ինձ հիմք է տալիս պնդելու, իսկ ես դրանում մեկ վայրկյան անգամ չեմ կասկածել, որ դա ուղիղ հրահանգով ապօրինի որոշում է եղել, որի դեմ ես ու մեր վարչության անդամները պայքարում ենք: Եթե քաղաքական պատվերը դեռ ուժի մեջ է, ապա այդ դեպքում ոչ մի լավ բան չի կարելի ակնկալել, իսկ եթե քաղաքական պատվերն այլեւս նույն հետաքրքրությունը չի ներկայացնում… Ես չեմ կարծում, որ այժմ այդ չափով հետաքրքրություն կարող է ներկայացնել, ինչ 2009թ., քանի որ այն ժամանակ Կոնգրեսի պառակտման խնդիրն էր դրված: Այսօր Կոնգրեսն առանձին կուսակցություն է, ՍԴՀԿ-ն՝ առանձին: Ու մի կարեւոր հանգամանք էլ՝ Սեդրակ Աճեմյանը, որն ուղիղ գործարքի մի կողմն էր, այլեւս էն գործոնը չէ, ինչ մինչեւ 2013թ. սեպտեմբերն էր, քանի որ նա չի վերընտրվել: Ու չի վերընտրվել այն պատճառով, որ իր ատենապետության օրոք նա շատ-շատ տեղերում նույն ապօրինի եւ հակահնչակյան գործողություններն է կատարել: Նույն Հալեպում նա ոչնչացրեց կուսակցությունը: Հայաստանում էլ հույսը դրել էր իշխանությունների վրա եւ, բնականաբար, իր այդ վարքով կուսակցության քայքայման հիմք հանդիսացավ:
.gif)
