Որքան արժե մասնավոր դպրոցում սովորելը, և ինչո՞ւ են բարձրաստիճան պատոնյաններն իրենց երեխաների համար այդ տարբերակն ընտրում

Ուսումնական տարվան ընդառաջ դպրոցահասակ երեխաներ ունեցող ծնողների առաջին մտածմունքն իրենց երեխաների համար դպրոց ընտրելն է. ինչպես անել, որ պայմանները լինեն բարվոք, կրթությունն էլ` որակյալ: Այդ փնտրտուքների ճանապարհին ավելի ապահով ընտանիքները նախընտրում են իրենց երեխաներին մասնավոր դպրոցներ ուղարկել, որտեղ վարձավճարները գերազանցում են բուհերի վարձավճարներին:

Նախ նշենք, որ Հայաստանի Հանրապետությունում գործում է շուրջ 1400 դպրոց, մասնավոր դպրոցների թիվը մոտ 50-ն է:  Պետական դպրոցից մասնավոր դպրոցը տարբերվում է նրանով, որ այնտեղ դասապատրաստում է տեղի ունենում, և երեխաները դպրոցում ավելի երկար ժամանակ են անցկացնում:

Գործող մասնավոր դպրոցների վարձավճարները բավական տարբերվում են միմյանցից: Օրինակ,  «Տաթև» մասնավոր դպրոց հաճախելու համար ամսական 50 հազարն էլ է բավարար, սակայն «Անանիա Շիրակացու» անվան ճեմարանում առաջին դասարանի տարեկան վարձավճարը ոչ ավել, ոչ պակաս կազմում է 2 մլն 100 հազար դրամ:

«ԱՅԲ» մասնավոր դպրոցում տարեկան վարձավճարը կազմում է 2 մլն 500 հազար դրամ (մոտ 5.5 հազար ԱՄՆ դոլար):  Այստեղ են հաճախում ՀՀԿ փոխնախագահ Արմեն Աշոտյանի և  ՀՀ նախկին գլխավոր դատախազ Գևորգ Կոստանյանի երեխաները:  Վերը նշված «Անանիա Շիրակացու» անվան ճեմարանում իրենց կրթությունն են ստացել ԲՀԿ նախկին նախագահ, գործարար Գագիկ Ծառուկյանի երեխաները, իսկ այսօր էլ արդեն այդ ուղին բռնեց նրա և վարչապետ Հովիկ Աբրահամյանի թոռնուհին, ում ճեմարան է ուղեկցել վարչապետը:

Իհարկե, մասնավոր դպրոցների թվում կան նաև ավելի մատչելի վարձավճարներով կրթություն առաջարկողներ. օրինակ, «Փոքրիկ իշխան» կրթահամալիրում վարձավճարը կրկին տատանվում է ամսական 50 հազար դրամի սահմաններում և դա կախված է, թե երեխան որ դասարան է հաճախում: